យោងតាមការស្ទង់មតិថ្មីមួយធ្វើឡើងដោយសកលវិទ្យាល័យឈីកាហ្គោ (University of Chicago) និងមជ្ឈមណ្ឌលស្រាវជ្រាវកិច្ចការសាធារណៈ អេភី-ណក (AP-NORC) ដែលសុទ្ធតែមានមូលដ្ឋាននៅសហរដ្ឋអាម៉េរិកបានបង្ហាញថា ពលរដ្ឋអាម៉េរិកភាគច្រើន ដែលជាអ្នកបង់ពន្ធបានបង្ហាញអារម្មណ៍មិនសប្បាយចិត្តនឹងការបង់ពន្ធជូនរដ្ឋ ដោយយល់ថា ពួកគេបង់ពន្ធច្រើនពេក ហើយទទួលបានផលតបស្នងមកវិញតិចតួចយ៉ាងអយុត្តិធម៌។
ទិន្នន័យបង្ហាញថា ២ភាគ៣នៃអ្នកជាប់ពន្ធនៅសហរដ្ឋអាម៉េរិកនិយាយថា ពួកគេត្រូវបង់ច្រើនពេកនូវពន្ធលើប្រាក់ចំណូលសហព័ន្ធ ស្របពេលរដូវកាលបង់ពន្ធចូលមកដល់ ដោយក្នុងចំណោម១០នាក់ មានប្រហែល៧នាក់និយាយដូចៗគ្នាអំពីពន្ធលើអចលនទ្រព្យ ខណៈប្រមាណ៦នាក់ក្នុងចំណោម១០នាក់បង្ហាញអារម្មណ៍ដូចគ្នាទាក់ទិននឹងពន្ធលើការលក់។
ហើយជាទូទៅ អ្នកគាំទ្រគណបក្សសាធារណរដ្ឋមានចំនួនច្រើនជាងអ្នកគាំទ្រគណបក្សប្រជាធិបតេយ្យដែលនិយាយថា ការបង់ពន្ធទាំងនោះគឺមិនត្រឹមត្រូវ មិនយុត្តិធម៌ ព្រោះយល់ថា ពួកគេបង់ពន្ធច្រើនពេក ប៉ុន្តែទទួលបានផលតបស្នងតិចតួចមិនសមនឹងតម្លៃ។
អត្ថបទគួរអាន
ការស្ទង់មតិបានរកឃើញថា នៅសហរដ្ឋអាម៉េរិកមានមនុស្សពេញវ័យតែមួយចំនួនតូចប៉ុណ្ណោះដែលមានទំនុកចិត្តខ្ពស់ថា ស្ថាប័នរដ្ឋនានានឹងប្រើប្រាស់ប្រាក់ពន្ធដែលពួកគេបង់ជូនរដ្ឋមិនថា រដ្ឋាភិបាលសហព័ន្ធ ឬសង្កាត់ ដែលពួកគេរស់នៅនោះទេ គឺប្រើប្រាស់ចំគោលដៅដើម្បីបម្រើផលប្រយោជន៍ដល់ពលរដ្ឋដូចពួកគេ ដោយក្នុងនោះមានតែ៦%ប៉ុណ្ណោះ ដែលបង្ហាញការជឿជាក់ខ្លាំងលើរដ្ឋាភិបាលសហព័ន្ធ បើធៀបនឹង១៦% ដែលជឿជាក់លើសង្កាត់មូលដ្ឋាន។
ពលរដ្ឋដែលមានអាយុចាប់ពី៦០ឆ្នាំឡើងទៅ ទំនងជាមានច្រើនជាងពលរដ្ឋមានវ័យក្មេងជាងដែលយល់ឃើញជាទូទៅថា ការបង់ពន្ធនេះគឺមិនត្រឹមត្រូវ មិនយុត្តិធម៌។
លោក គ្រីស បឺរី (Chris Berry) សាស្ត្រាចារ្យនៅសកលវិទ្យាល័យឈីកាហ្គោ (University of Chicago) ដែលបានចូលរួមពាក់ព័ន្ធក្នុងការងារស្ទង់មតិនេះបានលើកឡើងថា ជាទូទៅទំនុកចិត្តរបស់សាធារណជនលើបញ្ហាពន្ធ និងទំនុកចិត្តលើរដ្ឋាភិបាលសហព័ន្ធបានធ្លាក់ចុះ។
ក្នុងចំណោមអ្នកដែលបង់ពន្ធលើប្រាក់ប្រាក់ចំណូលសហព័ន្ធ មានចំនួនពាក់កណ្តាលនិយាយថា ពួកគេសុខចិត្តទទួលបានសេវារដ្ឋាភិបាលតិចជាងមុន បើអាចកាត់បន្ថយការបង់ពន្ធរបស់ពួកគេបានខ្លះ។ ទន្ទឹមនេះ១ភាគ៣នៃអ្នកបង់ពន្ធសុខចិត្តបង់ពន្ធដដែលជាថ្នូរនឹងការទទួលបានសេវាសាធារណៈដដែលដូចបច្ចុប្បន្ន ខណៈ១៦% សុខចិត្តឱ្យរដ្ឋដំឡើងពន្ធដើម្បីទទួលបានសេវាសាធារណៈច្រើនជាងបច្ចុប្បន្ន៕
ដោយ: តែម សុខុម
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
