ក្រោយពីព្រឹទ្ធសភាអាម៉េរិក បានអនុម័តសេចក្ដីព្រាងច្បាប់ ស្ដីពីថវិកាចំណាយខាងលើកាលពីយប់ថ្ងៃសុក្រសប្ដាហ៍មុនហើយភ្លាម លោក ចូ បៃដិន ប្រធានាធិបតីអាម៉េរិក មិនបានបង្អង់យូរឡើយ ក៏បានចុះហត្ថលេខាឱ្យច្បាប់នេះចូលជាធរមានភ្លាមៗតែម្ដង ដើម្បីបញ្ចៀសការបិទទ្វាររដ្ឋាភិបាល។
លោក បៃដិន បានចាត់ទុកកញ្ចប់ថវិកានេះថា ជាការវិនិយោគលើជនជាតិអាម៉េរិក ក៏ដូចជាការពង្រឹងសេដ្ឋកិច្ច និងសន្តិសុខជាតិ ហើយទន្ទឹមនឹងនោះ លោកបានជំរុញឱ្យសភាអនុម័តច្បាប់ផ្សេងៗទៀត ដែលជាប់គាំងក្នុងសភាផងដែរ។
លោក បៃដិន បាននិយាយក្នុងសេចក្តីថ្លែងការណ៍ថា សភាត្រូវតែអនុម័តច្បាប់សន្តិសុខជាតិបន្ថែមទៀត ដើម្បីជំរុញផលប្រយោជន៍សន្តិសុខជាតិរបស់អាម៉េរិក ហើយក៏ត្រូវតែអនុម័តកិច្ចព្រមព្រៀងសន្តិសុខព្រំដែន ដែលជាកំណែទម្រង់ដ៏តឹងតែង និងយុត្តិធម៌បំផុតក្នុងរយៈពេលជាច្រើនទសវត្សរ៍មកនេះដែរ ដើម្បីធានាថា អាម៉េរិកមានគោលនយោបាយ និងថវិកា ដែលចាំបាច់ដើម្បីធានាព្រំដែន ដោយលោកបញ្ជាក់ថា វាដល់ពេលហើយដែលត្រូវធ្វើរឿងនេះ។
អត្ថបទគួរអាន
បើតាមរដ្ឋមន្ត្រីក្រសួងហិរញ្ញវត្ថុរបស់អាម៉េរិក លោកស្រី ជេណិត យែឡិន (Janet Yellen) បានឱ្យដឹងកាលពីថ្ងៃចុងសប្ដាហ៍នោះដែរថា ក្នុងចំណោមកញ្ចប់ថវិកាចំណាយជាង១ទ្រីលានដុល្លារនេះ គឺចំនួន២១ពាន់លានដុល្លារត្រូវបានផ្ដល់ជាកម្ចីដល់កម្មវិធីទំនុកចិត្តរបស់មូលនិធិរូបិយវត្ថុអន្តរជាតិ (IMF) ដើម្បីជួយបណ្ដាប្រទេសក្រីក្របំផុតនៅក្នុងពិភពលោក។
លោកស្រី យែឡិន បាននិយាយថា ការផ្តល់មូលនិធិនេះ នឹងធ្វើឱ្យសហរដ្ឋអាម៉េរិកក្លាយជាអ្នកគាំទ្រដ៏ធំបំផុតរបស់កម្មវិធីកាត់បន្ថយភាពក្រីក្រ និងទំនុកចិត្តកំណើនរបស់មូលនិធិ IMF (PRGT) ដែលផ្តល់ប្រាក់កម្ចីក្នុងអត្រាការប្រាក់សូន្យ ដើម្បីគាំទ្រដល់ប្រទេសមានចំណូលទាប ខណៈដែលប្រទេសទាំងនេះកំពុងប្រឹងប្រែងរក្សាស្ថិរភាពសេដ្ឋកិច្ច ជំរុញកំណើន និងកែលម្អនិរន្តរភាពបំណុលរបស់ពួកគេ។
ចាប់តាំងពីមាការផ្ទុះជំងឺរាតត្បាតកូវីដ-១៩មក មូលនិធិ IMF បានគាំទ្រប្រទេសដែលមានចំណូលទាបជាង៥០ ជាមួយនឹងប្រាក់កម្ចីគ្មានការប្រាក់ចំនួន៣០ពាន់លានដុល្លារតាមរយៈកម្មវិធី PRGT ដោយបានកាត់បន្ថយអស្ថិរភាពនៅក្នុងប្រទេសក្រីក្រមួយចំនួនចាប់ពីប្រទេសហៃទី រហូតដល់សាធារណរដ្ឋប្រជាធិបតេយ្យកុងហ្គោ និងនេប៉ាល់៕
អត្ថបទ៖ សុខ ជា
None
