ការប្ដេជ្ញាចិត្តរបស់លោកស្រី ផែថងថាន ស៊ីវ៉ាត្រា ធ្វើឡើងក្រោយ លោកស្រី ទទួលបានការអនុម័តយល់ព្រមពីព្រះមហាក្សត្រថៃ ដើម្បីក្លាយជានាយករដ្ឋមន្ត្រីថៃ ទី៣១ ដែលមានវ័យក្មេងជាងគេបំផុតរបស់ប្រទេសនេះកាលពីថ្ងៃអាទិត្យសប្តាហ៍មុន។ លោកស្រី បានប្រាប់អ្នកសារព័ត៌មានថា លោកស្រីមិនចង់ប្រឈមនឹងជោគវាសនាដូចឪពុក និងម្តាយមីងរបស់លោកស្រីនោះទេ។ ដូច្នេះហើយគោលបំណងរបស់លោកស្រីឥឡូវនេះ គឺត្រូវបំពេញភារកិច្ចឱ្យបានល្អបំផុតតាមដែលអាចធ្វើបាន។
លោកស្រី ផែថងថាន បានក្លាយជាសមាជិកទី៣ នៃត្រកូល ស៊ីណាវ៉ាត្រា ដ៏មានឥទ្ធិពលដែលបានដឹកនាំប្រទេសនេះ ដោយទី១ គឺលោក ថាក់ស៊ីន និងទីពីរលោកស្រី យីងឡាក់ ហើយពួកគេទាំងពីរនេះបាននិរទេសខ្លួនទៅរស់នៅបរទេស បន្ទាប់ពីរដ្ឋប្រហារយោធាដណ្ដើមអំណាចកាលពីឆ្នាំ២០០៦ និងឆ្នាំ២០១៤។
នៅក្នុងសន្និសីទសារព័ត៌មានលើកដំបូងក្នុងនាមជានាយករដ្ឋមន្ត្រីថ្មី លោកស្រី ផែថងថាន បាននិយាយថា លោកស្រីនឹងបន្តគោលនយោបាយរបស់លោក ស៊្រីថា ថាវីស៊ីន រួមទាំងការជំរុញសេដ្ឋកិច្ច និងកំណែទម្រង់សំខាន់ៗ ការដោះស្រាយបញ្ហាគ្រឿងញៀនខុសច្បាប់ ការកែលម្អប្រព័ន្ធថែទាំសុខភាពជាសកល និងការលើកកម្ពស់ភាពចម្រុះផ្នែកយេនឌ័រ។
លោកស្រីបានបញ្ជាក់ថា រដ្ឋាភិបាលរបស់លោកស្រីនឹងមិនបោះបង់ចោលគោលនយោបាយកាបូបឌីជីថលដ៏លេចធ្លោរបស់ខ្លួននោះទេ ប៉ុន្តែនឹងព្យាយាមសិក្សា និងស្តាប់ជម្រើសបន្ថែម ដើម្បីប្រាកដថា គម្រោងនេះទទួលខុសត្រូវផ្នែកសារពើពន្ធ ព្រោះថា នេះគឺជាគោលដៅដើម្បីជំរុញសេដ្ឋកិច្ច៕
អត្ថបទ៖ សុខ មង្គល
