ថ្នាក់ដឹកនាំធនាគារជាតិ និងថ្នាក់ដឹកនាំគ្រឹះស្ថានធនាគារ និងមីក្រូហិរញ្ញវត្ថុ អះអាងថា ការដាក់ឲ្យថ្លៃប្រាក់ដុល្លាររបស់ ធនាគារជាតិនេះ ជាមធ្យោបាយដ៏សំខាន់ក្នុងការរក្សាតម្លៃប្រាក់រៀល និងបង្កើនទំនុកចិត្តដល់អ្នករកស៊ី និងវិនិយោគិនលើរូបិយវត្ថុជាតិ។ លើសពីនេះ វាជាយន្តដ៏មានសារសំខាន់ដើម្បីរក្សាស្ថិរភាពសេដ្ឋកិច្ចកម្ពុជាក្នុងអំឡុងវិបត្តិកូវីដ-១៩ នេះ។
លោកជំទាវ ជា សិរី ឧបការីទេសាភិបាល និងជាអគ្គនាយិកាបច្ចេកទេស នៃធនាគារជាតិ នៃកម្ពុជាបានបញ្ជប្រាប់ខេមបូណូមីសតាមប្រព័ន្ធតេឡេក្រាមថា ការដេញថ្លៃលក់ និងទិញប្រាក់ដុល្លារអាមេរិក គឺជាប្រតិបត្តិការទូទៅរបស់ធនាគារកណ្តាល ដើម្បីឆ្លើយតបនឹងការប្រែប្រួលតម្រូវការ និងការផ្គត់ផ្គង់រូបិយប័ណ្ណប្រាក់ដុល្លារអាមេរិក និងប្រាក់រៀលនៅលើទីផ្សារប្តូរប្រាក់។ សម្រាប់លោកជំទាវ ការធ្វើអន្តរាគមន៍ទិញ-លក់ប្រាក់ដុល្លារអាមេរិក គឺជាយន្តការទីផ្សារមួយ ដែលត្រូវបានប្រើប្រាស់ ដើម្បីរក្សាអត្រាប្ដូរប្រាក់ឱ្យមានស្ថិរភាព ឬរក្សាតម្លៃប្រាក់រៀល ដែលរួមចំណែកដោយផ្ទាល់ក្នុងការការពារអំណាចទិញរបស់ប្រាក់រៀល ដែលជាចំណូលរបស់ជនទូទៅ ជាពិសេសប្រជាកសិករនិងប្រជាជន ដែលមានចំណូលទាប។
លោកជំទាវ ជា សិរី បន្ថែមថា៖«ការប្រែប្រួលថ្លៃរូបិយបណ្ណ ក៏កើតឡើងផងដែរ នៅក្នុងបណ្តាប្រទេសក្នុងតំបន់ និងលើរូបិយប័ណ្ណប្រទេសធំៗក្នុងគ្រាមានវិបត្តិ ដែលបញ្ហានេះជារឿងធម្មតា នៅពេលដែលសេដ្ឋកិច្ចមានការប៉ះទង្គិច ហើយរដ្ឋាភិបាល និងធនាគារកណ្តាលបានដាក់ចេញនូវនយោបាយ សេដ្ឋកិច្ច និងហិរញ្ញវត្ថុនានា ដើម្បីគ្រប់គ្រងវិបត្តិ និងការស្ដារសេដ្ឋកិច្ច»។
លោកជំទាវបានបន្ថែមថា នៅក្នុងរយៈពេលពីរទសវត្សរ៍កន្លងមកនេះ ធនាគារជាតិនៃកម្ពុជាបានរក្សាស្ថិរភាពតម្លៃប្រាក់រៀលបានយ៉ាងល្អប្រសើរ។ ជាលទ្ធផល ស្ថិរភាពប្រាក់រៀលបានជួយរក្សាអំណាចទិញរបស់ប្រាក់រៀល, ពង្រឹងជំនឿទុកចិត្ត ព្រមទាំងលើកទឹកចិត្តសាធារណជនឱ្យប្រើប្រាស់ និងសន្សំជាប្រាក់រៀល ដែលបានរួមចំណែកយ៉ាងសំខាន់ក្នុងការរក្សាស្ថិរភាពម៉ាក្រូសេដ្ឋកិច្ច និងការរីកចម្រើននៃសកម្មភាពសេដ្ឋកិច្ចកម្ពុជាប្រកបដោយចីរភាព។
អត្ថបទទាក់ទង
ទាក់ទងនឹងការដាក់ឲ្យមានការដេញថ្លៃប្រាក់ដុល្លារនេះដែរ លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា បានគាំទ្រយ៉ាងពេញទំហឹងចំពោះវិធានការដាក់ឲ្យដេញថ្លៃប្រាក់ដុល្លារអាមេរិក ដើម្បីប្រមូលប្រាក់រៀលរបស់ធនាគារជាតិនៃកម្ពុជា។ គាំទ្រក៏ដោយសារលោកបណ្ឌិតយល់ថា នេះជាវិធានការដ៏មានសារសំខាន់ក្នុងការរក្សាតុល្យភាពតម្លៃប្រាក់រៀលនិងប្រាក់ដុល្លារអាមេរិក។ លើសពីនេះ វានឹងធ្វើឲ្យប្រាក់រៀលកាន់តែមានតម្លៃដែលអាចរក្សាស្ថិរភាពសេដ្ឋកិច្ច និងធ្វើឲ្យអ្នករកស៊ីមានទំនុកចិត្តកាន់តែខ្ពស់លើរូបិយវត្ថុកម្ពុជា។
ជាមួយគ្នានេះ លោក ផល វ៉ាន់ឌី ប្រធានសមាគមមីក្រូហិរញ្ញវត្ថុកម្ពុជាយល់ឃើញថា ការដាក់ចេញវិធានការដេញថ្លៃប្រាក់ដុល្លារអាមេរិករបស់ធនាគារជាតិ មិនត្រឹមតែជួយធ្វើឲ្យមានតុល្យភាពតម្លៃប្រាក់រៀល និងប្រាក់ដុល្លារអាមេរិក និងរក្សាតម្លៃអត្រាប្តូរប្រាក់នៅកម្ពុជាប៉ុណ្ណោះទេ តែវាជាការឆ្លើយតបដ៏សំខាន់ក្នុងការរក្សាស្ថិរភាពសេដ្ឋកិច្ចក្នុងបរិបទកម្ពុជាកំពុងរងផលប៉ះពាល់ដោយសារកូវីដ-១៩ ទៀតផង។ លោកបន្ថែមថា ការដាក់ចេញវិធានរបស់ធនាគារជាតិនេះ វានឹងធ្វើឲ្យតម្លៃប្រាក់រៀលដែលកំពុងមានទីផ្សារល្អ កាន់តែល្អប្រសើរមួយកម្រិតទៀត។
គួរបញ្ជាក់ថា
ធនាគារជាតិ នៃកម្ពុជាបានដាក់ចេញវិធានការប្រមូលប្រាក់រៀល
តាមរយៈការបញ្ចេញប្រាក់ដុល្លារអាមេរិកដាក់ឲ្យគ្រឹះស្ថានធនាគារ
មីក្រូហិរញ្ញវត្ថុ និងអាជីវកររកស៊ីប្តូរប្រាក់ដែលមានលិខិតអនុញ្ញាតត្រឹមត្រូវដេញថ្លៃជាបន្តបន្ទាប់។
សូមបញ្ជាក់ថា កាលពីថ្ងៃទី ១៦ ខែកញ្ញាធនាគារជាតិបានប្រកាសថា
នឹងធ្វើការដាក់ឲ្យដេញថ្លៃប្រាក់ដុល្លារចំនួន១០០លានដុល្លារអាមេរិក
សម្រាប់ខែកញ្ញានេះ ខណៈដែលកន្លងមកនេះ ធនាគារជាតិបានបញ្ចេញប្រាក់ដុល្លារសម្រាប់ការដេញថ្លៃជាបន្ដបន្ទាប់
ហើយនៅថ្ងៃទី ២៣ ខែកញ្ញានឹងបន្ដបញ្ចេញទឹកប្រាក់
៤០លានដុល្លារអាមេរិកបន្ថែមទៀត។
បច្ចុប្បន្នអត្រាប្តូរប្រាក់១ដុល្លារអាមេរិកមានតម្លៃក្នុងរង្វង់៤.១០០រៀល៕
None
