ប៉ុន្ដែ គេសង្កេតឃើញថា នៅមានក្រុមហ៊ុនបរទេសគ្រាក់ៗជិត៥០ផ្សេងទៀត ដែលស្ថិតក្នុងចំណោមក្រុមហ៊ុនធំៗលំដាប់ពិភពលោកចំនួន២០០ គឺនៅតែមិនព្រមដកខ្លួនចេញពីទីផ្សាររុស្ស៊ីនៅឡើយទេ ខណៈដែលរដ្ឋាភិបាលទីក្រុងម៉ូស្គូនាពេលនេះ កំពុងព្យាយាមកម្លាយសិទ្ធិកាន់កាប់ក្រុមហ៊ុនទាំងនេះ ឲ្យមកស្ថិតនៅក្រោមការគ្រប់គ្រងដោយរដ្ឋរុស្ស៊ីវិញ។ នេះបើតាមការចុះផ្សាយដោយកាសែត The Fortune។
បើយោងតាមការស្រាវជ្រាវពីសលកវិទ្យាល័យ (Yale) ដ៏ល្បីរបស់ពិភពលោក បានមើលឃើញថា ក្រុមហ៊ុនលោកខាងលិចមកពីសហរដ្ឋអាមេរិក និងអឺរ៉ុប ភាគច្រើនសុទ្ធតែបានដកខ្លួនចេញពីទីផ្សាររុស្ស៊ី ដែលរួមមានធនាគារ (Citibank) និង (Goldman Sachs) ហ៊ាងម៉ាកសម្លៀកបំពាក់ដូចជា (Burberry) និង (Adidas) និងក្រុមហ៊ុនបច្ចេកវិទ្យាយក្សធំៗដូចជា IBM, Intel, Snap និង Twitterជាដើម។
ទោះជាយ៉ាងណា មិនមែនក្រុមហ៊ុនយក្សធំៗរបស់ពិភពលោកទាំងអស់សុទ្ធតែបានដកខ្លួនចេញពីប្រទេសរុស្សីនោះទេ ដែលក្នុងចំណោមក្រុមហ៊ុនលំដាប់ពិភពលោក ២០០ ក្រុមហ៊ុន យ៉ាងហោចណាស់នៅមាន ៤៧ ក្រុមហ៊ុនទៀត នៅតែធ្វើបន្ដអាជីវកម្មជាមួយរុស្សីដូចធម្មតា បើទោះបីជាមានការដាក់ទណ្ឌកម្មពីប្រទេសលោកខាងលិចក្តី ព្រោះគេមើលឃើញថា ការថកខ្លួននោះនឹងទទួលរងផលវិបាកយ៉ាងខ្លាំង។
ក្នុងនោះដែរ ក្រុមហ៊ុនផ្សេងទៀត រួមទាំងក្រុមហ៊ុនជាច្រើនមកពីប្រទេសជប៉ុន និងចិន នៅតែមានវត្តមាននៅលើទីផ្សាររុស្ស៊ី។ ត្បិតថា ប្រទេសជប៉ុនបានថ្កោលទោសពីសង្គ្រាមរបស់ទីក្រុងម៉ូស្គូលើអ៊ុយក្រែនមែន តែប្រទេសដែលក្សត់ធនធានមួយនេះ នៅតែបន្តភាពជាដៃគូប្រេង និងឧស្ម័នជាមួយវិមានក្រឹមឡាំង។
លើសពីនេះ ក្រុមហ៊ុនសាងសង់ផ្លូវដែក និងទូរគមនាគមន៍ដែលគ្រប់គ្រងដោយរដ្ឋរបស់ចិន រួមជាមួយនឹងក្រុមហ៊ុនបច្ចេកវិទ្យាឯកជន និងក្រុមហ៊ុនឧស្សាហកម្មធុនធ្ងន់ផ្សេងៗទៀត ក៏នៅតែដំណើរការដូចធម្មតានៅក្នុងប្រទេសរុស្សីដែរ បើទោះបីជាពួកគេមិនយូរមិនឆាប់គង់តែរងនូវការដាក់ទណ្ឌកម្មពីប្រទេសបច្ចឹមលោកក៏ដោយ។
អត្ថបទគួរអាន
កាលពីថ្ងៃទី១ ខែកក្កដាកន្លងទៅ លោក ពូទីន បានចុះហត្ថលេខាលើក្រឹត្យមួយ ដែលអនុញ្ញាតឲ្យរដ្ឋាភិបាលរុស្សីរឹបអូសគម្រោងប្រេង និងឧស្ម័នធម្មជាតិ Sakhalin-2 ផងដែរ ដែលមានការវិនិយោគដោយបរទេសជាមួយក្រុមហ៊ុនក្នុងស្រុក។
បញ្ជារបស់វិមានក្រឹមឡាំងនេះ បានផ្តល់ការគ្រប់គ្រងគម្រោង Sakhalin-2 ដល់ក្រុមហ៊ុនថ្មី ដែលបង្កើតដោយរដ្ឋ ដែលអាចដកហូតសិទ្ធិវិនិយោគិនបរទេស ប្រសិនបើខ្លួនចង់ ដែលនេះជាទង្វើដ៏បង្ខំបំផុតមួយដោយរដ្ឋាភិបាលក្នុងការឆ្លើយតបទៅនឹងការចាកចេញរបស់ក្រុមហ៊ុនរកស៊ីធំៗតែម្តង។
លោកម៉ាក ដីហ្សុន (Mark Dixon) ស្ថាបនិកទីភ្នាក់ងារវាយតម្លៃសីលធម៌ ដែលជាអង្គការស្រាវជ្រាវផ្តោតលើក្រុមហ៊ុនបរទេសក្នុងប្រទេសរុស្ស៊ី បានបកស្រាយនៅក្នុងក្រិត្យនេះថា ប្រទេសរុស្ស៊ីមិនត្រឹមតែមានឆន្ទៈក្នុងការដកហូតទ្រព្យសម្បត្តិបរទេសប៉ុណ្ណោះទេ ប៉ុន្តែថែមទាំងចូលរួមក្នុង «ការដកហូតលាយលំនឹងការគំរាមគំហែង»។
គួររំលឹកត្រួសៗថា វិនិយោគិនអ៊ឺរ៉ុប ជប៉ុន និងចិននៅក្នុងគម្រោងថាមពលសរុបរបស់រុស្ស៊ីបានបង្ហាញពីការរួមចំណែកធំ ដែលភាគហ៊ុនជិត ២០% របស់ក្រុមហ៊ុនប្រេងឥន្ធនៈ BP នៅក្នុងក្រុមហ៊ុនប្រេងរដ្ឋរុស្សី (Rosneft) មានតម្លៃជាង ១១ ពាន់លានដុល្លារ ខណៈការវិនិយោគរបស់ក្រុមហ៊ុនបារាំង TotalEnergies នៅរុស្ស៊ីមានដល់ទៅ ១៤ ពាន់លានដុល្លារឯណោះ។
ទោះជាបែបនេះក្តី តាមការស្រាវជ្រាវលើក្រុមហ៊ុនដែលបានចាកចេញពីប្រទេសរុស្ស៊ី លោកចេហ្វ្រី សុននេនហ្វេល (Jeffrey Sonnenfeld) ដែលជាសាស្ត្រាចារ្យជាន់ខ្ពស់ និងអ្នកស្រាវជ្រាវនៅសាកលវិទ្យាល័យយេល (Yale) បានប្រាប់កាសែត Fortune ថា៖ «ការធ្វើជាតូបនីយកម្ម ឬហៅថាការផ្ទេរសិទ្ធិកាន់កាប់ក្រុមហ៊ុនបរទេសឲ្យមកស្ថិតក្រោមការគ្រប់គ្រងដោយក្រុមហ៊ុនរដ្ឋរបស់រុស្ស៊ី នាពេលថ្មីៗ បានគូសបញ្ជាក់យ៉ាងច្បាស់ក្រឡែតថា ប្រទេសរុស្សីនឹងក្លាយជាប្រទេស ដែលមិនអាចវិនិយោគបានតទៅទៀតឡើយ»។
លោកបានសង្កត់ធ្ងន់ថា៖ «ទង្វើទាំងអស់នោះ គឺគ្មានការជួយគាំទ្រដល់ក្រុមហ៊ុន ដែលកំពុងធ្វើអាជីវកម្មសោះឡើយ ហើយវានឹងបាត់បង់បន្តើរៗនូវ ការគ្រប់គ្រងប្រតិបត្តិការ បុគ្គលិក ម៉ាកយីហោរ និងការគ្រប់គ្រងកេរ្តិ៍ឈ្មោះជាដើម»៕
