តើមានកត្តាអ្វីខ្លះទាញទម្លាក់តម្លៃត្រីចិញ្ចឹមក្នុងស្រុកឱ្យធ្លាក់ចុះនៅដើមឆ្នាំនេះ?
មន្ត្រីជាន់ខ្ពស់នៃសមាគមវារីវប្បករនៅកម្ពុជា បានគូសបញ្ជាក់ថា តម្លៃត្រីចិញ្ចឹមនៅកម្ពុជា បានធ្លាក់ចុះគួរឱ្យកត់សម្គាល់នៅមួយរយៈចុងក្រោយនេះ បើទោះ…
ជាមួយគ្នានេះ អ្នកនាំពាក្យក្រសួងពាណិជ្ជកម្ម បានគូសបញ្ជាក់ថា ក្រសួងពាណិជ្ជកម្ម មិនបានព្រងើយកន្តើយលើបញ្ហានេះទេ ពោលគឺក្រសួងរួមជាមួយភាគីពាក់ព័ន្ធបានជួបចរចាជាមួយភាគីថៃ ជាច្រើនលើកមកហើយដែរ។ សម្រាប់ក្រសួងពាណិជ្ជកម្ម មានតែការចរចាប៉ុណ្ណោះទើបអាចដោះស្រាយបញ្ហានេះបាន ព្រោះកិច្ចព្រមព្រៀងដឹកជញ្ជូនទំនិញឆ្លងកាត់រវាងប្រទេសទាំងពីរមានការកំណត់លក្ខខណ្ឌផ្សេងៗគ្នា។
ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានប្រាប់សារព័ត៌មាន ខេមបូណូមីស ថា មកទល់ពេលនេះ ដំណើរការពិភាក្សាជាច្រើនលើកក្នុងការស្វែងរកដំណោះស្រាយលើការដឹកជញ្ជូនទំនិញរបស់កម្ពុជា ទៅកាន់ប្រទេសទី៣ ដោយឆ្លងកាត់ប្រទេសថៃ នៅពុំទាន់មានលទ្ធផលគួរឱ្យកត់សម្គាល់នោះទេ។ ប៉ុន្តែអ្នកជំនាញរូបនេះអះអាងថា ក្រុមការងារពាក់ព័ន្ធកំពុងរៀបចំសំណើដាក់ទៅកាន់រដ្ឋមន្រ្តីក្រសួងពាណិជ្ជកម្ម ឱ្យរៀបចំការពិភាក្សាជាថ្មីទៀត ដើម្បីមានលទ្ធភាពយកទៅស្វែងរកដំណោះស្រាយជាមួយអ្នកពាក់ព័ន្ធរបស់ប្រទេសថៃ។ បើតាមការអះអាងរបស់ថ្នាក់ដឹកនាំរូបនេះ កម្ពុជា ស្ថិតក្នុងចំណោមបណ្ដាប្រទេសនៅក្នុងតំបន់ ដែលមានសិទ្ធិដឹកជញ្ជូនទំនិញឆ្លងកាត់ប្រទេសទី២ ទៅកាន់ប្រទេសទី៣ ប៉ុន្តែត្រូវបានប្រទេសជិតខាងមិនគោរពច្បាប់ ហើយយកប្រៀបមកលើកម្ពុជា តាមរយៈការដឹកជញ្ជូនទំនិញឆ្លងកាត់កម្ពុជា តែផ្ទុយទៅវិញការដឹកជញ្ជូនទំនិញឆ្លងកាត់របស់កម្ពុជា ពុំត្រូវបានប្រទេសជិតខាងអនុញ្ញាតឡើយ ដោយគេបានយកករណីនានា មកបង្អាក់ធ្វើឱ្យមានការរាំងស្ទះ។
ជាការកត់សម្គាល់របស់ឧកញ៉ា តែ តាំងប៉ ទំនិញរបស់ថៃ ត្រូវបានគេដឹកចូលមកកម្ពុជា ជាហូរហែ ប៉ុន្តែទំនិញរបស់កម្ពុជាវិញត្រូវបានគេរារាំង។ ការណ៍នេះត្រូវបានអ្នកជំនាញរូបនេះលើកឡើងថា កម្ពុជាមិនត្រូវធ្វើព្រងើយកន្តើយឡើយ ហើយក៏មិនគួរបន្ទោសខ្លួនឯងជាប្រទេសទន់ខ្សោយដែរ។ ផ្ទុយទៅវិញត្រូវរួមគ្នាដោះស្រាយ និងជំរុញការកែច្នៃសម្រាប់នាំចេញ។
ពាក់ព័ន្ធបញ្ហានេះដែរ ឯកឧត្តម ប៉ែន សុវិជាតិ រដ្ឋលេខាធិការនិងជាអ្នកនាំពាក្យក្រសួងពាណិជ្ជកម្ម បានគូសបញ្ជាក់ថា ដើម្បីអាចដោះស្រាយលើបញ្ហាពាក់ព័ន្ធការរឹតបន្តឹងលើការនាំចេញទំនិញឆ្លងកាត់នេះ មានតែការសម្របសម្រួល និងចរចាគ្នាប៉ុណ្ណោះ ដ្បិតថា កិច្ចព្រមព្រៀងដឹកជញ្ជូនទំនិញឆ្លងកាត់រវាងប្រទេសទាំងពីរមានការកំណត់លក្ខខណ្ឌផ្សេងៗគ្នា។ បើតាមការអះអាងរបស់អ្នកនាំពាក្យរូបនេះ កន្លងមកក្រសួងពាណិជ្ជកម្មធ្លាប់សម្របសម្រួលជាមួយភាគីថៃ ជូនដល់ធុរជនកម្ពុជា នៅតាមបណ្ដាខេត្តមួយចំនួនជាប់ព្រំដែនថៃ ក្នុងការនាំចេញទំនិញឆ្លងកាត់ព្រំដែនផងដែរ។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា ជឿជាក់ថា ប្រសិនបើកម្ពុជា អាចនាំចេញទំនិញឆ្លងប្រទេសជិតខាងទៅកាន់ប្រទេសទី៣បាន វានឹងជួយធ្វើឱ្យតម្លៃទំនិញរបស់កម្ពុជា កាន់តែមានភាពប្រកួតប្រជែង ខណៈខេត្តចំនួន៦របស់កម្ពុជា ដែលជាប់ព្រំប្រទល់ជាមួយប្រទេសថៃ គឺសុទ្ធសឹងជាខេត្តដែលមានសក្តានុពលខ្ពស់ក្នុងការផលិតកសិផល ហើយអ្នករកស៊ីក្នុងវិស័យនេះភាគច្រើនបានត្អូញត្អែរពីបញ្ហាលំបាកក្នុងការដឹកជញ្ជូនកសិផលឆ្លងកាត់ប្រទេសថៃ៕
អត្ថបទ៖ បូ ដូឡា
