លោក Paul Lim អគ្គនាយកក្រុមហ៊ុន Pestech បានបញ្ជាក់ឲ្យដឹងថា ក្រុមហ៊ុន Pestech នៅកម្ពុជា គ្រោងនឹងចុះបញ្ជីនៅលើផ្សារមូលបត្រកម្ពុជា នៅក្នុងឆ្នាំ ២០២០នេះ ដោយរំពឹងនឹងមានតម្លៃមូលធននីយកម្មទីផ្សារ ប្រមាណ ៦០លានដុល្លារអាមេរិក ហើយអាចនឹងប្រមូលដើមទុនប្រមាណ ១០លានដុល្លារអាមេរិក ពីទីផ្សារមូលបត្រកម្ពុជា។
ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជា បានបញ្ជាក់ឲ្យដឹងថា បច្ចុប្បន្នក្រុមហ៊ុន Pestech កំពុងតែទាក់ទាញ វិនិយោគិនយុទ្ធសាស្ត្រ ដើម្បីទិញភាគហ៊ុនរបស់ខ្លួន និងកំពុងធ្វើការជាមួយនឹង គណៈកម្មការមូលបត្រកម្ពុជា ដោយរំពឹងនឹងបញ្ចប់នីតិវិធី ក្នុងពេលឆាប់ៗខាងមុខ។
ឯកឧត្តមបន្តថា ផ្សារមូលបត្រកម្ពុជាស្វាគមន៍ និងតែងតែចង់បានការចូលរួមចុះបញ្ជីពី តំណាងមកពីគ្រប់វិស័យ ជាពិសេស វិស័យផលិតកម្ម ដែលតំណាងឲ្យសេដ្ឋកិច្ចប្រទេសកម្ពុជា តួយ៉ាង ក្រុមហ៊ុន Pestech មកពី វិស័យថាមពលអគ្គិសនី ដែលប្លែកពី វិស័យមុនៗ ក៏រំពឹងទទួលបានការចាប់អារម្មណ៍ពី សាធារណជនផងដែរ។
អត្ថបទគួរអាន
ដោយឡែក ចំពោះការចុះបញ្ជីនេះ លោក Paul Lim អគ្គនាយកក្រុមហ៊ុន Pestech បានបញ្ជាក់ថា វាត្រូវការពេលវេលាបន្តិច សម្រាប់ Pestech ដើម្បីទាក់ទាញវិនិយោគិនយុទ្ធសាស្ត្រ មកចូលរួមបង្កើនតម្លៃបន្ថែមឲ្យ ដំណើរការអាជីវកម្មនៅក្នុងប្រទេសកម្ពុជា ព្រោះវាប្រសើរជាង ប្រភេទវិនិយោគិនបែបហិរញ្ញវត្ថុសាមញ្ញៗ ហើយយ៉ាងណា ក្រុមហ៊ុនគ្រោងនឹងចុះបញ្ជី នៅពាក់កណ្តាលឆ្នាំនេះ។
លោក Paul Lim បន្តថា គោលដៅនៃការចុះបញ្ជីនៅលើផ្សារមូលបត្រនេះ គឺមិនត្រឹមតែប្រមូលដើមទុននោះទេ ពោលគឺ លើកកម្ពស់កិត្តិនាមនៃក្រុមហ៊ុន Pestech Cambodia ដែលកំពុងតែដំណើរការលើ ការងារវិស្វកម្ម លទ្ធកម្ម និងសំណង់នៅក្នុងប្រទេសកម្ពុជា មីយ៉ាន់ម៉ា និងវៀតណាម។
ក្រុមហ៊ុននេះ ក៏បានបញ្ជាក់ពី បំណងរក្សាភាគហ៊ុន ៨០% នៅក្នុងចំណែកក្រុមហ៊ុន Pestech Cambodia ក្រោយបញ្ចប់ការចុះបញ្ជី ពោលគឺ ចំណែក ២០% សម្រាប់លក់ដល់ វិនិយោគិនយុទ្ធសាស្ត្រ និងសាធារណជន។
គួរជម្រាបដែរថា គិតមកទល់ពេល ផ្សារមូលបត្រកម្ពុជា ទទួលបានក្រុមហ៊ុនចុះបញ្ជីលក់ភាគហ៊ុនចំនួន ៥ក្រុមហ៊ុនហើយ ដោយធនាគារអេស៊ីលីដា អាចនឹងក្លាយជា ក្រុមហ៊ុនចុះបញ្ជីលក់ភាគហ៊ុន ក្នុងពេលឆាប់ៗខាងមុខនេះ៕
None
