លោក លឹម សុផា ជាប្រធានសហជីពកម្មករ និងជាបុគ្គលិក ដែលបម្រើការងារនៅភូមិវប្បធម៌កម្ពុជាអស់រយៈពេលជាង១៧ឆ្នាំមកហើយនោះ បានប្រាប់សារព័ត៌មាន ខេបូណូមីសតាមទូរស័ព្ទថា បច្ចុប្បន្ន លោក និងបុគ្គលិកជាង៦០នាក់ទៀត កំពុងតែធ្វើការតវ៉ា តែមិនមែនតវ៉ាដោយសារភូមិវប្បធម៌បិទនោះទេ តែបុគ្គលិក ជាង៦០នាក់នេះ បានតវ៉ាតាំងពីមុនក្រុមហ៊ុន ប្រកាសបិទទៅទៀត ដើម្បីទាមទារ៣ចំណុចពីខាងក្រុមហ៊ុន ខណៈដែលបុគ្គលិកជិត២៥០នាក់ទៀតនៅបន្តធ្វើការជាធម្មតា។
លោក លឹម សុផា បានបញ្ជាក់ថា ៖« លក្ខខណ្ឌ៣ ដែលបុគ្គលិកជាង៦០នាក់ទាមទារកាលពីមុននោះគឺ ទី១ឲ្យក្រុមហ៊ុនចូលចចារអនុសញ្ញារួមដោយស្មោះត្រង់ជាមួយកម្មករនិយោជិត ទី២ថែរក្សាការិយាល័យផ្នែកសិល្បៈនិងតួនាទីអ្នកបម្រើការងារនៅទីនោះគឺនៅដដែល ទី៣ស្នើឲ្យក្រុមហ៊ុនសងប្រាក់ឈ្នួល និងប្រាក់ថ្លៃអាហារដែលក្រុមហ៊ុនបានកាត់កន្លងមក ប៉ុន្តែឥឡូវ ដល់ពេលក្រុមហ៊ុនថាបិទដំណើរការអ៊ីចឹង គឺមានន័យថា មិនមានអ្វីត្រូវតវ៉ាទៀតទេ តែយើងរង់ចាំមើលដំណោះស្រាយនៃការទូទាត់សំណង ដែលគេបានថា នឹងធ្វើតាមច្បាប់ការងារហ្នឹងសិន»។
អត្ថបទទាក់ទង
ក្រោយទទួលបានសេចក្តីជូនដំណឹងពីការបិទភូមិវប្បធម៌កម្ពុជានេះ លោក លឹម សុផា អះអាងថា រូបលោកផ្ទាល់ក៏ដូចជា បុគ្គលិកជាង៣០០នាក់ទៀត មានការសោកស្តាយដែរ និងមិនទាន់ដឹងថាត្រូវដោះស្រាយបែបណានោះទេ ព្រោះក្រុមហ៊ុនបុគ្គលិកទើបតែទទួលបានលិខិតជូនដំណឹងកាលពីល្ងាចថ្ងៃទី១១ តុលានេះ។
លោក លឹម សុផា បានបន្ថែមថា ៖«ទាក់ទងនឹងការប៉ះពាល់គឺប៉ះពាល់ហើយ ទី១គឺបងប្អូនដែលបម្រើការនៅទីនេះ(ភូមិវប្បធម៌)តែម្តងគឺគាត់នឹងបាត់បង់ការងារ ទី២គឺទាក់ទងនឹងភូមិវប្បធម៌ជាចំណាត់លេខ១នៅស្រុកខ្មែរ បែជាមានការបិទ ហើយសំខាន់ភ្ញៀងទេសចរដែលធ្លាប់ស្គាល់ និង មកទស្សនាភូមិវប្បធម៌ នឹងមានការសោកស្តាយដូចគ្នា ហើយពេលនេះ យើងកំពុងរង់ចាំមើលសិន ថាតើក្រុមហ៊ុននឹងដោះស្រាយឲ្យពួកយើងដោយរបៀបណា»។
បុគ្គលិកនៅភូមិវប្បធម៌កម្ពុជា លោក គង់ ប៊ុនថា ដែលបានបម្រើការងារនៅការិយាល័យសិល្បៈនៃភូមិវប្បធម៌អស់រយៈពេលជាង១៧ឆ្នាំមកហើយ ដោយទទួលបានប្រាក់បៀវត្សរ៍ ជិត៤០០ដុល្លារ។ លោកបានប្រាប់សារព័ត៌មានខេមបូណូមីសថា លោកមិនទាន់បានដឹងច្បាស់ថា តើនៅពេលក្រុមហ៊ុនភូមិវប្បធម៌កម្ពុជាបិទទៅ លោកក៏ដូចជាកម្មករនិយោជិតដទៃទៀត នឹងទទួលបានសំណងអ្វីខ្លះទេ។
លោក គង់ ប៊ុនថា បានឲ្យដឹងថា៖«ការព្រួយបារម្ភរបស់ខ្ញុំមានខ្លះដែរ ពាក់ព័ន្ធនឹង ថាតើពេលដែលគាត់បិទអាជីវកម្មហើយ ក្រុមហ៊ុនហ្នឹងអាចអនុវត្តតាមនីតិវិធីច្បាប់ស្តីពីការងារទេ ហើយពីមានលក្ខខណ្ឌសំណងត្រឹមត្រូវដល់កម្មករនិយោជិតទាំងអស់គ្នា ឬអត់ និយាយរួម គាត់ជូនដំណឹងលឿនពេក ដល់អ៊ីចឹងកម្មករត្រូវចំណាយពេលស្វែងរកការងារថ្មីចំណាយយូរណាស់ ម៉េចក៏ត្រូវជូនដំណឹងគេមុន៣ខែ ដើម្បីឲ្យគេងាយស្រួលរកការងារធ្វើ»។
ជាមួយគ្នានេះ បុគ្គលិកនៅភូមិវប្បធម៌កម្ពុជាម្នាក់ទៀតឈ្មោះ ស្រីភក្ត្រ ជាអ្នកភ្នំពេញ និងបានធ្វើការនៅភូមិវប្បធម៌នេះ ជាង១៧ឆ្នាំដែរនោះ បានប្រាប់សារព័ត៌មាន ខេមបូណូមីស ដែរថា បើភូមិវប្បធម៌បិទក្នុងពេលឆាប់នេះមែន គាត់លែងស្វែងរកការងារអ្វីធ្វើទៀតហើយ នឹងទៅរកស៊ីវិញម្តង។
កញ្ញា ស្រីភក្ត្រ បានលើកឡើងថា៖«វាជារឿងគួរឲ្យសោកស្តាកស្តាយដែរ ដោយសារការបិទនេះវារហ័សពេក ហើយពួកខ្ញុំក៏មិនបានត្រៀមចិត្តដែរ មើលទៅខ្ញុំមានតែទៅរកស៊ីវិញលែងធ្វើការហើយ តែយ៉ាងណាមិញ ខ្ញុំសំណូមពរដល់ក្រសួងពាក់ព័ន្ធ សូមជួយដោះស្រាយដល់យើងខ្ញុំទាំងអស់គ្នា ធ្វើយ៉ាងណាឲ្យក្រុមហ៊ុនផ្តល់សំណងឲ្យបានត្រឹមត្រូវផង»។
ក្រុមការងារខេមបូណូមីស បានទំនាក់ទំនងទៅកាន់អ្នកគ្រប់គ្រងក្រុមហ៊ុនភូមិវប្បធម៌កម្ពុជា គឺអ្នកនាង សុភក្ត្រនៅព្រឹកថ្ងៃទី១២ ខែតុលានេះដែរ ត្រូវបានគាត់អះអាងថា កំពុងជួបប្រជុំជាមួយនឹងមន្ទីរការងារខេត្តសៀមរាប មិនទាន់អាចផ្តល់ព័ត៌មានអ្វីបានទាំងអស់ ហើយក៏មិនដឹងប្រជុំពេលណាចប់ដែរ។ ក្រោយមកក្រុមការងារយើងបានទាក់ទងទៅម្តងនៅម៉ោងជិត១២ថ្ងៃត្រង់ តែគ្មានអ្នកទទួល។
សូមជម្រាបថា ក្រុមហ៊ុនភូមិវប្បធម៌កម្ពុជា ស្ថិតនៅក្នុងទឹកដីខេត្តសៀមរាប ជារបស់មហាសេដ្ឋីស្រុកខ្មែរ ពុង ឃាវ សែ ដែលត្រូវបានគេស្គាល់ថា ជាអ្នកជំនួញរកស៊ី ពហុវិស័យនៅកម្ពុជា ជាពិសេសការកសាងទីក្រុងរណប ។ ក្រុមហ៊ុនភូមិវប្បធម៌កម្ពុជានេះ បានចាប់ផ្តើមកសាងឡើងនៅអំឡុងឆ្នាំ២០០០ និងបានដាក់ឲ្យដំណើការនៅក្នុងឆ្នាំ២០០៣ ដែលគិតមកទល់នឹងពេលនេះ មានរយៈពេលជាងជិត២ទសវត្សហើយ។
តែជារឿងដ៏គួរឲ្យសោកស្តាយ ភូមិវប្បធម៌កម្ពុជា ដែលជាមជ្ឈមណ្ឌលវប្បធម៌គ្រប់សម័យកាល ដ៏សម្បូរបែបនិងមានតែមួយនៅស្រុកខ្មែរនេះ នឹងត្រូវបិទទ្វារនៅថ្ងៃទី០៧ ខែវិច្ឆកា ខាងមុខនេះហើយ ដោយសារខាងគណៈគ្រប់គ្រងរបស់ក្រុមហ៊ុនភូមិវប្បធម៌កម្ពុជានេះ អះអាងថា ជួបវិបត្តិហិរញ្ញវត្ថុធ្ងន់ធ្ងរដោយសារកូវីដ-១៩៕
None
