បន្ទាប់ពីបានចុះទៅពិនិត្យមើលដោយផ្ទាល់នៅកសិដ្ឋានកូនចៀមធម្មជាតិ នៅខេត្តកំពង់ឆ្នាំហើយ លោក យន់ សេរី ដែលជំនួយការផ្ទាល់ឯកឧត្តមឧកញ៉ាបណ្ឌិត ម៉ុង ឫទ្ធី បានបញ្ជាក់ថា នាពេលនេះក្រុមការងាររបស់លោក បាននិងកំពុងរៀបចំ ទីតាំងរោងចិញ្ចឹមសត្វចៀមបានប្រមាណជា៦០% សម្រាប់ចៀមទាំង១០០ក្បាលនេះ។
លោកបានបន្ថែមថា «បាទ នៅទីនេះ ជាតំបន់កសិទេសចរណ៍ ដែលជាតំបន់ទេសចរណ៍ផង ហើយពោរពេញដោយកសិកម្ម អញ្ចឹងមានដំណាំ មានសត្វ ល និង ល។ ចំណែកចៀម ដែលយើងទិញមកនេះ គឺគោលបំណងយើង ចង់បង្រៀនកសិករដែលនៅតំបន់ជាប់នឹងតំបន់អភិវឌ្ឍន៍យើងហ្នឹង ដើម្បីលោកដឹងថា ការចិញ្ចឹមចៀមនេះ របៀបម៉េច ពេលណាគាត់ចូលមកទស្សនាតំបន់កសិទេសចរណ៍របស់យើង នឹងបានឃើញមានពពែ មានចៀម មានជ្រូក មានសត្វផ្សេងៗទៀត ដូចជាត្រី ដូចជាមាន់អញ្ចឹង ដែលគាត់អាចយល់ដឹងបាន»។
អត្ថបទទាក់ទង!
ចំណែកម្ចាស់កសិដ្ឋានកូនចៀមធម្មជាតិ លោក ប៊ុន ចាន់វីរៈ បានប្រាប់ខេមបូណូមីស តាមទូរស័ព្ទថា ចាប់តាំងពីផ្សព្វផ្សាយវីដេអូរបស់លោករហូតមកទល់នឹងពេលនេះ មានការបញ្ជាទិញកូនចៀមរបស់លោកជាបន្តបន្ទាប់ ដោយលោកបានធ្វើការលក់ចេញប្រមាណជាង ១៦០ក្បាលហើយ។
«ក្រៅពីលោកឧកញ៉ាបណ្ឌិត ម៉ុង ឫទ្ធីបានទាក់ទងមកយើងខ្ញុំដើម្បីទិញចៀម១០០ក្បាលយកទៅចិញ្ចឹមហើយ ក៏បានកសិករនៅតាមបណ្តាខេត្តផ្សេងទៀត បានទាក់ទងមកដែរ មានខ្លះទៅទិញ១០ក្បាល ខ្លះ២០ក្បាល ដើម្បីយកទៅសាកចិញ្ចឹម តែដោយសារខ្ញុំមិនទាន់មានចៀមច្រើន ដើម្បីបំពេញតម្រូវការពួកគាត់ ខ្ញុំក៏បានទាក់ទងទៅកាន់អ្នកចិញ្ចឹមចៀមដទៃទៀត ដើម្បីទិញចៀមឲ្យពួកគាត់ ខ្ញុំពិតជាសប្បាយចិត្តមែនទែន ដែលឃើញកសិករយើងចាប់អារម្មណ៍ច្រើនក្នុងការចិញ្ចឹមចៀមនេះ ហើយខ្ញុំរីករាយនឹងផ្តល់យោបល់ផ្សេងៗទាក់ទងនឹងការចិញ្ចឹមនេះ»។
លោក ប៊ុន ចាន់វីរៈ ម្ចាស់កសិដ្ឋានកូនចៀមធម្មជាតិ
បច្ចុប្បន្ន កសិដ្ឋានកូនចៀមធម្មជាតិបានបង្កើនការចិញ្ចឹមចៀមរហូតដល់២៥០ក្បាលហើយ ខណៈដែល៣ឆ្នាំមុនមានត្រឹមតែ២ក្បាលប៉ុណ្ណោះ។ ក្រៅការចិញ្ចឹមចៀមហើយ ម្ចាស់កសិដ្ឋានវ័យក្មេងរូបនេះ មានចិញ្ចឹមសត្វផ្សេងៗទៀត ដែលប្លែកៗកម្រនឹងមានចិញ្ចឹមនៅកម្ពុជា ដូចជា ចិញ្ចឹមរុយ ជន្លេន ជាដើម។
យ៉ាងណាមិញ បើតាមការបញ្ជាក់ពីម្ចាស់កសិដ្ឋានកូនចៀមធម្មជាតិរូបនេះ នាពេលអនាគត លោកនឹងរៀបចំពង្រីកកសិដ្ឋានរបស់ឲ្យទៅជាកសិដ្ឋានខ្នាតធំជាង ដែលអាចចិញ្ចឹមចៀមដល់៣០០ក្បាល ឬលើសពីនេះ ថែមទាំងមានគម្រោងរៀបចំកសិដ្ឋានរបស់លោកទៅជារមណីយដ្ឋានទេសចរណ៍បែបកសិ-ទេសចរណ៍ថែមទៀតផង៕
None
