ទន្ទឹមគ្នានេះ សម្តេច បានប្រកាសផងដែរអំពី កាលបរិច្ឆេទបិទបញ្ចប់ការធ្វើចត្តាឡីស័ក សម្រាប់អ្នកជាប់ពាក់ព័ន្ធក្នុងព្រឹត្តិការណ៍ ៣វិច្ឆិកា ដោយក្នុងនោះ រាជធានីភ្នំពេញ និងខេត្តមួយចំនួនទៀតនឹងបិទបញ្ចប់នៅថ្ងៃទី ១៩ ខែវិច្ឆិកា ស្អែកនេះ។
សម្តេច ហ៊ុន សែន បានលើកឡើងថា ការប្រកាសបិទបញ្ចប់ការធ្វើចត្តាឡីស័កនេះបាន គឺនៅត្រង់ថា កម្ពុជាអាចគ្រប់គ្រងបានចំនួនមនុស្សរហូត ១.៨០២នាក់នៅតាមរាជធានី ខេត្តចំនួន១១ ដែលមានការពាក់ព័ន្ធការធ្វើតេស្ត និងការធ្វើចត្តាឡីស័កបានត្រឹមត្រូវរយៈពេល១៤ថ្ងៃ ហើយសម្តេច ក៏បានពិភាក្សាយ៉ាងហ្មត់ចត់ជាមួយរដ្ឋមន្ត្រី និងថ្នាក់ដឹកនាំនៃក្រសួងសុខាភិបាលផងដែរ។
សម្តេច ហ៊ុន សែន បានគូសបញ្ជាក់ទៀតថា «ចាប់ពីថ្ងៃស្អែក ១៩ វិច្ឆិកា ឆ្នាំ២០២០ ខ្ញុំនឹងចេញទៅធ្វើការ ឬហាត់ប្រាណនៅខាងក្រៅដូចមុនថ្ងៃទី៤វិច្ឆកាឡើងវិញ តែខ្ញុំនៅតែមិនទាន់ឲ្យកូននិងចៅរបស់ខ្ញុំមកផ្ទះរបស់ខ្ញុំមួយរយៈទៀត ដើម្បីធានាឲ្យប្រាកដថាខ្ញុំគ្មានមេរោគចម្លងទៅកូននិងចៅរបស់ខ្ញុំនោះឡើយ»។
អត្ថបទគួរអាន!
ការបិទបញ្ចប់ព្រឹត្តិការណ៍៣វិច្ឆិកា សំដៅឲ្យក្រសួងអប់រំ យុវជន និងកីឡា ក្រសួងការងារនិងបណ្តុះបណ្តាលវិជ្ជាជីវៈរៀបចំបើកសាលារៀន និងសាលាបណ្តុះបណ្តាលវិជ្ជាជីវៈឡើងវិញ
ព្រមទាំងធ្វើឱ្យសភាពការណ៍គ្រប់ផ្នែកគ្រប់វិស័យវិលទៅរកភាពប្រក្រតីដូចមុនថ្ងៃ៣វិច្ឆកាឡើងវិញ តែការប្រយុទ្ធជាមួយកូវីដ-១៩នៅតែជាអាទិភាពនៃការងាររបស់យើងទាំងអស់គ្នាដដែល។
បើតាមសម្តេច ហ៊ុន សែន ព្រឹត្តិការណ៍៣វិច្ឆិកានឹងត្រូវបិទបញ្ចប់ការធ្វើចត្តាឡីស័កតាមពេលវេលាដូចខាងក្រោមនេះ ៖
១.សម្រាប់ថ្ងៃ១៩ វិច្ឆិកា ២០២០ មានរាជធានីភ្នំពេញចំនួន១៥៦៩នាក់ (មានជនជាតិហុងគ្រីចំនួន៥នាក់) ដោយរាប់ទាំងអ្នកវិជ្ជមាន៤នាក់ ក្នុងនោះជាសះស្បើយ១នាក់ និង៣នាក់កំពុងព្យាបាលនៅមន្ទីរពេទ្យមិត្តភាពខ្មែរ-សូវៀត ដែលមានទាំងអគ្គរដ្ឋទូតហុងគ្រីម្នាក់ផង។ ខេត្តកណ្តាលចំនួន៦៧នាក់ ខេត្តពោធិសាត់ចំនួន៤០នាក់ ខេត្តព្រៃវែងចំនួន២៣ នាក់ ខេត្តកំពង់ធំចំនួន៣នាក់។
២.សម្រាប់ថ្ងៃ ២១វិច្ឆិកា២០២០ គឺខេត្តកំពង់ឆ្នាំងចំនួន១១នាក់។
៣.សម្រាប់ថ្ងៃ២៣វិច្ឆិកា មានខេត្តកែប ចំនួន ១៨នាក់ ខេត្តព្រះសីហនុចំនួន ៤០នាក់ ខេត្តកំពង់ចាមចំនួន ១នាក់។
៤.សម្រាប់ថ្ងៃ ២៥វិច្ឆិកា ២០២០មានខេត្ត ព្រះវិហារចំនួន២០នាក់ ខេត្តរតនគិរីចំនួន១០នាក់។
None
