នេះការលើកឡើង ពីសំណាក់លោក សាយ ពន្លឺចិត្តៈករុណា ម្ចាស់កសិដ្ឋាន និងសិប្បកម្មផលិតទឹកម្នាស់ ស្វីត រ៉ូយ៉ាល់ ផាយនេបផល(Sweet Royal Pineapple) ដែលមានទីតាំងនៅភូមិអូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង ជាប់ព្រំប្រទល់ក្រចេះស្ទឹងត្រែងខេត្តស្ទឹងត្រែង។
តាមរយៈការឆ្លងឆ្លើយសារជាសម្លេងជាមួយនឹងក្រុមការងារខេមបូណូមីស លោក សាយ ពន្លឺចិត្តៈករុណា បានប្រាប់ថា បច្ចុប្បន្ននេះខ្សែចង្វាក់ផលិតកម្មផលិតទឹកម្នាស់ទឹកឃ្មុំរបស់លោក បានផ្អាកដំណើរការហើយ ដោយសារតែម្នាស់ផ្លែមិនទាន់គ្រប់គ្រាន់សម្រាប់ការផលិត ព្រោះផ្ទៃដីដាំនៅមានកំណត់។
លោកបានមានប្រសាសន៍ថា៖«ឥឡូវនេះសិប្បកម្មអត់មានដំណើរការទេ យើងផ្អាកអស់ហើយ ទាល់តែមានម្នាស់ឡើងវិញ យើងដាំអត់បានវិលជុំ ព្រោះត្រូវការទុនធំបានទៅរួច ឥឡូវហ្នឹងអត់បានដាំវិលជុំទេ ទាល់តែវិលជុំ ទើបអាចផលិតបានរាល់ថ្ងៃដែរ អ៊ីចឹងយើងផ្អាកម៉ាស៊ីនប្រហែល៦ទៅ៧ខែឯណោះ»។
អត្ថបទទាក់ទង!
លោកបានបន្ថែមថា លោកបានខិតខំស្វះស្វែងរកដើមទុនដែរ ដោយកន្លងមកបានស្នើទៅខ្ចីធនាគារអភិវឌ្ឍន៍ជនបទ និងកសិកម្មផង ដើររកអ្នកវិនិយោគក្នុងស្រុកផង ដែលមិនទាន់ទទួលបានលទ្ធផលជាផ្លែផ្កានៅឡើយទេ។
លោកបានបញ្ជាក់ថា៖« ថ្ងៃមុនទៅពិភាក្សាហ្នឹង (ពិភាក្សាលើការបណ្ដាក់ទុន)នៅមិនទាន់ច្បាស់នៅឡើយទេ គ្រាន់តែគេថា គេចង់វិនិយោគដែរ តែគេចាំពិភាក្សាជាមួយដៃគូគេសិន ហើយចង់កម្ម៉ង់(បញ្ជាទិញ)ទឹកម្នាស់យើងហ្នឹងជាប្រចាំឆ្នាំ ដើម្បីលក់ក្នុងប្រទេសផង និងនាំចេញទៅក្រៅផង ប៉ុន្តែមិនទាន់បានចេញជាលទ្ធផលអ្វីនៅឡើយនោះទេ»។
បើតាមម្ចាស់កសិដ្ឋាន និងសិប្បកម្មស្វីតរ៉ូយ៉ាល់ផាយនេបផល(Sweet Royal Pineapple)រូបនេះ អះអាងថា ដើម្បីអាចបំពេញតម្រូវការទីផ្សារបានឲ្យទៀងទាត់ជាប្រចាំនោះ លោកត្រូវការដើមទុនប្រមាណពី ១លានដុល្លារ ទៅ១,៥លានដុលារ ដើម្បីរៀបចំជារោងចក្រផលិតទឹកម្នាស់ និងដាំម្នាស់នៅលើផ្ទៃដី២០ហិកតា ដែលអាចផលិតទឹកម្នាស់បានប្រមាណជា ២ម៉ឺនទៅ ៣ម៉ឺនដបក្នុងមួយថ្ងៃ ហើយអាចផលិតបានពេញមួយឆ្នាំតែម្តង។
លោក សាយ ពន្លឺចិត្តៈករុណា ម្ចាស់កសិដ្ឋាន និងសិប្បកម្មផលិតទឹកម្នាស់ ស្វីត រ៉ូយ៉ាល់ ផាយនេបផល(Sweet Royal Pineapple)
ប៉ុន្តែបច្ចុប្បន្ននេះ សិប្បកម្មរបស់អាចមានសមត្ថភាពផលិតទឹកម្នាស់បានត្រឹមតែប្រហែល១ពាន់ដបប៉ុណ្ណោះក្នុងមួយថ្ងៃ ដែលក្នុងមួយឆ្នាំ សិប្បកម្មអាចដំណើរការបានត្រឹមតែ៦ខែ ខណៈកសិដ្ឋានដាំម្នាស់ទឹកឃ្មុំមិនអាចផ្គត់ផ្គង់បានគ្រប់គ្រាន់នៅឡើយនោះទេ។
ម្យ៉ាងវិញទៀត នៅគ្រាដែលទឹកម្នាស់ទឹកឃ្មុំរបស់លោកកំពុងតែមានតម្រូវការនៅលើទីផ្សារ ស្រាប់តែត្រូវផ្អាកចង្វាក់ផលិតកម្មផលិតវិញ បានធ្វើឲ្យអតិថិជនផ្តល់យោបល់ថា ហេតុអ្វីបានជាមិនអាចផលិតឲ្យបានគ្រប់គ្រាន់ និងទាន់ពេលវេលាដូចផលិតផលប្រទេសជិតខាង ខណៈដែលផលិតផលក្នុងស្រុកមួយប្រភេទនេះ មានគុណភាពល្អទៅហើយនោះ។
ដោយមូលហេតុនេះ សព្វថ្ងៃ លោក សាយ ពន្លឺចិត្តៈករុណា កំពុងរៀបចំគម្រោងផែនការមួយឲ្យបានច្បាស់លាស់ ដោយបានរកអ្នកជំនាញផ្នែកវិយោគ ជាជំនួយបន្ថែម ក្នុងការប្រឹក្សាយោបល់នានា ដើម្បីធ្វើយ៉ាងណា អាចឲ្យលោកប្រមែប្រមូលដើមទុនបន្ថែម ដើម្បីពង្រីកចង្វាក់ផលិតមួយឲ្យកាន់តែធំ ដែលមិនត្រឹមតែលក់នៅក្នុងស្រុកនោះទេ តែនឹងត្រូវនាំចេញទៅក្រៅប្រទេសផងដែរ។
សូមជម្រាបថា រហូតមកទល់នឹងសព្វថ្ងៃ ការលក់ផ្លែម្នាស់ទឹកឃ្មុំស្រស់មានតិចតួចទេ ដោយសារម្នាស់ជាច្រើនត្រូវប្រមូលយកមកផលិតជាទឹកម្នាស់វិញទើបអាចបំពេញតម្រូវការទីផ្សារបាន ដោយទីផ្សារសម្រាប់ទឹកម្នាស់ទឹកឃ្មុំនៅខេត្តស្ទឹងត្រែង រួមមាន ក្នុងខេត្តស្ទឹងត្រែងផ្ទាល់ ខេត្តសៀមរាប រាជធានីភ្នំពេញ និងក្រុងព្រះសីហនុជាដើម។
មហិច្ឆតាដ៏ធំរបស់កសិករវ័យជាង ៣០ឆ្នាំ ផ្លាយរូបនេះ មិនត្រឹមតែចង់ពង្រីកកសិដ្ឋាននិងសិប្បកម្មរបស់លោកនោះទេ លោកមានគម្រោងនឹងជួយដល់កសិករដែលដាំម្នាស់ទូទាំងខេត្តស្ទឹងត្រែងទាំងអស់ ឲ្យមានទីផ្សារមួយដ៏រឹងមាំ តម្លៃសមរម្យ និងធ្វើឲ្យខេត្តស្ទឹងត្រែងទាំងមូល សម្បូរដោយចម្ការម្នាស់ទឹកឃ្មុំគ្រប់ទីកន្លែង។
លោកថា៖«មើលទៅ ខ្ញុំមិនអាចដេករងចាំសំណាងពីគេបានទេ មានតែខ្ញុំត្រូវបង្កើតសំណាងឲ្យខ្លួនឯងហើយ ទើបបាន»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
