វិស័យធនាគាររបស់ថៃ រងសម្ពាធកាន់តែខ្លាំង ក្រោយកម្ចីខូចកាន់តែធ្ងន់ធ្ងរទៅៗ

លោក វីរ៉ាផាត វង្ស-យូរ៉ៃ (Weerapat Wonk-urai) អ្នកវិភាគនៅក្រុមហ៊ុនមូលបត្រអន្តរជាតិ CGS International Securities ប្រចាំប្រទេសថៃ បានលើកឡើងថា យោងតាមការព្យាករ រដ្ឋាភិបាលថ្មីរបស់ថៃ អាចនឹងប្រកាសគោលនយោបាយជំរុញសេដ្ឋកិច្ចមួយចំនួន បន្ទាប់ពីគណៈរដ្ឋមន្ត្រីស្បថចូលកាន់តំណែងនៅថ្ងៃសុក្រ ទី៦ ខែកញ្ញា នេះ។

រដ្ឋាភិបាលថ្មីគ្រោងជួយសម្រាលបន្ទុករបស់អ្នកខ្ចី តាមរយៈការស្នើឱ្យបណ្ដាធនាគារពាណិជ្ជបញ្ចុះអត្រាការប្រាក់ ​ដោយកាត់បន្ថយការរួមចំណែកបង់ថ្លៃសេវារបស់ធនាគារទាំងនោះដល់មូលនិធិអភិវឌ្ឍន៍ស្ថាប័នហិរញ្ញវត្ថុពី០,៤៦%នៃប្រាក់បញ្ញើសរុបមកនៅត្រឹម ០,២៣% ដែលដូចគ្នាទៅនឹងសម័យវិបត្តិកូវីដ-១៩។

ដោយផ្អែកលើទិន្នន័យរបស់ធនាគារកណ្ដាលថៃ អ្នកវិភាគរូបនេះ បានគូសបញ្ជាក់ថា គុណភាពទ្រព្យសកម្មក្នុងវិស័យធនាគារថៃ បានបន្តធ្លាក់ចុះក្នុងត្រីមាសទី២ ដែលភាគច្រើនដោយសារកម្ចីប្រើប្រាស់ផ្ទាល់ខ្លួន និងកម្ចីក្នុងវិស័យអាជីវកម្មលក់រាយ និងបោះដុំ។ ទន្ទឹមនឹងនេះ អនុបាតឥណទានមិនដំណើរការ ឬកម្ចីខូចក្នុងវិស័យផលិតកម្ម និងសេវាកម្ម គឺនៅទ្រឹងភាគច្រើន បើធៀបនឹងត្រីមាសមុន។

ទិន្នន័យផ្លូវការបង្ហាញថា ឥណទានមិនដំណើរការ ឬកម្ចីខូចសរុបក្នុងវិស័យធនាគារថៃ ទាំងមូលបានកើនឡើងរហូតដល់ជាង៣,៣៤ពាន់លានដុល្លារអាម៉េរិក ក្នុងត្រីមាសទី២ ដោយកើនឡើងពីជាង៣,២៥ពាន់លានដុល្លារអាម៉េរិក ក្នុងត្រីមាសទី១៕

ដោយ: តែម សុខុម