របាយការណ៍ពីក្រសួងពាណិជ្ជកម្មបានបង្ហាញឲ្យឃើញថា ការនាំចេញទំនិញរបស់កម្ពុជាទៅកាន់ទីផ្សារសហរដ្ឋអាមេរិកនៅរយៈពេល៨ខែក្នុងឆ្នាំ២០២១ សម្រេចបានជាង ៤ពាន់៦រយលានដុល្លារអាមេរិកកើនឡើង៤០% បើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែជាង៣ពាន់៣រយលានដុល្លារអាមេរិកប៉ុណ្ណោះ។ ចំណែកការនាំចូលពីសហរដ្ឋអាមេរិកមកកម្ពុជានៅរយៈពេលដូចគ្នានេះ សម្រេចបានជាង ២៥០លានដុល្លារអាមេរិក កើនឡើងជាង៦០% បើធៀបនឹងរយៈពេលដូចគ្នាកាលពីឆ្នាំមុន។
បើសរុបទំហំពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកបានឈានដល់ជិត៥ពាន់លានដុល្លារអាមេរិកនៅ៨ខែឆ្នាំ កើនឡើងជាង៦០% បើធៀបនឹងរយៈពេលដូចគ្នាកាលពីឆ្នាំ២០២០ ដែលមានចំនួនជិត៣ពាន់២រយលានដុល្លារអាមេរិក។ តាមរយៈតួលេខនេះអាចបញ្ជាក់បានថា ការឆ្លងរាតនៃជំងឺកូវីដ-១៩ ជាសកលមិនបានបង្កផលប៉ះធ្ងន់ធ្ងរដល់ការធ្វើពាណិជ្ជកម្មរវាងប្រទេសទាំងពីរនោះទេ ទោះបីបញ្ហានេះបានធ្វើឲ្យមានការរាំងស្ទះមួយចំនួនដល់ការដឹកជញ្ជូនក៏ដោយ។
អត្ថបទទាក់ទង
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានគូសបញ្ជាក់ថា កត្តាដែលធ្វើឲ្យការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកនៅតែអាចរក្សាបាននូវកំណើននេះ គឺដោយសារកម្ពុជាទទួលបានប្រព័ន្ធអនុគ្រោះពន្ធទូទៅពីសហរដ្ឋអាមេរិក(GSP) គួបផ្សំតម្រូវការមានការកើនឡើង។ វិបត្តិនយោបាយនៅមីយ៉ាន់ម៉ា ក៏ជាកត្តារួមចំណែកធ្វើឲ្យការនាំចេញរបស់កម្ពុជាកើនឡើងផងដែរ។ អ្នកជំនាញរូបនេះអះអាងថា ការនាំចូលពីសហរដ្ឋអាមេរិកមកកម្ពុជាមានការកើនឡើង វាមិនមែនជាសញ្ញាអាក្រក់នោះទេ ប៉ុន្ដែ វាបានបង្ហាញពីភាពល្អប្រសើរនៃចរន្តសេដ្ឋកិច្ចកម្ពុជា។
សូមបញ្ជាក់ថា ទំនិញដែលកម្ពុជានាំចេញទៅកាន់ទីផ្សារសហរដ្ឋអាមេរិករួមមានសម្លៀកបំពាក់ ស្បែកជើង និងផលិតផលធ្វើដំណើរ ខណៈកម្ពុជានាំចូលពីសហរដ្ឋអាមេរិកភាគច្រើនរថយន្ត និងគ្រឿងអគ្គិសនីជាដើម។
គួររំលឹកថា ទំហំពាណិជ្ជកម្មទ្វេភាគីរវាងកម្ពុជា-សហរដ្ឋអាមេរិកកាលពីឆ្នាំ២០២០ មានទំហំទឹកប្រាក់ជិត ៧ពាន់លានដុល្លារអាមេរិក កើនឡើងជិត១៨% បើធៀបនឹងឆ្នាំ២០១៩ ដែលមានទំហំទឹកប្រាក់ជិត៦ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
