អ្នកនាំពាក្យដែលមិនបញ្ចេញឈ្មោះរបស់ក្រសួងការពារជាតិកូរ៉េខាងជើង បាននិយាយនៅក្នុងសេចក្តីថ្លែងការណ៍មួយទៅកាន់ទីភ្នាក់សារព័ត៌មាន KCNA ថា សកម្មភាពយោធាបង្កហេតុរបស់អាមេរិកកំពុងនាំឧបទ្វីបកូរ៉េខិតទៅជិតជម្លោះនុយក្លេអ៊ែរ។ អ្នកនាំពាក្យរូបនោះបានបន្តថា «គ្មានឡើយការធានាថា ឧបទ្ទវហេតុដ៏គួរឱ្យតក់ស្លុត ដូចជាការទម្លាក់យន្តហោះឈ្លបយកការណ៍យុទ្ធសាស្ត្ររបស់កងទ័ពអាកាសអាមេរិក នឹងមិនកើតឡើងទេ» បើនៅតែមានទង្វើបង្កហេតុបែបនេះទៀត។
សេចក្ដីរាយការណ៍ថ្មីៗរបស់ទីក្រុងព្យុងយ៉ាងបានលើកឡើងថា យន្តហោះឬដ្រូនឈ្លបយកការណ៍របស់សហរដ្ឋអាមេរិក និងការបញ្ជូននាវាមុជទឹកនុយក្លេអ៊ែរមកកាន់ឧបទ្វីបកូរ៉េ កំពុងបង្កើនភាពតានតឹង។ ទោះយ៉ាងណា គេមិនទាន់ឃើញមានការឆ្លើយតបភ្លាមៗពីយោធាអាមេរិក ដែលឈរជើងនៅកូរ៉េខាងត្បូង ចំពោះសំណើសុំការបំភ្លឺនៅឡើយទេ។
អត្ថបទគួរអាន
ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានលើកឡើងថា សកម្មភាពរបស់សហរដ្ឋអាមេរិកក្នុងការនាំយកយុទ្ធោបករណ៍នុយក្លេអ៊ែរយុទ្ធសាស្ត្រមកកាន់ឧបទ្វីបកូរ៉េ ជា«ការគំរាមកំហែងដោយនុយក្លេអ៊ែរដ៏ច្បាស់ក្រលែត» ចំពោះកូរ៉េខាងជើងនិងបណ្តាប្រទេសក្នុងតំបន់។ ទីភ្នាក់ងារនេះបានបន្តថា ទង្វើរបស់អាមេរិកបង្ហាញឱ្យឃើញការគំរាមកំហែងដ៏ធ្ងន់ធ្ងរចំពោះសន្តិភាព។
ប្រភពដដែលបានបន្ថែមទៀតថា «ស្ថានការណ៍ធ្ងន់ធ្ងរបំផុត ដែលគ្មាននរណាម្នាក់ចង់បាន ត្រូវបានបង្កើតឡើងឬអត់ នៅឧបទ្វីបកូរ៉េ គឺអាស្រ័យលើសកម្មភាពនាពេលអនាគតរបស់សហរដ្ឋអាមេរិក ហើយប្រសិនបើស្ថានការណ៍បន្ទាន់ណាមួយកើតឡើង សហរដ្ឋអាមេរិកនឹងទទួលខុសត្រូវទាំងស្រុងចំពោះរឿងនោះ»។
មែនទែនទៅ ក្នុងមួយរយៈចុងក្រោយនេះ យោធាអាមេរិក និងកូរ៉េខាងត្បូង បាននិងកំពុងធ្វើសមយុទ្ធជើងអាកាសនិងជើងទឹកយ៉ាងមមាញឹក ក្នុងនោះក៏មាននាវាផ្ទុកយន្តហោះអាមេរិក និងយន្តហោះទម្លាក់គ្រាប់បែកធុនធ្ងន់ផ្សេងៗទៀតចូលរួមដែរ។ ជាពិសេស នាវាមុជទឹកដើរដោយថាមពលនុយក្លេអែររបស់អាមេរិក ដែលបំពាក់ដោយកាំជ្រួចគ្រូសផង ក៏បានចូលចតនៅកំពង់ផែក្រុង Busan របស់ប្រទេសកូរ៉េខាងត្បូងកាលពីខែមុនដែរ។
សេចក្តីថ្លែងការណ៍របស់កូរ៉េខាងជើងបានថ្កោលទោសអ្វីដែលខ្លួនហៅថាជាចំណាត់ការរបស់សហរដ្ឋអាមេរិក ក្នុងការដាក់ពង្រាយនាវាមុជទឹកនុយក្លេអ៊ែរយុទ្ធសាស្ត្រ ដែលផ្ទុកក្បាលគ្រាប់នុយក្លេអ៊ែរ ទៅកាន់ឧបទ្វីបកូរ៉េ ជាលើកដំបូងចាប់តាំងពីឆ្នាំ ១៩៨១ នោះ៕
