ភាគហ៊ុនរបស់ក្រុមហ៊ុនផលិតបន្ទះឈីប Nvidia បានកើនឡើង៣,៦% កាលពីថ្ងៃអង្គារ ដោយជំរុញឱ្យតម្លៃទីផ្សាររបស់ក្រុមហ៊ុននេះឡើងដល់៣,៣៤ទ្រីលានដុល្លារ ដោយកើនលើសតម្លៃទីផ្សាររបស់ក្រុមហ៊ុន Microsoft ដែលឥឡូវនេះមានតម្លៃ៣,៣២ទ្រីលានដុល្លារ។ កាលពីដើមខែនេះ តម្លៃរបស់ក្រុមហ៊ុន Nvidia បានកើនដល់៣ទ្រីលានដុល្លារជាលើកដំបូងដោយបានវ៉ាដាច់ក្រុមហ៊ុន Apple ដែលមានតម្លៃ៣,២៩ទ្រីលានដុល្លារ។
ភាគហ៊ុនរបស់ក្រុមហ៊ុន Nvidia បានកើនឡើងជាង១៧០% តាំងពីដើមឆ្នាំរហូតមកដល់ពេលនេះ និងបានបន្តកើនឡើងកាន់តែខ្ពស់បន្ទាប់ពីក្រុមហ៊ុននេះបានរាយការណ៍ពីប្រាក់ចំណូលប្រចាំត្រីមាសទី១កាលពីខែឧសភា។ ភាគហ៊ុនរបស់ក្រុមហ៊ុននេះបានកើនឡើងជាង៩ដង ចាប់តាំងពីចុងឆ្នាំ២០២២ ចំពេលក្រុមហ៊ុននេះបានបង្កើនកម្មវិធីបញ្ញាសិប្បនិម្មិត។
ក្រុមហ៊ុន Nvidia មានប្រហែល៨០% នៃចំណែកទីផ្សារបន្ទះឈីបបញ្ញាសិប្បនិមិត្តដែលប្រើនៅក្នុងមជ្ឈមណ្ឌលទិន្នន័យ ខណៈដែលក្រុមហ៊ុន OpenAI ក្រុមហ៊ុន Microsoft ក្រុមហ៊ុន Alphabet ក្រុមហ៊ុន Amazon ក្រុមហ៊ុន Meta និងក្រុមហ៊ុនដទៃទៀតបានប្រកួតប្រជែងចាប់យកកម្មវិធី processors សម្រាប់បង្កើតគំរូបញ្ញាសិប្បនិមិត្ត និងកម្មវិធីពាក់ព័ន្ធដទៃទៀត។
សម្រាប់ត្រីមាសចុងក្រោយ ប្រាក់ចំណូលនៅក្នុងអាជីវកម្មមជ្ឈមណ្ឌលទិន្នន័យរបស់ក្រុមហ៊ុន Nvidia បានកើនឡើង៤២៧% បើធៀបនឹងពេលមួយឆ្នាំមុនដោយឡើងដល់ជាង២២ពាន់លានដុល្លារដែលស្មើនឹងប្រហែល៨៦% នៃការលក់សរុបរបស់អ្នកផលិតបន្ទះឈីប៕
អត្ថបទ៖ សុខ មង្គល
