លោក ទូច សំណាង នាយកគ្រប់គ្រងទូទៅក្រុមហ៊ុន OCIC បានបញ្ជាក់ប្រាប់ខេមបូណូមីសថា គិតមកដល់ពេលបច្ចុប្បន្ន ទីក្រុងរណបកោះពេជ្រ បច្ចុប្បន្ននៅតែបន្ដមានការអភិវឌ្ឍអគារពាណិជ្ជកម្មបន្ថែម ខណៈហេដ្ឋារចនាសម្ព័ន្ធរបស់ទីក្រុងរណបមួយនេះវិញ ត្រូវបានបញ្ចប់ការសាងសង់ជាស្ថាពរហើយ។ ដោយឡែក ការសាងសង់ហេដ្ឋារចនាសម្ព័ន្ធនៅតំបន់ទីក្រុងរណបជ្រោយចង្វារ សម្រេចបានប្រមាណ៩០%ហើយ រីឯការសាងសង់ហេដ្ឋារចនាសម្ព័ន្ធនៅតំបន់កោះនរា សម្រេចបានចន្លោះពី ៧៥% ទៅ៨០% និងគ្រោងបញ្ចប់នៅអំឡុងឆ្នាំ២០២៥ ខាងមុខនេះ។
ដោយឡែក ទាក់ទងនឹងវិស័យសំណង់ និងអចលនទ្រព្យនៅកម្ពុជាវិញ ត្រូវបានលោក ទូច សំណាង កត់សម្គាល់ឃើញថា ហាក់មិនទាន់វិលមករកភាពល្អប្រសើរនោះទេ ពោលវិស័យនេះ ហាក់នៅមានសភាពទ្រឹងនៅឡើយ។ សម្រាប់ថ្នាក់ដឹកនាំក្រុមហ៊ុន OCIC រូបនេះ លោកមិនទាន់អាចសន្និដ្ឋានបានទេថា វិស័យសំណង់ និងអចលនទ្រព្យនៅកម្ពុជា ឆ្នាំ២០២៤ នឹងល្អប្រសើរជាងឆ្នាំ២០២៣ ឬយ៉ាងណា ដោយលោកបញ្ជាក់ថា បច្ចុប្បន្ន លោកមិនទាន់មើលឃើញថា មានវិនិយោគិនថ្មីៗ ចូលមកវិនិយោគក្នុងវិស័យនេះនៅឡើយដែរ។
អត្ថបទគួរអាន
ដើម្បីជួយជំរុញកំណើនវិស័យអចលនទ្រព្យកំពុងជួបធ្លាក់ចុះ ក៏ដូចជាដើម្បីជួយសម្រួលដល់អ្នកជាប់ពន្ធទាំងអស់ កន្លងមក រាជរដ្ឋាភិបាលបានសម្រេចពន្យារពេលបង់ពន្ធបន្តបន្ទាប់លើអចលនទ្រព្យ និងពន្ធលើដីធ្លីមិនប្រើប្រាស់ ជាដើម។ តួយ៉ាងថ្មីៗនេះ អគ្គនាយកដ្ឋានពន្ធដារបានសម្រេចបន្តពន្យារពេលបង់ពន្ធលើអចលនទ្រព្យ និងពន្ធលើដីធ្លីមិនបានប្រើប្រាស់រហូតដល់ថ្ងៃដំណាច់ឆ្នាំ២០២៤ បន្ថែមទៀត និងការអនុគ្រោះជាច្រើនទៀត។
សូមបញ្ជាក់ថា គិតក្នុងត្រីមាសទី៣ឆ្នាំ២០២៣ កម្ពុជាបានអនុម័តគម្រោងសំណង់ចំនួន៧៤៩គម្រោង ថយចុះជាង៣៦% ខណៈតម្លៃគម្រោងសាងសង់វិញមានដល់ទៅជាង២ពាន់២រយលានុល្លារ មានការកើនឡើងដល់ទៅជាង ១៩២% បើធៀបនឹងត្រីមាសដូចគ្នាកាលពីឆ្នាំ២០២២។ ការកើនឡើងនៃតម្លៃគម្រោងនេះ គឺភាគច្រើនជាប្រភេទសំណង់លំនៅឋាន សំណង់ពាណិជ្ជកម្ម សំណង់ឧស្សាហកម្ម និងសំណង់ទេសចរណ៍។ នេះបើយោងតាមព្រឹត្តិបត្រស្ថិតិសេដ្ឋកិច្ច និងហិរញ្ញវត្ថុ ប្រចាំត្រីមាសទី៣ ឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
