អ្នកប្រកបអាជីវកម្មតាមប្រព័ន្ធអេឡិចត្រូនិក នឹងប្រឈមការផាកពិន័យជាប្រាក់ ឬបញ្ឈប់អាជីវកម្ម បើបន្តរកស៊ីដោយគ្មានលិខិត ឬអាជ្ញាបណ្ណអនុញ្ញាតចាប់ពីថ្ងៃទី១ ខែឆ្នូ ឆ្នាំ២០២១ ខាងមុខ។
អនុរដ្ឋលេខាធិការ និងអ្នកនាំពាក្យឆ្លាស់វេន នៃក្រសួងពាណិជ្ជកម្ម ឯកឧត្តម ប៉ែន សុវិជាតិ សង្កេតឃើញថា មានក្រុមហ៊ុនសហគ្រាស និងអ្នករកស៊ីតាមប្រព័ន្ធអេឡិចត្រូនិកជាច្រើនបានមកសួរនាំព័ត៌មាន និងនីតិវិធីក្នុងការស្នើសុំលិខិត ឬអាជ្ញាបណ្ណអាជីវកម្មតាមប្រព័ន្ធអេឡិកនៅក្រសួង ក្រោយក្រសួងដាក់ឱសានវាទអនុវត្តវិធានការផាកពិន័យ។ ប៉ុន្តែឯកឧត្តមអះអាងថា មកទល់ពេលនេះមិនទាន់មានក្រុមហ៊ុន សហគ្រាស និងអ្នករកស៊ីតាមអនឡាញណាមួយមកស្នើសុំលិខិត ឬអាជ្ញាបណ្ណអនុញ្ញាតនៅឡើយទេ។
អត្ថបទគួរអាន
ឯកឧត្តម សង្កត់ធ្ងន់ថា ក្រសួងនឹងអនុវត្តវិធានការផាកពិន័យយ៉ាងតឹងរ៉ឹងបំផុតចំពោះក្រុមហ៊ុន សហគ្រាស និងអ្នករកស៊ីតាមប្រព័ន្ធអេឡិចត្រូនិកលក្ខណៈនីតិបុគ្គលណា ដែលបន្តរកដោយគ្មានច្បាប់អនុញ្ញាតត្រឹមត្រូវចាប់ពីថ្ងៃទី១ ខែឆ្នូ ឆ្នាំ២០២១។ អ្នកប្រកបអាជីវកម្មតាមប្រព័ន្ធអេឡិចត្រូនិកដែលគ្មានលិខិត ឬអាជ្ញាបណ្ណត្រឹមត្រឹមនឹងប្រឈមការផាកពិន័យជាប្រាក់ ផ្អាក ឬបិទអាជីវកម្ម ចាប់ពីថ្ងៃកំណត់ឱសានវាទនៃការអនុវត្តវិធានការផាកពិន័យ។
បើតាមច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ក្រុមហ៊ុន សហគ្រាស និងបុគ្គល ដែលរកស៊ីតាមអនឡាញគ្មានលិខិត ឬអាជ្ញាបណ្ណអនុញ្ញាតអាចរកការពិន័យជាប្រាក់១០លានរៀល ផ្អាក ឬបិទអាជីវកម្ម។ ចំពោះតម្លៃសេវានៃការស្នើសុំលិខិតអនុញ្ញាត ឬអាជ្ញាបណ្ណ ត្រូវបានឯកឧត្តម ប៉ែន សុវិជាតិ បញ្ជាក់ថា ការស្នើសុំលិខិតអនុញ្ញាតលក្ខណៈបុគ្គលមានតម្លៃ២០ម៉ឺនរៀល, លក្ខណៈសហគ្រាសឯកបុគ្គលតម្លៃ៤០ម៉ឺនរៀល និងសម្រាប់ក្រុមហ៊ុនតម្លៃ១លានរៀល៕
None
