ក្រោយមានពលរដ្ឋរាប់ម៉ឺននាក់ធ្វើដំណើរកម្សាន្ដ វៀតណាមដាក់ការរឹតត្បិតខ្លាំងជាងមុន

សារព័ត៌មាន Vietnam Net បានផ្សាយថា ការចាប់ផ្ដើមរឹតត្បិតលើសេវាកម្សាន្ដជាច្រើនដូច្នេះ បន្ទាប់ពី នៅថ្ងៃដំបូងនៃថ្ងៃឈប់សម្រាកនេះ មានពលរដ្ឋរវៀតណាមរាប់សិបម៉ឺននាក់ បានសម្រុកនាំគ្នាទៅកម្សាន្ដនៅឆ្នេរសមុទ្រមួយកន្លែងនៃខេត្ត វង់តៅ ដោយគ្មានញញើតញញើមពីការឆ្លងកូវីដ-១៩ នោះទេ ខណៈដែលមានពលរដ្ឋជាច្រើនហាក់ភ្លេចខ្លួន ដើរលេងកម្សាន្ដ មុជទឹកសមុទ្រយ៉ាងរីករាយក្អាកក្អាយ ដោយគ្មានពាក់ម៉ាស់ រក្សាកម្លាតអ្វីទាំងអស់។

ក្រោយពីសង្កេតឃើញមានសន្ទុះភ្ញៀវទេសចរដ៏ច្រើនលើសលប់យ៉ាងដូច្នេះ ភ្លាមៗនោះ អាជ្ញាធរវៀតណាម ក៏បានសម្រេចចិត្តផ្អាកដំណើរការនូវអាជីវកម្មដែលផ្ដល់សេវាមិនសូវចាំបាច់មួយចំនួនសម្រាប់ភ្ញៀវទេសចរ ដូចជាផ្អាកហាងផឹកស៊ី ក្លឹបកម្សាន្ដ ហាងការ៉ាអូខេ ជាដើម។ ការផ្អាកនេះ ដោយសារតែអាជ្ញាធរវៀតណាម បារម្ភពីសក្ដានុពលនៃការចម្លងមេរោគកូវីដ-១៩ ដែលអាចនឹងកើតមានឡើង។

បន្ថែមពីនេះទៀត អាជ្ញាធរក៏បានអំពាវនាវឲ្យពលរដ្ឋ កុំមានការប្រមូលផ្ដុំមនុស្សច្រើន និងត្រូវលុបចោលការរៀបចំកម្មវិធីវប្បធម៌ និងសាសនា ផ្សេងៗ និងផ្អាកសកម្មភាពកម្សាន្ដ និងគោរពតាមវិធានការការពារកូវីដ-១៩ឲ្យបានម៉ឺងម៉ាត់បំផុត។

យ៉ាងណាក៏ដោយចុះ នៅថ្ងៃទី០១ ខែឧសភា វៀតណាមបានប្រកាសរកឃើញករណីឆ្លងកូវីដ-១៩ តែ១៤ករណីប៉ុណ្ណោះ ដោយក្នុងនោះ មាន ៣ករណីជាការឆ្លងចូលក្នុងសហគមន៍ និង១១ករណីទៀត ជាករណីនាំចូល។

ប្រទេសវៀតណាម បានស្ងប់ស្ងាត់មិនមានករណីឆ្លងចូលសហគមន៍ជាង១ខែ តែក៏ចាប់ផ្ដើមរកឃើញករណីឆ្លងថ្មីឡើងវិញកាលពីថ្ងៃទី ២៩ ខែមេសា ហើយគិតមកទល់ថ្ងៃទី០១ ខែឧសភាចំនួនអ្នកឆ្លងថ្មីក្នុងសហគមន៍នេះ មាន ១៦ករណីហើយ ខណៈដែលគិតត្រឹមថ្ងៃទី ២ខែឧសភា ចំនួនអ្នកឆ្លងសរុបនៅវៀតណាម ជិត ៣ពាន់នាក់ ក្នុងនោះអ្នកជាសះស្បើយមានជាង ២ពាន់៥រយនាក់ និងអ្នកស្លាប់មាន៣៥នាក់។ គិតមកទល់ពេលនេះ ប្រទេសវៀតណាម មានប្រជាជនដែលបានចាក់វ៉ាក់សាំងរួច ប្រមាណជិត ៥១ម៉ឺននាក់ប៉ុណ្ណោះ ខណៈដែលរដ្ឋាភិបាលប្រទេសនេះ ក៏កំពុងជំរុញការពន្លឿនចាក់វ៉ាក់សាំងផងដែរ៕