ជាក់ស្ដែង ធនាគារពិភពលោក នៅក្នុងរបាយការណ៍ថ្មីបំផុតមួយរបស់ខ្លួន បាននិយាយថា ប្រជាជនកម្ពុជាជាង ៣លាននាក់ បានចាកផុតពីភាពក្រីក្រ ដោយកម្ពុជាបានធ្វើល្អជាងប្រទេសមួយចំនួនដែលមានស្ថានភាពដូចគ្នា ក្នុងការកាត់បន្ថយភាពក្រីក្រនៃប្រជាជនរបស់ខ្លួន។
យោងតាមរបាយការណ៍ដែលមានឈ្មោះថា Cambodia Sustaining Strong Growth for the Benefit of All ក្នុងរយៈពេលមួយទសវត្សរ៍កន្លងមកនេះ កំណើនសេដ្ឋកិច្ចខ្ពស់នៅកម្ពុជាបាននាំមកនូវការកាត់បន្ថយភាពក្រីក្រក្នុងកម្រិតមួយដែលគួរឲ្យកត់សម្គាល់។
គិតត្រឹមឆ្នាំ២០១៤ ប្រជាជន ១៣,៥ភាគរយនៃប្រជាជនសរុបជាង ១៥លាននាក់ រស់នៅក្រោមខ្សែបន្ទាត់នៃភាពក្រីក្រ ដែលចំនួននេះថយចុះជាង ៣៤ភាគរយ បើប្រៀបធៀបទៅនឹងកាលឆ្នាំ២០០៧ ដែលកាលណោះ អត្រាភាពក្រីក្ររបស់ប្រជាជនកម្ពុជា មានដល់ទៅ ៤៧,៨ភាគរយ។
តើអ្នកបានអានអត្ថបទនេះ ឬនៅ?
ភាពក្រីក្របានធ្លាក់ចុះខ្លាំងក្នុងអំឡុងឆ្នាំ២០០៧-២០០៩ ដែលនៅពេលនោះ វិស័យកសិកម្មមានការរីកចម្រើនខ្លាំងដែលនាំឲ្យប្រជាជនកម្ពុជាជាង៣លាននាក់ បានចាកផុតពីភាពក្រីក្រ។
ការប៉ាន់ប្រមាណនេះ គឺផ្អែកលើខ្សែបន្ទាត់ភាពភាពក្រីក្រអន្ដរជាតិ ដែលកំណត់ចំណូលមួយថ្ងៃឲ្យបាន ១,៩០ដុលា្លរអាមេរិក។
កម្ពុជាស្ថិតក្នុងលំដាប់លេខពីរបន្ទាប់ពីប្រទេសវៀតណាម ក្នុងការកាត់បន្ថយភាពក្រីក្រលឿនរហ័សនៅក្នុងប្រទេសរៀងៗខ្លួន។ ប្រទេសកម្ពុជាបាននាំមុខប្រទេសផ្សេងទៀត ដូចជា បង់ក្លាដេស នីការ៉ាហ្គ័រ និងហ្វ៊ីលីពីន ជាដើម៕
None
