សហគមន៍សន្សំប្រាក់របស់ប្រជាពលរដ្ឋក្រីក្រនៅតាមទីជនបទ ដែលបានបង្កើតឡើងតាំងពីដើមទសវត្សរ៍៩០ ក្រោមការផ្ដួចផ្ដើមរវាងក្រសួងអភិវឌ្ឍន៍ជនបទ និងអង្គការក្រៅរដ្ឋាភិបាលជាច្រើន បានពង្រីកមូលនិធិសន្សំរបស់ខ្លួន រហូតដល់ជាង១១លានដុល្លារ និងមានសមាជិករហូតដល់ជាង២២ម៉ឺននាក់ហើយ នេះបើតាមការអះអាងពីរដ្ឋមន្ត្រីក្រសួងអភិវឌ្ឍន៍ជនបទ ឯកឧត្តម អ៊ុក រ៉ាប៊ុន។
លោកស្រី លឹម សូលីន នាយិកាអង្គការ OXFAM កម្ពុជា បានឲ្យដឹងថា សហគមន៍ពលរដ្ឋក្រីក្រសន្សំប្រាក់នេះ អនុញ្ញាតឲ្យប្រជាពលរដ្ឋក្រីក្រនៅតាមជនបទ អាចចូលរួមជាក្រុមក្នុងការសន្សំប្រាក់ ទៅតាមលទ្ធភាពរបស់ពួកគាត់ ដូចជា ៥០០រៀល ឬ ១០០០រៀល ឬ ១០០០០រៀលក្នុងមួយខែ ទៅតាមលទ្ធភាពរបស់ពួកគាត់ ដោយមិនមានផ្ដល់ជាប្រាក់បដិភាគពីអង្គការ ឬរាជរដ្ឋាភិបាលនោះឡើយ។
ទន្ទឹមនឹងនោះ សមាជិកក្នុងសហគមន៍សន្សំប្រាក់ក៏អាចខ្ចីប្រាក់ក្នុងសហគមន៍នោះ ដើម្បីយកទៅពង្រីកមុខរបររបស់ខ្លួន ជាមួយនឹងអត្រាការប្រាក់ទាប ឬខ្ពស់ ទៅតាមការព្រមព្រៀងរបស់សមាជិកក្នុងក្រុម។
នាយិកាអង្គការ OXFAM កម្ពុជារូបនេះ បានអះអាងទៀតថា តាមការតាមដានរបស់លោកស្រីក្នុងរយៈពេល៧ឆ្នាំចុងក្រោយនៃការជួយជ្រោមជ្រែង ប្រជាពលរដ្ឋក្រីក្រនៅតាមទីជនបទឲ្យចងក្រងគ្នាជាសហគមន៍ដើម្បីសន្សំប្រាក់ យ៉ាងហោចណាស់ ក្នុងចំណោមពលរដ្ឋក្រីក្របំផុតតាមទីជនបទរបស់កម្ពុជា ក៏អាចមានលទ្ធភាពសន្សំប្រាក់បានតិចបំផុត ៦៦ដុល្លារក្នុងមួយឆ្នាំដែរ។
គ្រាន់តែគម្រោងសន្សំរបស់ Oxfam មួយ គិតពីឆ្នាំ២០០៥មកទល់ពេលនេះ មូលនិធិសន្សំបានកើនដល់ជាង៥លានដុល្លារ និងមានសមាជិកសន្សំជាង១៤ម៉ឺននាក់។
តើអ្នកបានអានអត្ថបទនេះ ឬនៅ?
ទន្ទឹមនឹងនេះ សម្រាប់តែគម្រោងសន្សំរបស់ OXFAM មួយប៉ុណ្ណោះ គិតតាំងពីឆ្នាំ២០០៥រហូតមកទល់ពេលនេះ ទំហំទិន្នន័យអំពីមូលនិធិសន្សំបានកើនរហូតដល់ជាង៥លានដុល្លារ និងមានសមាជិកសន្សំជាង១៤ម៉ឺននាក់ ហើយអត្រាជោគជ័យលើគម្រោងសន្សំប្រាក់នេះ មានរហូតដល់៦៦%។
លោកស្រីបានគូសបញ្ជាក់ថា ការចងក្រងជាសហគមន៍សន្សំប្រាក់សម្រាប់ប្រជាពលរដ្ឋក្រីក្រ គឺជាការចូលរួមចំណែកដ៏សំខាន់ក្នុងការចូលរួមលើកកម្ពស់ជីវភាពរបស់ពួកគាត់ ព្រោះបើតាមការប៉ាន់ស្មាន មានប្រជាពលរដ្ឋទីទ័លក្រដែលរស់នៅតាមតំបន់ដាច់ស្រយាលនៃប្រទេសកម្ពុជា ប្រមាណ ៧០% ពុំទាន់ទទួលបានសេវាហិរញ្ញវត្ថុពីគ្រឹះស្ថានមីក្រូហិរញ្ញវត្ថុ ឬធនាគារនៅឡើយទេ។
ឯកឧត្តម អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានលើកឡើងដែរថា ក្រសួងអភិវឌ្ឍន៍ជនបទបានចុះអនុស្សរណៈ និងផ្ដល់លិខិតគាំទ្រជូនអង្គការក្រៅរដ្ឋាភិបាលចំនួន១២ រួមមាន អង្គការ World Vision, OXFAM, FH Cambodia, PADEK, Samaritan Purse, AGRISUD, Asian Outreach, LWD, HEIFER, TGF និង CWS។ ក្នុងនោះ អង្គការ OXFAM បានចូលរួមចំណែកខ្លាំងជាងគេក្នុងការបង្កើតសហគមន៍សន្សំប្រាក់នេះ។
តើអ្នកបានអានអត្ថបទនេះឬនៅ?
ឯកឧត្តមបន្តថា គិតមកត្រឹមឆ្នាំដើម២០១៦មុននេះ សហគមន៍សន្សំប្រាក់របស់ប្រជាពលរដ្ឋក្រីក្រ បានពង្រីកមូលនិធិសន្សំរបស់ខ្លួន បានរហូតដល់ជាង១១លានដុល្លារ ក្នុងនោះមានសមាជិកចូលរួមជាង ២២ម៉ឺននាក់ គិតជាក្រុមមាន ១២ពាន់ក្រុម។
បន្ថែមពីនេះទៀត ដោយមើលឃើញពីការរីកផុសផុលនៃសហគមន៍សន្សំប្រាក់របស់ប្រជាពលរដ្ឋក្រីក្រនេះ ក្រសួងអភិវឌ្ឍន៍ជនបទក៏បាននិងកំពុងរៀបចំគោលនយោបាយយុទ្ធសាស្ត្រមួយចំនួន ដើម្បីចូលរួមចំណែកគាំទ្រ និងជំរុញឲ្យសហគមន៍មួយនេះ កាន់តែមានភាពរលូនទៅមុខ និងប្រកបដោយចីរភាព ក្នុងនោះរួមមាន ការរៀបចំយន្ដការគាំទ្រផ្នែកបច្ចេកទេស ក្នុងការជួយបណ្ដុះបណ្ដាលដល់សហគមន៍សន្សំប្រាក់នូវជំនាញទៅតាមតម្រូវការជាក់ស្ដែង។ គាំទ្រផ្នែកផ្លូវច្បាប់ ដោយក្រសួងកំពុងសិក្សាពីលទ្ធភាព និងយន្ដការជាក់លាក់ ដើម្បីគាំទ្រសហគមន៍ឲ្យដំណើរប្រតិបត្តិការរបស់ខ្លួនមានភាពស្របច្បាប់។ និងស្វែងរកនីតិវិធី និងគោលការណ៍រួមមួយ ក្នុងការរៀបចំ និងដំណើររបស់សហគមន៍សន្សំប្រាក់ សម្រាប់ប្រើប្រាស់ជាម៉ូដែលមួយរបស់កម្ពុជា។
ស្របជាមួយគ្នានេះដែរ ក្រសួងក៏គ្រោងបែងចែកថវិកាជាតិមួយចំនួន សម្រាប់មន្ទីរអភិវឌ្ឍន៍ជនបទតាមខេត្ត សម្រាប់កិច្ចគាំទ្រដល់សហគមន៍សន្សំប្រាក់នេះផងដែរ។
សូមបញ្ជាក់ដែរថា ដើម្បីជំរុញឲ្យសហគមន៍សន្សំប្រាក់នេះកាន់តែមានវិសាលភាព តម្លាភាព និងប្រសិទ្ធភាពជាងមុន ខាងក្រសួងអភិវឌ្ឍន៍ជនបទ និងអង្គការពាក់ព័ន្ធ ក៏បាននិងកំពុងរួមគ្នាក្នុងការជួយធ្វើយ៉ាងណាផ្សារភ្ជាប់ការសន្សំជាមួយការវិនិយោគ ព្រមជាមួយការការផ្សារភ្ជាប់អាជីវកម្មរបស់ប្រជាពលរដ្ឋទៅនឹងទីផ្សារ ដោយសំដៅលើកកម្ពស់ជីវភាពប្រជាពលរដ្ឋឲ្យបានកាន់តែប្រសើរឡើង៕
