ការបង្រ្កាបដ៏សាហាវនេះបានកើតឡើងចំថ្ងៃទិវាខួបកំណើតកងកម្លាំងប្រដាប់អាវុធប្រទេសភូមា ។ មេដឹកនាំយោធា ឧត្ដមសេនីយ៍ មិន អ៊ុងលាំង (Min Aung Hlaing) ដែលជាប្រមុខដឹកនាំរបបយោធា បានថ្លែងនៅក្នុងពិធីព្យុហយាត្រានៅក្នុងរដ្ឋធានីណៃពីដ ថា យោធានឹងការពារប្រជាជន និងខិតខំប្រឹងប្រែងដើម្បីលទ្ធិប្រជាធិបតេយ្យ ។
ទូរទស្សន៍រដ្ឋភូមាបាននិយាយនៅថ្ងៃសុក្រថា ក្រុមអ្នកតវ៉ាប្រថុយប្រថាននឹងការបាញ់សម្លាប់«ចំក្បាលនិងដងខ្លួន» ។ ទោះបីជាមានការផ្សាយគំរាមបែបនេះដោយទូរទស្សន៍រដ្ឋក្ដី ក្រុមអ្នកតវ៉ាប្រឆាំងនឹងរដ្ឋប្រហារយោធាកាលពីថ្ងៃទី១ ខែកុម្ភៈ បាននាំគ្នាចេញដើរតវ៉ានៅតាមដងផ្លូវនានាក្នុងទីក្រុងយ៉ង់ហ្គូន, មេនដាឡេ និងទីក្រុងដទៃទៀត ។
សារព័ត៌មានក្នុងស្រុកភូមា ឈ្មោះថា The Myanmar Now បានផ្សាយថា កងកម្លាំងសន្តិសុខបានសម្លាប់មនុស្ស ៩១នាក់ នៅទូទាំងប្រទេស នៅថ្ងៃសៅរ៍នេះ ក្នុងនោះជនរងគ្រោះក្មេងជាងគេ គឺក្មេងប្រុសអាយុ ៥ឆ្នាំ ។ ក្រុមអ្នកតវ៉ាប្រឆាំងរបបយោធា CRPH បានហៅថ្ងៃនេះថា ជាថ្ងៃដ៏អាម៉ាសរបស់កងកម្លាំងប្រដាប់អាវុធ ។
អត្ថបទទាក់ទង
នៅក្នុងព្រឹត្តិការណ៍មួយផ្សេងទៀត ក្រុមប្រដាប់អាវុធជនជាតិភាគតិមួយ ឈ្មោះ សហភាពជាតិការ៉ែន បាននិយាយថា ខ្លួនបានវាយដណ្ដើមយកទីតាំងឈរជើងរបស់យោធាភូមាមួយកន្លែង នៅក្បែរព្រំដែនថៃ ដោយសម្លាប់កងកម្លាំងយោធាភូមាអស់ ១០នាក់ ក្នុងនោះរួមមានទាំងវរសេនីយ៍ទោមួយរូប ហើយខាងខ្លួនក៏បានបាត់បង់ជីវិតកងទ័ពម្នាក់ដែរ ។
បើគិតទាំងថ្ងៃសៅរ៍នេះផង ចំនួនអ្នកស្លាប់សរុបក្រោមការបង្ក្រាបដ៏ហិង្សាបង្ហូរឈាមពីសំណាក់យោធាភូមា មានដល់ទៅជាង ៤០០នាក់ហើយ ។
អ្នកតវ៉ាម្នាក់បាននិយាយថា «ពួកគេ [យោធា]សម្លាប់យើងដូចសត្វ ដូចមាន់អ៊ីចឹង សូម្បីតែនៅក្នុងផ្ទះរបស់យើង ។ ទោះជាយ៉ាងណា យើងនឹងបន្តតវ៉ាទៀត យើងនឹងប្រយុទ្ធទាល់តែរបបយោធាដួលរលំ» ៕
