កៅអីនាយករដ្ឋមន្ត្រីរបស់គណបក្សភឿថៃ អាចនឹងរបូតនៅចុងខែនេះ ឬដើមខែក្រោយ

រលកនិងព្យុះភ្លៀងនយោបាយនៅថៃ នឹងបោកខ្ទប់មកលើគណបក្សភឿថៃជាបន្តបន្ទាប់ចាប់តាំងពីដើមខែសីហា នេះ រហូតដល់ដើមខែកញ្ញា ខាងមុខ។ បញ្ហាប្រឈមដំបូងនៅក្នុងខែសីហា របស់គណបក្សកាន់អំណាចថៃ គឺតុលាការធម្មនុញ្ញបានសម្រេចដកសិទ្ធិសមាជិកសភាបក្សភឿថៃមកពីខេត្តឈៀងរ៉ៃ មួយរូប ហើយករណីបន្ទាប់គឺតុលាការកំពូលនឹងប្រកាសសាលក្រមនៅក្នុងសំណុំរឿងប្រមាថព្រះមហាក្សត្រ ប្រឆាំងនឹងអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលបានធ្វើឡើងនៅក្នុងបទសម្ភាសន៍ជាមួយប្រព័ន្ធផ្សព្វផ្សាយបរទេសមួយ។ ក្រៅពីនោះ គឺរឿងអាស្រូវដីធ្លីដែលពាក់ព័ន្ធនឹងលោក ភូមិថាម វិឆាយ៉ាឆៃ នាយករដ្ឋមន្រ្តីស្តីទី និងជារដ្ឋមន្ត្រីក្រសួងមហាផ្ទៃ។

ដោយឡែកករណីជម្លោះនយោបាយរវាងបក្សភឿថៃ និងគណបក្សភូមិចៃថៃ ក៏មានក្តីក្តាំកើតឡើងផងដែរ ដែលអាចនឹងធ្វើឱ្យប៉ះពាល់ដល់ជោគវាសនារបស់គណបក្សកាន់អំណាចមួយនេះ។ ចំពោះករណីលេចធ្លាយសារសំឡេងសន្ទនារវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងលោកស្រីនាយកដ្ឋមន្រ្តី ផៃថងថាន ស៊ីណាវ៉ាត្រា ដែលត្រូវតុលាការធម្មនុញ្ញព្យួរតំណែង ហើយត្រូវបានចោទប្រកាន់ថាបានរួមចំណែកដល់ការប៉ះទង្គិចគ្នារវាងយោធាកម្ពុជា និងថៃ ដែលបណ្តាលឲ្យទាហាន និងជនស៊ីវិលស្លាប់ និងរងរបួស ក៏ជាព្យុះសង្ឃរានយោបាយដ៏អាក្រក់សម្រាប់បក្សភឿថៃផងដែរ។

សាលក្រមនេះអាចមានផលប៉ះពាល់យ៉ាងខ្លាំងសម្រាប់បក្សភឿថៃ ដែលអាចជំរុញឱ្យមានការផ្លាស់ប្តូរតំណែងនាយករដ្ឋមន្ត្រី ការរំលាយសភា ឬវិបត្តិរដ្ឋធម្មនុញ្ញកើតឡើង ក្រោយសាលក្រមត្រូវបានប្រកាសនៅចុងខែនេះ ឬដើមខែក្រោយ។

សំណុំរឿងលោក ថាក់ស៊ីន គេចពីពន្ធនាគារមកសម្រាកនៅមន្ទីរពេទ្យប៉ូលិសនៅជាន់ទី១៤ ក៏ជារឿងក្តៅ រីឯសំណុំរឿងទាក់ទងនឹងកាបូបឌីជីថល ដែលកំពុងស្ថិតនៅក្រោមការត្រួតពិនិត្យ ដោយគណៈកម្មាធិការជាតិប្រឆាំងអំពើពុករលួយ ក៏ជារឿងដ៏ក្តៅគគុកសម្រាប់គណបក្សភឿថៃផងដែរ៕

ដោយៈ សរ សុជាតិ