អតិផរណាតម្លៃទំនិញប្រើប្រាស់ស្នូលនៅប្រទេសហ្វីលីពីន បានធ្លាក់ចុះមកត្រឹម៣,២% នៅក្នុងឆ្នាំ២០២៤ បើធៀបនឹងអត្រា៦% នៅក្នុងឆ្នាំ២០២៣។ ប៉ុន្តែតម្លៃអង្ករនៅប្រទេសនេះ នៅតែស្ថិតក្នុងកម្រិតខ្ពស់ បើទោះជារដ្ឋាភិបាលហ្វីលីពីន បានព្យាយាមកាត់បន្ថយពន្ធលើការនាំចូលអង្ករពី៣៥% មកនៅត្រឹម១៥% នៅឆ្នាំ២០២៤ យ៉ាងណាក៏ដោយ។
បើយោងតាមទិន្នន័យរបស់រដ្ឋាភិបាលហ្វីលីពីន អង្ករលក់រាយនៅហ្វីលីពីនបច្ចុប្បន្នមានតម្លៃចន្លោះពី០,៧២ដុល្លារ ដល់០,៩៣ដុល្លារក្នុង១គីឡូក្រាម អាស្រ័យលើគុណភាពអង្ករ ដែលមានកម្រិតប្រហាក់ប្រហែលនឹងឆ្នាំ២០២៤។ អាជ្ញាធរបានបន្ទោសអ្នកនាំចូល និងអ្នកលក់ដុំអង្ករចំពោះការកេងចំណេញលើការបន្ទាបពន្ធនាំចូលរបស់ខ្លួន។
ទោះជាយ៉ាងណា រដ្ឋាភិបាលហ្វីលីពីន នៅដើមសប្តាហ៍នេះ បានប្រកាសពីស្ថានភាពអាសន្នសម្រាប់សន្តិសុខស្បៀងរបស់ខ្លួន ដែលជំរុញឱ្យរដ្ឋាភិបាលត្រូវបង្ខំចិត្តបញ្ចេញអង្ករពីក្នុងស្តុក ដើម្បីបំពេញតម្រូវការក្នុងទីផ្សារ ប៉ុន្តែមិនបានបញ្ជាក់អំពីចំនួន និងពេលវេលាច្បាស់លាស់នោះទេ។
លោក សូនី អាហ្វ្រ៊ីខា (Sonny Africa) នាយកប្រតិបត្តិនៃមូលនិធិ IBON មិនរកប្រាក់ចំណេញក្នុងស្រុកមួយបានប្រាប់នីកេអេស៊ាថា តម្លៃអង្ករអាចធូរស្រាលជាងមុនដោយសារតែវិធានការនេះ ព្រោះវានឹងជួយជំរុញកំណើនផ្គត់ផ្គង់អង្ករនៅក្នុងទីផ្សារ ប៉ុន្តែថា វិធានការសង្គ្រោះបន្ទាន់នេះទំនងជាមិនអាចដោះស្រាយបញ្ហាផលិតភាពកសិកម្មជាទូទៅបានឡើយ។
គួរបញ្ជាក់ថា ប្រទេសហ្វីលីពីន ជាអ្នកនាំចូលអង្ករលំដាប់កំពូលមួយរបស់ពិភពលោក ដោយប្រទេសនេះបាននាំចូលអង្ករជិត៥លានតោន កាលពីឆ្នាំមុន ខណៈដែលផលិតកម្មក្នុងស្រុកជួបការលំបាកដោយសារព្យុះទីហ្វុងបំផ្លិចបំផ្លាញ៕
អត្ថបទ៖ សុខ មង្គល
