អ្នកនាំពាក្យក្រសួងការពារជាតិហ្វីលីពីនលោក អាសេនីអូ អេនឌូឡុង (Arsenio Andolong) បាននិយាយនៅក្នុងសេចក្តីថ្លែងការណ៍មួយ ដែលចេញផ្សាយដោយទីភ្នាក់ងារព័ត៌មានជាតិរបស់ហ្វីលីពីនថា រដ្ឋាភិបាលហ្វីលីពីនកំពុងអនុវត្តជាផ្លូវការនូវការលុបចោលកិច្ចសន្យាជាមួយក្រុមហ៊ុន សូធិកណូ អិចស៍ផត (SovtechNoexport) របស់រុស្ស៊ី សម្រាប់ការទិញឧទ្ធម្ភាគចក្រ M-17 ចំនួន ១៦ គ្រឿង។
លោក Andolong បាននិយាយថា ហ្វីលីពីនក៏កំពុងរៀបចំផ្តើមកិច្ចសន្ទនាការទូតជាមួយរុស្ស៊ីទាក់ទងនឹងបញ្ហាមួយចំនួនពាក់ព័ន្ធនឹងការលុបចោលគម្រោងនេះផងដែរ ដោយបានបន្ថែមថាការប្រែប្រួលស្ថានការវិវត្តនយោបាយសកលសំខាន់ៗមួយចំនួន គឺជាមូលហេតុដែលបណ្តាលឱ្យមានការលុបចោលគម្រោងទិញឧទ្ធម្ភាគចក្ររបស់រដ្ឋាភិបាលហ្វីលីពីនកាលពីអាណត្តិមុននេះ។
រដ្ឋមន្ត្រីការពារជាតិហ្វីលីពីនលោក ដែលហ្វីន ឡូរ៉េនហ្សាណា (Delfin Lorenzana) បានប្រាប់ទីភ្នាក់ងារព័ត៌មាន The Associated Press ថា រដ្ឋាភិបាលកំពុងលុបចោលកិច្ចព្រមព្រៀងក្នុងទឹកប្រាក់ចំនួនជាង ៣២២ លានដុល្លារ ដោយសារតែព្រួយបារម្ភចំពោះការដាក់ទណ្ឌកម្មរបស់សហរដ្ឋអាមេរិក។ ហើយការសម្រេចចិត្តនេះ ត្រូវបានអនុម័តយល់ព្រមដោយអតីតប្រធានាធិបតីហ្វីលីពីនលោក Rodrigo Duterte ដែលរដ្ឋបាលរបស់លោកធ្លាប់បានចុះហត្ថលេខាលើកិច្ចសន្យាដើម្បីទិញឧទ្ធម្ភាគចក្រទាំងនេះកាលពីខែវិច្ឆិកា ឆ្នាំ២០២១។
អត្ថបទគួរអាន
រដ្ឋមន្ត្រីការពារជាតិហ្វីលីពីន បានបញ្ជាក់ទៀតថា បច្ចុប្បន្នរដ្ឋាភិបាលកំពុងខិតខំប្រឹងប្រែង ដើម្បីធ្វើយ៉ាងណាទាមទារប្រាក់កក់ប្រហែលជិត៥០លានដុល្លារ ពីរុស្ស៊ីមកវិញ ដែលប្រាក់កកនេះ ធ្លាប់បានផ្ដល់ជូនទៅឲ្យរុស្ស៊ីកាលពីខែមករាកន្លងទៅនេះ។
គួរបញ្ជាក់ថា អ្នកដែលទិញសព្វាវុធពីរុស្ស៊ីអាចនឹងត្រូវរងទណ្ឌកម្មក្រោមច្បាប់របស់អាមេរិកស្ដីពីការប្រឆាំងនឹងសត្រូវរបស់អាមេរិក តាមរយៈច្បាប់ទណ្ឌកម្ម ដោយច្បាប់នេះ ត្រូវបានអនុម័តក្នុងឆ្នាំ២០១៧ ក្នុងចេតនាបំបាក់ទឹកចិត្តរដ្ឋាភិបាល ឬអង្គភាពណាដែលទទួលបានអាវុធក៏ដូចជាឧបករណ៍យោធានានា ពីគូសត្រូវរបស់អាមេរិកមានដូចជាអ៊ីរ៉ង់ កូរ៉េខាងជើង និងរុស្ស៊ីជាដើម។
ឧទ្ធម្ភាគចក្រដឹកជញ្ជូនប្រភេទ Mi-17 ដែលបានបញ្ជាទិញពីរុស្ស៊ីទាំងនេះ គឺជាធាតុផ្សំដ៏សំខាន់នៃយោធាហ្វីលីពីន ដោយសារហ្វីលីពីនគឺជាប្រទេសប្រជុំកោះ ដែលមានកោះជាង 7,000 ហើយត្រូវបានហ៊ុមព័ទ្ធដោយគ្រោះមហន្តរាយធម្មជាតិ និងការបះបោរ ដែលកំពុងបន្តកើតមាន។ ឧទ្ធម្ភាគចក្រដឹកជញ្ជូនដែលមានស្រាប់តែងតែចូលរួមក្នុងប្រតិបត្តិការជួយសង្គ្រោះ ឬដឹកជញ្ជូនកងទ័ព និងឧបករណ៍ផ្សេងៗផងដែរ ហើយវាជាមធ្យោបាយដ៏សំខាន់សម្រាប់ហ្វីលីពីន៕
