របាយការណ៍របស់នាយកដ្ឋានសេវាកម្មកសិកម្មបរទេស (USDA-FAS) បានព្យាករថា ការនាំចូលអង្កររបស់ប្រទេសហ្វីលីពីន នឹងឈានដល់កម្រិតខ្ពស់បំផុត ៣លានតោននៅចុងឆ្នាំនេះ ដែលវាជាចំនួនមួយខ្ពស់បំផុតលើពិភពលោក ។
នាពេលថ្មីកន្លងទៅនេះ ប្រទេសចិនត្រូវបានគេដឹងថា គឺជាអ្នកនាំចូលអង្ករពីក្រៅប្រទេសច្រើនជាងគេបំផុតមួយ ដោយប្រទេសតំបន់អាស៊ី ដែលមានដង់ស៊ីតេប្រជាជន ១,៤ពាន់លាននាក់មួយនេះ ត្រូវបានគេរំពឹងថា នឹងនាំចូលអង្ករប្រមាណ ២,៥លានតោន នៅឆ្នាំនេះ។
តាមការប៉ាន់ប្រមាណរបស់ USDA-FAS បានឲ្យដឹងថា ប្រទេសហ្វីលីពីននឹងបង្កើនការនាំចូលអង្កររហូតដល់ទៅ ៥៨% ដល់ចំនួនសរុប ៣លានតោន កើនឡើងពី ១,៩លានតោនកាលពីឆ្នាំមុន ហើយបើធៀបនឹងឆ្នាំ២០១៧ ឃើញថា កើនឡើងដល់ ទៅ ២៧៥%ឯណោះ។
អត្ថបទទាក់ទង
ការកើនឡើងខ្លាំងនៃការនាំចូលអង្ករពីបរទេសចូលទៅក្នុងប្រទេសហ្វីលីពីននេះ គឺ ដោយសារតែមានការអនុម័តច្បាប់ពន្ធនាំចូលអង្ករ កាលពីខែមីនា កន្លងទៅ ដែលវាបានបើកចំហទ្វា ឲ្យប្រទេសផលិតអង្ករ អាចនាំចូលអង្ករទៅកាន់ប្រទេសហ្វីលីពីន ដោយគ្មានកំណត់។ ជាមួយនឹងគោលនយោបាយថ្មីនេះ ឥឡូវនេះ ឈ្មួញនាំចូលអង្ករ ត្រូវបានអនុញ្ញាត ឲ្យនាំចូលអង្ករ ដោយមិនគិតពីបរិមាណ ដរាបណាពួកគេអាចទទួលបានការអនុញ្ញាតចាំបាច់ និងបង់ពន្ធគយ ៣៥%។
ទំហំបរិមាណអង្ករនាំចូលទៅហ្វីលីពីន តាំងពីខែមីនាមក មិនទាន់មានការថយចុះនៅឡើយទេ បើទោះបីជាទិន្នន័យពីអាជ្ញាធរហ្វីលីពីន បង្ហាញថា ប្រទេសនេះ ត្រូវការនាំចូលអង្ករប្រមាណ១,៩លានតោន ប៉ុណ្ណោះ ដើម្បីបំពេញតម្រូវការក្នុងស្រុកក៏ដោយ។
កាសែត The Nation របស់ថៃ បានស្រង់សម្ដីអ្នកសេដ្ឋកិច្ចយល់ឃើញថា ការផ្លាស់ប្ដូរនូវគោលនយោបាយនេះ នឹងនាំមកនូវការធ្លាក់ចុះតម្លៃអង្ករលើទីផ្សារ។
នៅត្រឹមខែតុលា កន្លងទៅនេះ ការិយាល័យគយហ្វីលីពីន បាននិយាយថា មានអង្ករខ្លះនៃបរិមាណសរុប១,៩លានតោន ត្រូវបាននាំចូលក្នុងប្រទេស ធ្វើឲ្យស្ដុកអង្ករហ្វីលីពីន កើនដល់ ២,២៨លានតោន។ ចំនួននេះ គឺមានខ្ពស់ជាង ៤៣,៤% កាលពីឆ្នាំមុន ដែលមាន ១,៥៩ លានតោន ។
ប្រទេសហ្វីលីពីន ត្រូវបានគេដឹងទៀតថា មានតម្រូវការអង្ករប្រចាំថ្ងៃ ជាមធ្យម ៣,២ម៉ឺនតោន ហើយស្ដុកអង្ករចុងក្រោយនៃប្រទេសនេះ គឺអាចផ្គត់ផ្គង់ការប្រើប្រាស់បាន រយៈពេល ៧១ថ្ងៃ។ ទោះយ៉ាងណា USDA-FAS រំពឹងទុកថា ការនាំចូលអង្កររបស់ហ្វីលីពីន នឹងធ្លាក់ចុះវិញនៅឆ្នាំក្រោយ ចំពេលដែលការផ្គត់ផ្គង់មានហួសកម្រិត និងផលិតកម្មក្នុងស្រុកមានភាពប្រសើរឡើងជាងមុន៕
