រដ្ឋបាលរាជធានីភ្នំពេញ បានចេញសេចក្ដី ជូនដំណឹងនៅថ្ងៃទី ១២ ខែតុលា ឆ្នាំ២០២០នេះ ថា ចាប់តាំងពីថ្ងៃទី ០២ ខែតុលា ឆ្នាំ២០២០ រហូតមកទល់បច្ចុប្បន្ននេះ កម្មករផ្នែកបើកបរ និងប្រមូលសំរាម របស់ក្រុមហ៊ុន ស៊ីនទ្រី នៅតែបន្ដធ្វើកូដកម្ម មិនចេញប្រមូលសំរាមនៅឡើយ លើកលែងតែកម្មករផ្នែកបោសសម្អាតផ្លូវប៉ុណ្ណោះ ដែលបានចូលធ្វើការវិញ កាលពីថ្ងៃទី ១០ ខែតុលាឆ្នាំ២០២០។
រដ្ឋបាលរាជធានីភ្នំពេញបានអំពាវនាវឲ្យកម្មករនិយោជិតទាំងអស់របស់ក្រុមហ៊ុន ស៊ីនទ្រី ចូលធ្វើការងារឡើងវិញ កុំបន្ដធ្វើកូដកម្មតទៅទៀត ដែលឲ្យនាំឲ្យបាត់បង់ប្រាក់អត្ថប្រយោជន៍នានារបស់ពួកគេ ដែលច្បាប់បានកំណត់។
ដើម្បីដោះស្រាយបញ្ហានេះ រដ្ឋបាលរាជធានីភ្នំពេញ ក៏កំពុងចាត់វិធានការ ដោយប្រើប្រាស់កម្លាំងសរុប និងមធ្យោបាយសរុបជាបន្ដបន្ទាប់ ដើម្បីប្រមូលសំរាម ដែលមានការកកស្ទះនៅរាជធានីភ្នំពេញ ឲ្យអស់ពីសមត្ថភាពលទ្ធភាព ដែលមាន។
អត្ថបទទាក់ទង!
សូមបញ្ជាក់ថា ពលរដ្ឋនៅរាជធានីភ្នំពេញ បានសម្ដែងនូវក្ដីព្រួយបារម្ភពីបញ្ហាសុខភាព និងសុវត្ថិភាពរបស់ពួកគេ នៅអំឡុងពេលដែលសំរាម មិនមានអ្នកប្រមូលទាន់ពេលវេលាដែលធ្វើឲ្យមានការកកស្ទះ នៅតាមមុខផ្ទះ និងដងផ្លូវ ស្របពេលដែលបញ្ហាជំនន់ទឹកភ្លៀងកំពុងក្លាយជាបន្ទុកបន្ថែមមួយទៀត ដែលធ្វើឲ្យមានការលំបាកដល់ពួកគេ។ ហើយពេល ដែលសំរាមមិនមានអ្នកប្រមូល និងភ្លៀងលិចនោះ បានធ្វើឲ្យសំរាមរសាត់ហូររាយប៉ាយ ធ្វើឲ្យខូចសោភណភាពទីក្រុង និងអាចបង្កជាបញ្ហាមេរោគឆ្លងដល់សុខភាពមនុស្ស និងសត្វផងដែរ៕
None
