ថ្លែងនៅក្នុងកិច្ចប្រជុំពិនិត្យ និងអនុម័តលើសេចក្ដីព្រាងចុងក្រោយ នៃកិច្ចព្រមព្រៀងក្របខណ្ឌ នៃគម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញ ជាមួយលោក Alex Sanford អ្នកប្រឹក្សាយោបល់ផ្នែកច្បាប់អន្តរជាតិ តាមរយៈប្រព័ន្ធវីដេអូពីចម្ងាយកាលពីថ្ងៃទី២១ ខែធ្នូ ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ថា តាមរយៈការអភិវឌ្ឍមជ្ឈមណ្ឌលភស្ដុភារកម្មភ្នំពេញនឹងលើកស្ទួយវិស័យដឹកជញ្ជូនឱ្យកាន់តែមានប្រសិទ្ធភាព និងមានលក្ខណៈប្រកួតប្រជែងជាមួយនឹងប្រទេសក្នុងតំបន់ និងសកលលោកទាំងតម្លៃ និងសេវាកម្ម និងជាកម្លាំងចលករជួយជំរុញកំណើនសេដ្ឋកិច្ចកម្ពុជាឱ្យកាន់តែរីកចម្រើន និងសម្រេចបាននូវចក្ខុវិស័យរបស់រាជរដ្ឋាភិបាលក្នុងការអភិវឌ្ឍកម្ពុជាជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ ២០៥០។
អត្ថបទទាក់ទង!
ជុំវិញនឹងគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញនេះ ត្រូវបានអ្នកជំនាញនៅក្នុងវិស័យដឹកជញ្ជូននៅកម្ពុជាបង្ហាញពីការគាំទ្រ និងបានអះអាងថា វត្តមាននៃការបង្កើតមជ្ឈមណ្ឌលភ័ស្តុភារកម្មភ្នំពេញនឹងធ្វើឲ្យវិស័យដឹកជញ្ជូននៅកម្ពុជាមានការអភិវឌ្ឍកើនឡើងថែមមួយកម្រិតទៀតនៅឆ្នាំខាងមុខ។
លោក ស៊ិន ចន្ធី ប្រធានសមាគមភស្តុភារកម្មកម្ពុជាថ្លែងថា ក្រុមហ៊ុនវិស័យឯកជនពិតជាគាំទ្រ និងចង់ឲ្យគម្រោងអភិវឌ្ឍន៍មជ្ឈមណ្ឌលភ័ស្តុភាកម្មភ្នំពេញចេញឲ្យបានកាន់តែឆាប់កាន់តែល្អ ស្របទៅនឹងសន្ទុះនៃការរីកចម្រើនវិស័យដឹកជញ្ជូនក្នុងបរិការណ៍បច្ចុប្បន្ន ក៏ដូចជានៅអំឡុងពេលក្រោយពីជំងឺកូវីដ ១៩ ត្រូវបានបញ្ចប់ទៅវិញ ដោយគិតថាវិស័យដឹកជញ្ជូននឹងមានសកម្មភាពស្ទុះខ្លាំងជាងមុន។
លោក ស៊ិន ចន្ធី បន្តថា តាមរយៈ គម្រោងនេះ វាពិតជាសំខាន់និងចាំបាច់ក្នុងការជួយសម្រួលដល់ការងារដឹកជញ្ជូនទំនិញកាន់តែងាយស្រួល និងឆាប់រហ័ស ដោយសារតែមជ្ឈមណ្ឌលនេះ ជាកន្លែងប្រមូលផ្តុំទាំងសេវាកម្មក្រុមហ៊ុន និងការបំពេញបែបបទរដ្ឋបាលផ្សេងៗត្រូវស្ថិតនៅនឹងកន្លែងតែមួយ។
សូមជម្រាបថា មជ្ឈមណ្ឌលភស្តុភារកម្មភ្នំពេញដែលគ្រោងនឹងបង្កើតឡើងនេះ លាតសន្ធឹងលើផ្ទៃដីជិត ១០០ហិកតា ដែលជាទីតាំងយុទ្ធសាស្ដ្រមួយតភ្ជាប់ទៅកាន់កំពង់ផែសមុទ្រទឹកជ្រៅក្នុងខេត្តព្រះសីហនុ និងផ្លូវដែកភាគខាងជើងដែលចេញពីរាជធានីភ្នំពេញឆ្ពោះទៅកាន់ក្រុងប៉ោយប៉ែតព្រំដែនប្រទេសថៃ៕
None
