សហរដ្ឋអាមេរិកកាលពីសប្ដាហ៍មុននេះ បានឈានដល់ពិដានបំណុល ៣១,៤ទ្រីលានដុល្លារ បន្ទាប់ពីទិន្នន័យចុងក្រោយទាក់ទងនឹងអតិផរណា បង្ហាញថា តម្លៃអ្នកប្រើប្រាស់នៅតែមានអត្រា ៦,៥% ខ្ពស់ជាងតម្លៃមូលដ្ឋានប្រចាំឆ្នាំ។
ទន្ទឹមគ្នានឹងស្ថានភាពអតិផរណានៅតែស្ថិតក្នុងកម្រិតខ្ពស់ គួបផ្សំនឹងបញ្ហាបំណុលរបស់រដ្ឋាភិបាលអាមេរិកកើនដល់កម្រិតពិដានដែលបានកំណត់នោះ គេសង្កេតឃើញថា មាស បានហក់ឡើងថ្លៃ១៥% និងប្រាក់ បានឡើងថ្លៃ ២១% នៅក្នុងរយៈពេល ៣ខែចុងក្រោយនេះ ដោយសារតែភាគហ៊ុនបានធ្លាក់ចុះ ទាញទម្លាក់តម្លៃគោលសំខាន់ៗនៅក្នុងទីផ្សារ ហើយប្រាក់ដុល្លារអាមេរិកក៏បានធ្លាក់ចុះមកនៅត្រឹម ០,៨១ដុល្លារ ធៀបនឹងប្រាក់ផោនអង់គ្លេស និង ០,៩២ដុល្លារ ធៀបនឹងប្រាក់អឺរ៉ូ។
នៅក្នុងកិច្ចសម្ភាសន៍មួយ ជាមួយនឹងទូរទស្សន៍ Fox News លោក Janathan Rose ប្រធាននាយកប្រតិបត្តិក្រុមហ៊ុនជួញដូរមាស Genesis Gold Group បាននិយាយថា កម្លាំងជំរុញចម្បងនៅពីក្រោយការកើនឡើងនៃទីផ្សារមាស និងប្រាក់នោះ គឺតម្លៃប្រាក់ដុល្លារអាមេរិកថមថយចុះ បញ្ហាអតិផរណា និងគោលនយោបាយរូបិយវត្ថុរបស់រដ្ឋាភិបាលសហព័ន្ធ។
អត្ថបទគួរអាន
លោកបន្ថែមថា ការចំណាយរបស់រដ្ឋាភិបាលអាមេរិក គឺជាបញ្ហាដ៏ធំមួយសម្រាប់សុខភាពសេដ្ឋកិច្ចរបស់ប្រទេសសេដ្ឋកិច្ចទី១ក្នុងពិភពលោកមួយនេះ ហើយឥឡូវនេះ រដ្ឋាភិបាលកំពុងប្រឈមនឹងការខ្វះសាច់ប្រាក់ដើម្បីចំណាយ ដោយសារតែកម្រិតបំណុលបានឈានមកដល់ពិដានដែលបានកំណត់រួចទៅហើយ។ ប្រសិនបើ រដ្ឋាភិបាលសហព័ន្ធបរាជ័យលើការទទួលបានកម្ចីបន្ថែម ដើម្បីបន្ដការចំណាយរបស់ខ្លួន នោះវានឹងបំផ្លាញជំនឿចិត្តអ្នកវិនិយោគ ហើយវានឹងអាចធ្វើឲ្យប្រាក់ដុល្លារអាមេរិកធ្លាក់ដាំក្បាលចុះជាបន្ដបន្ទាប់។
អ្នកជំនាញរូបនេះ សង្កត់ធ្ងន់ថា បរិយាកាសទាំងនេះហើយ នឹងអាចនឹងបង្កើតឱកាសដ៏ល្អសម្រាប់ការបែងចែកមូលនិធិ ដោយក្រុមអ្នកវិនិយោគលើទីផ្សារ ងាកទៅរកការវិនិយោគជួញដូរលើលោហធាតុមានតម្លៃដូចជាមាស និងប្រាក់ជំនួសវិញ។
សារព័ព័ត៌មាន Online Kitco បានធ្វើការស្ទង់មតិបង្ហាញថា វិនិយោគិនអាចនឹងមើលឃើញតម្លៃ ប្រាក់អាចកើនឡើង៥០% នៅក្នុងឆ្នាំ២០២៣ ដោយអាចមានតម្លៃដល់ ៣៨ដុល្លារក្នុងមួយអោន ឬស្មើនឹងជាង៨ជីប្រាក់ ខណៈដែលមាសវិញ អាចនឹងកើនតម្លៃដល់កម្រិតខ្ពស់បំផុត ២.១០០ដុល្លារក្នុងមួយអោន ឬស្មើនឹងជាង៨ជីមាស៕
