ដោយសារការព្រួយបារម្ភអំពីការជាប់គាំងកើនឡើងច្រើនក្នុងវិស័យមួយចំនួន រដ្ឋាភិបាលប៉េកាំង គ្រោងនឹងជំរុញសកម្មភាពសេដ្ឋកិច្ចតាមរយៈការកាត់បន្ថយពន្ធថ្មីៗ និងការបន្ធូរបន្ថយគោលនយោបាយរូបិយវត្ថុ។
ផែនការខាងលើនឹងត្រូវប្រកាស មុនពេលចាប់ផ្តើមសមាជជាតិរបស់បក្សកុម្មុយនិស្តចិន នៅរដូវស្លឹកឈើជ្រុះ ឆ្នាំ២០២២ ខណៈដែលកិច្ចប្រជុំនេះធ្វើឡើងរៀងរាល់ប្រាំឆ្នាំម្តង។
ដោយឡែក គោលដៅកំណើនសេដ្ឋកិច្ច របស់រដ្ឋាភិបាល សម្រាប់ឆ្នាំ២០២២ទាំងមូល នឹងត្រូវ ប្រកាសនៅក្នុងរបាយការណ៍សកម្មភាពប្រចាំឆ្នាំ នៃកិច្ចប្រជុំសភាប្រជាជនជាតិចិន ដែលនឹងធ្វើឡើងនៅខែមីនាឆ្នាំក្រោយ។
ប៉ុន្តែបើតាមប្រភពពីរដ្ឋាភិបាលចិន ប្រាប់ Nikkei ដោយសុំមិនបញ្ចេញឈ្មោះថា ប៉េកាំកំពុងប្រឹងប្រែងរៀបចំគោលនយោបាយថ្មីៗ និងកំពុងសិក្សាពីព្យាករទម្លាក់កំណើនសេដ្ឋកិច្ចនៅឆ្នាំក្រោយ តាមរយៈការកាត់បន្ថយពន្ធលើវិស័យឯកជន ដើម្បីបន្ធូរបន្ថយចរន្តហិរញ្ញវត្ថុ ការបន្ថយអត្រាការប្រាក់ពីធនាគារកណ្តាលចិនជាដើម។ បន្ថែមពីលើនេះ រដ្ឋាភិបាលក៏ចង់កែសម្រួលបទប្បញ្ញត្តិដ៏តឹងតែងរបស់ខ្លួនលើទីផ្សារអចលនទ្រព្យ ដែលជាផ្នែកមួយនៃផែនការក្នុងការជំរុញសកម្មភាពសេដ្ឋកិច្ចផងដែរ។
អត្ថបទគួរអាន
គួរជម្រាបថា សេដ្ឋកិច្ចចិនមានការកើនឡើងក្នុងរង្វង់ ៨%ក្នុងឆ្នាំ២០២១ ដែលអត្រាកំណើននេះ បានលើសពីគោលដៅកំណត់របស់ទីក្រុងប៉េកាំងទៅទៀត។ មូលហេតុចម្បងដែលធ្វើឲ្យកំណើនមានច្រើនជាងការរំពឹងទុក គឺដោយសារតែមានកំណើន ១២,៧% ដែលសម្រេចបានក្នុងអំឡុងខែមករាដល់ខែមិថុនា ។ ប៉ុន្តែកំណើនសេដ្ឋកិច្ចរបស់ប្រទេសចិនបានធ្លាក់ចុះមកវិញ ក្នុងឆមាសទីពីរនៃឆ្នាំ ២០២១ ហើយអ្នកសេដ្ឋកិច្ចមួយចំនួនរំពឹងថា តួលេខនេះនឹងធ្លាក់ចុះដល់ក្រោម ៤% ពីខែតុលាដល់ខែធ្នូ។
ក្នុងករណីមិនមានការស្ទុះងើបឡើងវិញភ្លាមៗនៅចុងឆ្នាំ២០២១នេះទេ អ្នកវិភាគបានព្យាករណ៍ថា សេដ្ឋកិច្ចចិននឹងកើនឡើងពី ៥% ទៅ ៥,៥%ប៉ុណ្ណោះ ក្នុងឆ្នាំ ២០២២។ ជាមួយគ្នានេះ ធនាគារកណ្តាលចិនបានប៉ាន់ប្រមាណសក្តានុពលនៃអត្រាកំណើនរបស់សេដ្ឋកិច្ចប្រទេសចិន ថា មានក្នុងកម្រិត ៥,៥% សម្រាប់ឆ្នាំ ២០២២ដូចគ្នាដែរ៕
None
