លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិ ក្រុមហ៊ុន ម៉េងលី ជេ. គួច អេឌ្យូខេសិន បានឲ្យដឹងថា ថ្មីៗនេះ សមាគមគ្រឹះស្ថានឧត្ដមសិក្សាកម្ពុជា បានកោះប្រជុំសមាជិកជាគ្រឹះស្ថានសិក្សាអប់រំឯកជនចំនួន ១១៣ ដោយពួកគេបានត្អូញត្អែរថា បន្ទាប់ពីផ្អាកសេវាអប់រំដោយសារការឆ្លងរាតត្បាតនៃវីរុសកូវីដ១៩ តាំងពីពាក់កណ្ដាលខែមីនា ឆ្នាំ២០២០មក ពួកគេបានជួបការលំបាកនិងផលប៉ះពាល់យ៉ាងខ្លាំង និងបានអំពាវនាវឲ្យមានដំណោះស្រាយ។
លោកឧកញ៉ាវេជ្ជបណ្ឌិតបានបន្តថា បញ្ហាធំៗបីដែលគ្រឹះស្ថានសិក្សាអប់រំឯកជនកំពុងប្រឈមខ្លាំង រួមមាន ការត្រូវបន្តបើកប្រាក់បៀវត្សរ៍ដល់បុគ្គលិក បន្តបង់ឈ្នួលអគារ បន្តបង់ការប្រាក់និងប្រាក់ដើមដែលបានខ្ចីពីធនាគារ ជាដើម។
លោកឧកញ៉ា វេជ្ជបណ្ឌិត គួច ម៉េងលី បាននិយាយយ៉ាងដូច្នេះថា "ប្រសិនបើយើងអត់ដោះស្រាយទេ ពួកយើងគិតថា ស្ថាប័នឯកជនមួយចំនួនច្រើន នឹងក្ស័យទុន ហើយបើសិនជាក្ស័យទុន វានឹងប៉ះពាល់ដល់វិស័យអប់រំ ដ៏ធ្ងន់ធ្ងរ។"
លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិ ក្រុមហ៊ុន ម៉េងលី ជេ. គួច អេឌ្យូខេសិន
អត្ថបទទាក់ទង
លោកវេជ្ជបណ្ឌិតបន្តថា "សាលាឯកជនគឺជាដៃគូអភិវឌ្ឍន៍របស់រដ្ឋ ប្រសិនបើគ្មានសាលាឯកជនទេ មិនដឹងសិស្សទៅណាទេ។ បើតាមការស្ទង់មតិយោបល់ ប្រហែលជាអាចលើសពី ៥០% ដែលនឹងក្ស័យទុន ពីព្រោះចាប់ពីឥឡូវទៅ គ្នាអត់មានលុយបង់ទៅហើយ"។
កន្លងមក នាយករដ្ឋមន្ត្រីសម្ដេចតេជោ ហ៊ុន សែន បានអំពាវនាវដល់ម្ចាស់ផ្ទះ ឬម្ចាស់អគារ ឲ្យមានការចរចាគ្នាយោគយល់បញ្ចុះតម្លៃឈ្នួលផ្ទះ ឬអគារ ក្នុងកាលៈទេសៈលំបាកដែលបណ្ដាលមកពីការរីករាលដាលនៃវីរុសកូវីដ១៩នេះ។ ប៉ុន្តែ លោកឧកញ៉ា វេជ្ជបណ្ឌិត គួច ម៉េងលី បាននិយាយថា ការចរចាជាមួយម្ចាស់អគារ ឬម្ចាស់ផ្ទះ ហាក់គ្មានប្រសិទ្ធភាពឡើយ ពីព្រោះម្ចាស់ផ្ទះភាគច្រើនពុំព្រមបញ្ចុះតម្លៃឈ្នួលទេ។
លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយក Westline Education Group បានប្រាប់ ខេមបូណូមីស ថា ប្រសិនបើបញ្ហានេះនៅតែអូសបន្លាយយូរទៀត "ខ្ញុំអាចនិយាយបានថា ក្នុងចំណោមសាលាឯកជន អាចមានសាលាខ្លះ ត្រូវបិទមួយរយៈ" ហើយបុគ្គលិកជាច្រើនអាចបាត់បង់ការងារធ្វើ ជាពិសេស គ្រូបង្រៀនដែលធ្វើការងារក្នុងវិស័យឯកជនសុទ្ធ។
លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយក Westline Education Group
លោក បូឡែន បានបន្ថែមថា សាលារៀនមួយចំនួនដែលមានកម្មវិធីបង់ប្រាក់ថ្លៃសាលាជាប្រចាំឆ្នាំ ពួកគេមិនសូវប្រឈមបន្ទាន់ខ្លាំងនោះទេ ប៉ុន្តែ ចំពោះសាលារៀនជាច្រើនដែលមានកម្មវិធីបង់ថ្លៃសាលាជាប្រចាំខែ ឬប្រចាំត្រីមាស កំពុងជួបបញ្ហាលំបាកខ្លាំង និងថា សូម្បីតែនៅពេលនេះ សាលាខ្លះ ពុំមានលទ្ធភាពបើកប្រាក់បៀវត្សរ៍ឲ្យគ្រូគ្រប់ចំនួនផងទេ សម្រាប់ខែមីនា និងខែមេសានេះ។
លោក ប៉ិច បូឡែន ជាប្រធានសហព័ន្ធសេវាអប់រំនៃកម្ពុជា ដែលមានសាលារៀនជាសមាជិកជិត ១០០នៅទូទាំងប្រទេស បាននិយាយដូច្នេះថា "កុំថាឡើយដល់ទៅមួយឆ្នាំ ត្រឹមតែបី ឬបួនខែទៀត អាចមានសាលារៀនខ្លះនឹងបិទ ហើយអ្នកដែល suffer រងគ្រោះជាងគេនោះ គឺ បុគ្គលិកនិងគ្រូបង្រៀនដែលនឹងប៉ះពាល់ការងារ"។
ប៉ុន្តែ ទោះយ៉ាងណា លោក ប៉ិច បូឡែន បានទទួលស្គាល់នូវការខិតខំខ្នះខ្នែងដោះស្រាយរបស់រដ្ឋាភិបាល និងថា ក្នុងដំណាក់កាលដ៏លំបាកនេះ មានតែវិស័យឯកជនខ្លួនឯង ជាពិសេស ម្ចាស់ផ្ទះ ម្ចាស់សាលា បុគ្គលិក គ្រូ និងអាណាព្យាបាលសិស្ស ត្រូវរួមគ្នារិះរកដំណោះស្រាយ ដោយការយល់យោគគ្នា ដើម្បីយើងអាចឆ្លងកាត់ដំណាក់កាលនេះ។
គួរបញ្ជាក់ថា កាលពីថ្ងៃទី៦ ខែមេសា ឆ្នាំ២០២០ សមាគមគ្រឹះស្ថានឧត្ដមសិក្សាកម្ពុជា បានជួប្រជុំគ្នាជាមួយសមាជិកជាគ្រឹះស្ថានសិក្សាអប់រំឯកជន ចំនួន ១១៣ស្ថាប័ន ក្នុងនោះ សមាជិកភាគច្រើនបំផុតបានលើកឡើងពីហានិភ័យនៃការក្ស័យធន ប្រសិនបើគ្មានអន្តរាគមន៍ទាន់ពេលវេលា និងសមស្របទេនោះ៕
None
