ប្រមុខដឹកនាំរុស្ស៊ី គឺលោក វ្ល៉ាឌីមៀ ពូទីន បានធ្វើដំណើរទៅកាន់ទីក្រុងប៉េកាំងចូលរួម បើកព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំងប្រទេសចិននាសប្ដាហ៍មុននេះ។ នៅក្នុងព្រឹត្តិការណ៍នោះ ក៏ជាឱកាសដែលមេដឹកនាំចិន និងរុស្ស៊ី បាននិយាយរិះគន់អាមេរិកខ្លាំងៗ ទៅលើបញ្ហាមួយចំនួន ពិសេសគឺបញ្ហា ប្រណាំងប្រជែងអាវុធនៅក្នុងតំបន់អាស៊ីប៉ាស៊ីហ្វិកតែម្ដង ដោយរុស្ស៊ី និងចិន ចោទថាអាមេរិក គឺជាមេភ្លើងដែលធ្វើឲ្យមានបញ្ហានេះ។
លោក វ្ល៉ាឌីមៀ ពូទីន និង លោកស៊ី ជីនពីង ក៏បានលើកឡើងប្រឆាំងនឹងការពង្រីកខ្លួនរបស់អង្គការណាតូ នៅក្នុងតំបន់អឺរ៉ុបខាងកើតផងដែរ ខណៈដែលបច្ចុប្បន្ន ភាពតានតឹងរវាងរុស្ស៊ី និងអ៊ុយក្រែននៅតែមិនទាន់ធូរស្រាលនៅឡើយទេ ដោយបច្ចុប្បន្នរុស្ស៊ីបានបញ្ជូនទ័ពជាង ១០ម៉ឺននាក់ទៅកាន់តំបន់ក្បែរព្រំដែនជាមួយនឹងអ៊ុយក្រែន។
នៅក្នុងឱកាសទៅចូលរួមកីឡាអូឡាំពិកនៅប៉េកាំង លោក វ្ល៉ាឌីមៀ ពូទីនប្រធានាធិបតីរុស្ស៊ី ក៏បានជួបពិភាក្សាទ្វេភាគីជាមួយនឹងលោកស៊ី ជីនពីងប្រធានាធិបតីចិនផងដែរ ហើយប្រទេសទាំងពីរ បានប្តេជ្ញាពង្រឹងកិច្ចសហប្រតិបត្តិការក្នុងក្របខ័ណ្ឌនៃពហុភាគីនិយម និងជំរុញឱ្យមានការប្រឆាំងនឹងកិច្ចខិតខំប្រឹងប្រែងរបស់ "រដ្ឋមួយចំនួន" ក្នុងការដាក់ស្តង់ដារលទ្ធិប្រជាធិបតេយ្យលើប្រទេសដទៃទៀត។ រដ្ឋមួយចំនួន ដែល រុស្សី និងចិនចង់សំដៅដល់នោះ គឺមិនមែននរណាក្រៅតែពីសហរដ្ឋអាមេរិក និងសម្ព័ន្ធមិត្តនោះទេ។
អត្ថបទគួរអាន
ក្រៅពីនេះ សេចក្តីថ្លែងការណ៍ ក្រោយជំនួបរវាងមេដឹកនាំចិន និងរុស្ស៊ីនោះដែរ ភាគីទាំងពីរក៏មានការព្រួយបារម្ភយ៉ាងខ្លាំងអំពីភាពជាដៃគូសន្តិសុខត្រីភាគីរវាងអូស្ត្រាលី សហរដ្ឋអាមេរិក និងចក្រភពអង់គ្លេស ដែលហៅកាត់ថា AUKUS ផងដែរ ដោយបន្ថែមថា កិច្ចសហប្រតិបត្តិការលើនាវាមុជទឹកដើរដោយថាមពលនុយក្លេអ៊ែរនឹងបង្កើនហានិភ័យនៃការប្រណាំងប្រជែងអាវុធក្នុងតំបន់ និងការរីកសាយអាវុធនុយក្លេអ៊ែរផងដែរ។
សូមរំឮកថា កាលពីពេកថ្មីនេះ អាមេរិក បានសម្រេចបញ្ជូនទ័ពជិត៣ពាន់នាក់បន្ថែមទៀតពីលើកម្លាំងដែលខ្លួនកំពុងមានស្រាប់នៅតំបន់អឺរ៉ុបខាងកើត។ កងទ័ពទាំងនេះ នឹងត្រូវដាក់ពង្រាយនៅក្នុងប្រទេសប៉ូឡូញ និងរ៉ូម៉ានី ដើម្បីជាខ្សែត្រៀមការពារក្រែងមានការវាយប្រហាររាលដាលណាមួយកើតឡើងក្នុងតំបន់អឺរ៉ុបខាងកើត ក្នុងករណីដែលរុស្សីឈ្លានពានអ៊ុយក្រែន។ លើសពីនេះទៅទៀត អាមេរិកបានព្រមានចាត់វិធានការក្តៅទៅលើក្រុមហ៊ុនចិនណាដែលហ៊ានរំលោភបំពានលើទណ្ឌកម្មរបស់ក្រុងវ៉ាស៊ីនតោន ទាក់ទងនឹងការល្មើសហ៊ានរកស៊ីជាមួយក្រុមហ៊ុនរុស្ស៊ីផងដែរ៕
អត្ថបទ ស៊ើង និមល់
None
