យ៉ាងណាក៏ដោយចុះ សម្រាប់មហាអំណាចលេខ១ក្នុងលោក អាមេរិកឯណោះវិញ តាមរយៈប្រធានាធិបតី ចូ បៃឌិន ក៏បានចេញមកបរិហារចំៗតែម្តងទៅលើលោក ពូទីន ដោយបានហៅ ពូទីនថាជា ឧក្រិដ្ឋជនសង្គ្រាម។
ប្រធានាធិបតីរុស្ស៊ីលោកពូទីនថ្លែងថា «ប្រតិបត្តិការយោធាពិសេសរបស់យើង បានធ្វើឡើងប្រកបដោយជោគជ័យតាមផែនការដែលបានគ្រោងទុក» ប៉ុន្តែបុរសខ្លាំងរូបនេះ បានឈ្លៀតបញ្ជាក់ម្តងទៀតថា រុស្ស៊ីគ្មានបំណងកាន់កាប់អ៊ុយក្រែននោះទេ។
លោកពូទីន បញ្ជាក់ថា ដើម្បីកុំឲ្យអ៊ុយក្រែនបន្តប្រឆាំងនឹងរុស្ស៊ី លោកគ្មានជម្រើសផ្សេង ក្រៅតែពីការប្រើកម្លាំងយោធានោះទេ ដោយលោកពូទីនសម្អាងថា ដំណោះស្រាយតាមសន្តិវិធីបានទទួលបរាជ័យទាំងអស់នាពេលកន្លងមកនេះ។ ទន្ទឹមគ្នានេះ លោកពូទីន ដូចកាលពីគ្រាដំបូងដែរ បានយកប្រជាជនរស់ក្នុងតំបន់ដុនបាស់មកធ្វើជាហេតុផល ក្នុងការឈ្លានពានអ៊ុយក្រែន ដែលរុស្ស៊ីអះអាងថា បានរងការគំរាមកំហែងពីរដ្ឋអំណាចអ៊ុយក្រែនអស់ជាច្រើនឆ្នាំមកហើយនោះ។
អត្ថបទគួរអាន
តំបន់ដុនបាស់ ជាតំបន់ភាគខាងកើតអ៊ុយក្រែនជាប់ព្រំដែនរុស្ស៊ី ដែលកងកម្លាំងរដ្ឋាភិបាលអ៊ុយក្រែនបានប្រយុទ្ធជាមួយក្រុមឧទ្ទាមបំបែកខ្លួន គាំទ្រដោយរុស្ស៊ី ចាប់តាំងពីឆ្នាំ២០១៤មកម្ល៉េះ។
ដោយឡែក ប្រធានាធិបតី ចូ បៃឌិន នៅថ្ងៃនេះបានចេញមកហៅ ប្រធានាធិបតីរុស្ស៊ីលោកពូទីន ថាជាឧក្រិដ្ឋជនសង្គ្រាម។ លោកចូបៃឌិន ថា ឈ្មោះនេះវាសាកសមនឹងពូទីន សម្រាប់ការវាយប្រហារអ៊ុយក្រែនដោយហឹង្សា និងការបង្ហូរឈាម។ បន្ថែមពីលើនេះលោកបៃឌិនបានប្រកាសជាផ្លូវការផ្តល់ជំនួយផ្នែកសន្តិសុខបន្ថែមចំនួន ៨០០លានដុល្លារអាមេរិក ជាមួយនឹងអាវុធទំនើបៗ រួមមានមីស៊ីលប្រឆាំងយន្តហោះ និង រថក្រោះជាច្រើន។
ថ្លែងចេញពីសេតវិមាន នេះជាលើកទីមួយហើយដែលលោកចូបៃឌិន ប្រធានាធិបតីអាមេរិក បានហៅឈ្មោះលោកពូទីន ថា ជាឧក្រិដ្ឋជនសង្គ្រាម ជាសាធារណៈបែបនេះ។ កាលពីសប្តាហ៍មុន ក្នុងអំឡុងពេលធ្វើដំណើរទៅកាន់ប្រទេសប៉ូឡូញ អនុប្រធានាធិបតីអាមេរិកលោកស្រីកាមេឡាហារីស បាននិយាយដែរថា ប្រទេសរុស្ស៊ីគួរតែត្រូវបានស៊ើបអង្កេតសម្រាប់ឧក្រិដ្ឋកម្មសង្គ្រាម ដែលអាចកើតមានជាដាច់ខាត។
អ្នកនាំពាក្យវិមានក្រឹមឡាំង លោក ឌីមេទ្រី ប៉េស្កូវ បានចេញមកប្រតិកម្មខ្លាំងៗចំពោះការហៅឈ្មោះមេដឹកនាំកំពូលរុស្ស៊ីលោកពូទីន ពីសំណាក់លោកចូបៃឌិន ថា ជាការបរិយាយមិនអាចទទួលយកបាន និងមិនអាចលើកលែងបានឡើយ។
សូមជម្រាបថា សហរដ្ឋអាមេរិកបានប្រកាសបន្ថែមជំនួយយោធា៨០០លានដុល្លាទៀតទៅអោយអ៊ុយក្រែន បើគិតសរុបក្នុងមួយសប្តាហ៍មកនេះ ជំនួយរបស់អាមេរិកបានកើនដល់១ពាន់លានដុល្លារហើយ។ នេះមិនទាន់រាប់បញ្ចូលនូវជំនួយយោធាប្រមាណ ២០០លានដុល្លារទៀត កាលពីចុងខែកុម្ភៈនោះទេ។ ជំនួយរបស់អាមេរិកដល់អ៊ុយក្រែននេះ គឺជំនួយផ្នែកសន្តិសុខដ៏ធំបំផុតនៅក្នុងប្រវត្តិសាស្ត្ររបស់អាមេរិក ខណៈដែលសហភាពអឺរ៉ុបក៏បានផ្ដល់ជំនួយដ៏សម្បើមឲ្យអ៊ុយក្រែនដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
