ថ្លែងពីវិមានក្រឹមឡាំងជាមួយកិច្ចប្រជុំនៃក្រុមប្រឹក្សាសិទ្ធិមនុស្សរុស្ស៊ី លោក ពូទីន បានព្រមានប្រាប់ច្បាស់ៗថា សង្គ្រាមនៅអ៊ុយក្រែនអាចនឹងមានរយៈពេលវែងតទៅមុខទៀត» បន្ទាប់ពីមកដល់នឹងពេលនេះអ្វីដែលលោកហៅថា «ប្រតិបត្តិការយោធាពិសេស» តែបច្ចឹមលោកក៏ដូចជាពិភពលោកចាត់ទុកថាជាសង្គ្រាមឈ្លានពាននោះ បានឈានជើងចូលខែទីប្រាំបួនហើយ។
កងកម្លាំងរុស្ស៊ីបានទទួលបរាជ័យជាបន្តបន្ទាប់ក្នុងការទប់ទល់នឹងកងកម្លាំងអ៊ុយក្រែន នៃគោលដៅយោធាសំខាន់ៗ និងទីក្រុងអ៊ុយក្រែនជាច្រើនក្នុងរយៈពេលប៉ុន្មានខែចុងក្រោយថ្មីៗនេះ។ ដូចនេះហើយ មតិភាគច្រើនយល់ឃើញដូចគ្នាស្រដៀងគ្នាថា មហាអំណាចយោធារុស្ស៊ីអាចនឹងងាកទៅចាប់យកអាវុធនុយក្លេអ៊ែរដើម្បីផ្លាស់ប្តូរស្ថានការថ្មីនៃសង្គ្រាម។
យ៉ាងណាដ៏ដោយចុះ លោកពូទីនបាននិយាយថា៖ «យើងមិនបានឆ្កួត ហើយយើង (រុស្ស៊ី) ដឹងថាអ្វីជាអាវុធនុយក្លេអ៊ែរ» ប៉ុន្តែយើងនឹងមិនយកវាធ្វើជាផ្លែឡាម ដើម្បីវះហែកពិភពលោកនោះទេ»។ ទន្ទឹមនឹងភាពតានតឹងដែលកំពុងកើនឡើងនេះ លោក ពូទីនក៏បានទទួលស្គាល់ដែរថា «ការគំរាមកំហែងនុយក្លេអ៊ែរកំពុងកើនឡើងដូចគ្នា»។
ទោះជាយ៉ាងនេះក្តី លោកបានបន្ថែមថា រុស្ស៊ីនឹងប្រើប្រាស់អាវុធនុយក្លេអ៊ែរ ដើម្បីឆ្លើយតបទៅនឹងការវាយប្រហាររបស់សត្រូវតែប៉ុណ្ណោះ ដោយលោកបានសង្កត់ធ្ងន់ថា យុទ្ធសាស្ត្ររបស់ទីក្រុងមូស្គូគឺផ្អែកលើគោលនយោបាយ «ដែលគេហៅថាការវាយប្រហារសងសឹក» គឺនៅពេលដែលយើងត្រូវបានគេវាយប្រហារ នោះយើងរុស្ស៊ីនឹងវាយបកវិញ»។
អត្ថបទគួរអាន
ភ្លាមៗ ក្រោយការថ្លែងរបស់បុរសខ្លាំង ពូទីន បានទាក់ទាញការស្តីបន្ទោសខ្លាំងៗពីសហរដ្ឋអាមេរិក។ បើតាមអ្នកនាំពាក្យក្រសួងការបរទេសអាមេរិក លោក Ned Price បានប្រាប់អ្នកយកព័ត៌មានថា «អាមេរិកគិតថាការនិយាយដោយមិនមានការប្រុងប្រយ័ត្នណាមួយអំពីអាវុធនុយក្លេអ៊ែរ គឺជាការគ្មានទំនួលខុសត្រូវនោះទេ»។ លោក ណេត ប្រាយ បានគូសបញ្ជាក់ថា វាពិតជាគ្រោះថ្នាក់ ព្រោះវាដើរផ្ទុយពីស្មារតីនៃសេចក្តីថ្លែងការណ៍នោះ ហើយក៏ជាប្រាសចាកពីគោលការណ៍ស្នូលរបស់វិមានក្រឹមឡាំងដោយហាមមិនឱ្យមានការរីកសាយភាយនុយក្លេអ៊ែរចាប់តាំងពីសង្គ្រាមត្រជាក់មកផងដែរ។
ដោយឡែក អធិការបតីអាល្លឺម៉ង់ លោក Olaf Scholz បានប្រកាសថា ហានិភ័យនៃអាវុធនុយក្លេអ៊ែរដែលត្រូវបានប្រើប្រាស់ក្នុងជម្លោះអ៊ុយក្រែនបានថយចុះ ដោយសារសម្ពាធអន្តរជាតិបានហក់ឡើងសង្កត់កប្រទេសរុស្ស៊ី។ លោកបានបន្ថែមថា៖ «អាទិភាពពេលនេះសម្រាប់រុស្ស៊ី គឺត្រូវបញ្ចប់សង្គ្រាមភ្លាមៗនិងដកទ័ពចេញពីប្រទេសអ៊ុយក្រែន»។
ចំពេលមានការភ័យខ្លាចប្រទេសរុស្ស៊ីថា មានការកែនទ័ពទៅប្រយុទ្ធក្នុងសមរភូមិបន្ថែមទៀតនោះ លោក ពូទីន ប្រធានាធិបតីរុស្ស៊ី បានបញ្ញាក់ថា «នឹងគ្មានការចល័តទ័ពថ្មីថែមទៀតនោះទេ» ដោយលោកលើកឡើងថា «កងទ័ពប្រហែល ១៥ ម៉ឺននាក់នៃកងទ័ពបម្រុង ៣ សែននាក់ត្រូវបានដាក់ពង្រាយក្នុងសមរភូមិអ៊ុយក្រែន និងមាន ៧៧,០០០ នាក់កំពុងស្ថិតក្នុងអង្គភាពប្រយុទ្ធ។ ដោយឡែក នៅសល់ ១៥ ម៉ឺននាក់កំពុងស្ថិតក្នុងមជ្ឈមណ្ឌលបណ្តុះបណ្តាលយោធា៕
