មែនទែនទៅ នេះមិនមែនជាការលើកឡើង និង ជាការសម្តែងការព្រួយបារម្ភលើកទីមួយនោះទេ សម្រាប់បុរសខ្លាំងរុស្ស៊ី ដែលបានធ្វើជាមេដឹកនាំប្រទេសអស់ពេលជាង២០ឆ្នាំមកហើយ។ ចាប់តាំងពីឡើងកាន់តំណែងកាលពីឆ្នាំ១៩៩៩មក លោកពូទីនបានលើកឡើងម្តងហើយម្តងទៀត ថាការពង្រីកខ្លួនកាន់តែធំនៃសម្ព័ន្ធភាពណាតូនៅភាគខាងកើតឆ្ពោះមកកាន់តែជិតនឹងព្រំដែនរុស្ស៊ី ជាការគំរាមកំហែងដល់សន្តិសុខជាតិរុស្សី ហើយវាក៏ជាហេតុផលមួយ ដែលធ្វើឲ្យលោកសម្រេច ដាក់ចេញប្រតិបត្តិការយោធាពិសេស ក្នុងប្រទេសអ៊ុយក្រែនផងដែរ។
គួរជម្រាបដែរថា អង្គការណាតូនេះហើយ ដែលជាសម្ព័ន្ធយោធាត្រូវបានបង្កើតឡើងដើម្បីទប់ទល់នឹងសហភាពសូវៀតក្នុងសម័យសង្គ្រាមត្រជាក់ រហូតដល់សហភាពសូវៀតដួលរលំ និងបន្តជាសុបិន្តអាក្រក់ដល់រុស្ស៊ីរហូតដល់សព្វថ្ងៃ។
យ៉ាងណាក៏ដោយ លោកពូទីន ក្នុងមួយរយៈកាលចុងក្រោយនេះ បានសម្តែងការឆ្លើយតបដែលមានលក្ខណៈកាន់តែគ្រោះថ្នាក់ជាងមុន រួមមានការគំរាមវាយប្រហារដោយនុយក្លេអ៊ែរចំពោះសង្គ្រាមនៅអ៊ុយក្រែន។ នៅចុងក្រោយបំផុតនេះ លោកពូទីនបានព្រមានសមាជិកភាពក្នុងអង្គការណាតូ របស់ប្រទេសហ្វាំងឡង់ និងស៊ុយអែតថែមទៀតថា បើហ៊ានតែចូលរួមជាមួយណាតូ ពួកគេនឹងរងផលលំបាកផ្នែកសន្តិសុខ ព្រមទាំងអាចមានទំនាក់ទំនងមិនល្អជាមួយរុស្ស៊ី ជាក់ជាពុំខាន។
នៅក្នុងលិខិតមួយផ្ញើរទៅកាន់សមាជិកនៃអង្គការសន្ធិសញ្ញាសន្តិសុខសមូហភាព ហៅកាត់ថា CSTO លោកពូទីននិយាយថា៖ ការបង្កើនសមាជិកណាតូមិនមែនជាការគំរាមកំហែងឡើយ ប៉ុន្តែការបង្កើនវត្តមាន និងសមត្ថភាពយោធា ទើបជាការគំរាមកំហែងសម្រាប់ទីក្រុងម៉ូស្គូ។ ចំណែកការឆ្លើយតបរបស់ទីក្រុងម៉ូស្គូចំពោះរឿងនេះ គឺត្រូវមើលទៅលើ ថាតើការគំរាមកំហែងមានក្នុងកំរិតមួយណា។
អត្ថបទគួរអាន
គួរជម្រាបថា អង្គការសន្ធិសញ្ញាសន្តិសុខសមូហភាពនេះ គឺរុស្ស៊ីបង្កើតឡើង ដើម្បីប្រមែប្រមូលសម្ព័ន្ធមិត្ត និងអ្នកគាំទ្ររបស់ខ្លួន។ ក្នុងនោះរួមមាន ប្រទេសបេឡារុស អាមេនៀ កាហ្សាកស្ថាន គីជីស្ថាន និងតាជីគីស្ថាន។
អ្វីដែលគួរឲ្យកត់សម្គាល់នោះគឺ នៅប៉ុន្មានថ្ងៃចុងក្រោយនេះសារព័ត៌មានជាច្រើន ពិសេសគឺទូរទស្សន៍រដ្ឋរបស់រុស្ស៊ី បានចុះផ្សាយព្រោងព្រាតស្តីអំពីសកម្មភាពរបស់កងកម្លាំងនុយក្លេអ៊ែររបស់រុស្ស៊ី។
គេហទំព័រព័ត៌មានមួយរបស់អង់គ្លេសឈ្មោះថា Metro បានចុះផ្សាយដោយភ្ជាប់មកជាមួយនូវវីដេអូ ដែលថតបានដោយអ្នកដំណើរនៅតាមផ្លូវផងនោះ ឲ្យដឹងថា រុស្ស៊ីកំពុងបញ្ជូនគ្រាប់មីស៊ីលដែលអាចបំពាក់គ្រាប់នុយក្លេអ៊ែរបាន ទៅកាន់តំបន់ព្រំដែនក្បែរប្រទេសហ្វាំងឡង់ហើយ នៅក្រោយពេលដែលប្រទេសមួយនេះ បានប្រកាសស្នើចូលរួមជាមួយណាតូជាផ្លូវការកាលពីថ្ងៃអាទិត្យ។
វីដេអូនោះត្រូវបានគេជឿថា បានថតនៅលើផ្លូវមួយខ្សែចំងាយជិត៣០គីឡូម៉ែត្រប៉ុណ្ណោះ ឆ្ពោះទៅតំបន់ព្រំដែនហ្វាំងឡង់-រុស្ស៊ី។ គួរជម្រាបថា ហ្វាំងឡង់មានព្រំដែនដល់ទៅ១៣០០គីឡួម៉ែត្រ ឯណោះជាមួយប្រទេសរុស្ស៊ី។
សូមជម្រាបថា មជ្ឈដ្ឋាននានាកាន់តែច្រើនឡើងៗក្នុងប្រទេសរុស្ស៊ី បាននិងកំពុងបំផុសបំផុល អំពីការប្រើប្រាស់អាវុធ នុយក្លេអ៊ែរលើប្រទេសក្បែរខាងអឺរ៉ុប។ ពិធីករទូរទស្សន៍រដ្ឋរុស្ស៊ីមួយរូបបាននិយាយគំរាមថា ការដាក់ពង្រាយអាវុធនុយក្លេអ៊ែរនឹងក្លាយជាជម្រើសតែមួយគត់ សម្រាប់រុស្ស៊ី បើហ្វាំងឡង់ និងស៊ុយអែតចូលរួមជាមួយណាតូ។ ជាងនេះទៅទៀត អតីតប្រធានាធិបតី និងជាមនុស្សជំនិតមួយរូបរបស់លោកពូទីន គឺលោកឌីមេទ្រី ម៉េតមេដេវ បាននិយាយកាលពីខែមុនថា រុស្ស៊ីអាចដាក់ពង្រាយអាវុធនុយក្លេអ៊ែរ និងកាំជ្រួចមីស៊ីលលឿនជាងសំឡេងថែមទៀត ប្រសិនបើហ្វាំងឡង់ និងស៊ុយអែតចូលរួមជាមួយណាតូ៕
None
