ប្រទេសលោកខាងលិច ពិសេសក្រុមប្រទេសមហាអំណាចសេដ្ឋកិច្ច និងឧស្សាហកម្មទាំង៧ ឬហៅកាត់ថាG7 បាននិយាយរិះគន់ចំៗទៅលើរដ្ឋបាលលោកម៉ូឌី និងបានអំពាវនាវឲ្យឥណ្ឌាពិចារណាបើកចំហរទីផ្សារនៅដដែលផងដែរ។ នេះបើតាមការចុះផ្សាយដោយសារព័ត៌មាន រ៉យទ័រ និង Aljazeera។
រដ្ឋាភិបាលឥណ្ឌាបាននិយាយក្នុងសេចក្តីជូនដំណឹងចុះថ្ងៃទី ១៣ខែឧសភាថា ខ្លួននឹងផ្អាកការលក់ស្រូវសាលីទៅទីផ្សារអន្តរជាតិចាប់ពីថ្ងៃជូនដំណឹងតទៅ បានសេចក្តីថា ជាការជូនដំណឹងភ្លាមរួចចូលជាធរមានភ្លាមតែម្ដង។ សម្រាប់អ្នកជំនាញផ្នែកកសិកម្ម វិធានការបែបនេះ នឹងធ្វើឱ្យវិបត្តិស្បៀងអាហារសកលលោកកាន់តែអាក្រក់ទៅៗ។
មែនទែនទៅ ទោះបីជាឥណ្ឌាជាប្រទេសអ្នកផលិតស្រូវសាលីធំជាងគេលំដាប់ទី២ពិភពលោកក៏ដោយ តែឥណ្ឌាមិនមែនជាប្រទេសនាំចេញស្រូវសាលីធំណាស់ណានោះទេ នៅលើឆាកអន្តរជាតិ ដោយសារឥណ្ឌាត្រូវផ្គត់ផ្គង់ប្រជាជនរាប់ពាន់លាននាក់របស់ខ្លួន។ អ៊ុយក្រែន និងរុស្ស៊ីទៅវិញទេ ដែលជាអ្នកនាំចេញស្រូវសាលីដ៏ធំពិតប្រាកដ។ ចុះហេតុអ្វីការបញ្ចប់ការនាំចេញរបស់ឥណ្ឌា អាចប៉ះពាល់ដល់វិបត្តិស្បៀងអាហារដែរ?
ការដែលវាអាចមានផលប៉ះពាល់ដល់ស្បៀងអាហារសកល គឺដោយសារសង្គ្រាមនៅអ៊ុយក្រែននេះឯង, វាបានធ្វើឱ្យការដាំដុះ និងការនាំចេញរបស់អ៊ុយក្រែនដាំក្បាលចុះយ៉ាងខ្លាំង។ រុស្ស៊ីវិញ ដោយសារតែបានជាប់ទណ្ឌកម្មបស្ចិមលោកក្នុងសង្គ្រាមអ៊ុយក្រែន ដូចនេះរុស្ស៊ីមិនអាចនាំស្រូវសាលីចេញបានទេ។ ដូច្នេះ ឥណ្ឌាទោះបីមិនមែនជាអ្នកនាំចេញធំ តែជាប្រទេសដាំដុះមួយដែរ បានសម្រេចចិត្តបិទការនាំចេញទៀត នោះនិន្នាការស្បៀងអាហារសកលនឹងធ្លាក់ដុនដាបមួយកំរិតទៀត។
គេនៅចាំបានថា កាលពីដើមខែឧសភា ប្រធានាធិបតីអ៊ុយក្រែន លោក ហ្សេលេនស្គី បាននិយាយថា ប្រទេសអ៊ុយក្រែន អាចនឹងបាត់បង់គ្រាប់ធញ្ញជាតិរាប់សិបលានតោន ដោយសាររុស្ស៊ីបានបិទផ្លូវនៃច្រកកំពង់ផែសមុទ្រខ្មៅរបស់ខ្លួន ដែលវានឹងបង្កឲ្យមានវិបត្តិស្បៀងអាហារ ប៉ះពាល់ដល់តំបន់អឺរ៉ុប អាស៊ី និងអាហ្វ្រិក។
អត្ថបទគួរអាន
ឥណ្ឌាសម្អាងមូលហេតុអ្វីខ្លះ ដើម្បីបិទការនាំចេញស្រូវសាឡីលើកនេះ?
មានមូលហេតុសំខាន់ចំនួនពីរដែលឥណ្ឌា បានយកមកសម្អាង ដើម្បីបញ្ជាក់ពីការសម្រេចចិត្តរបស់ខ្លួនក្នុងការហាមការនាំចេញស្រូវសាលី។ ទី១គឺដើម្បីគ្រប់គ្រងអត្រាអតិផរណាលើស្បៀងអាហារក្នុងស្រុក និងទី២គឺទុកស្រូវសាលីដើម្បីបំពេញតម្រូវការប្រជាជនឥណ្ឌាទាំងជិត ១៤០០លាននាក់។ តាមរដ្ឋាភិបាលក្រុងញូដេលី លក្ខខណ្ឌអាកាសធាតុបច្ចុប្បន្ន ក៏ជាកត្តាមួយដែលធ្វើឲ្យការប្រមូលផលស្រូវសាលីធ្លាក់ចុះ និងជាហេតុធ្វើឲ្យឥណ្ឌាសម្រេចបិទការនាំចេញដូចគ្នា។
គួរជម្រាបថា ឥណ្ឌាកំពុងរងការវាយប្រហារដោយរលកកំដៅដ៏អាក្រក់បំផុត ចាប់ផ្តើមឡើងតាំងពីដើមខែឧសភានេះមក។ កាលពីថ្ងៃអាទិត្យទៅ១៥ឧសភា សីតុណ្ហភាពបានកើនឡើងដល់ ៤៤អស្សាសេឯណោះ។
ទោះយ៉ាងណា ឥណ្ឌាបានបញ្ជាក់រួចហើយថា ខ្លួននៅរក្សាសិទ្ធិក្នុងការបន្តលក់ទៅឲ្យប្រទេសណាដែលមានតម្រូវការចាំបាច់ ហើយនៅតែបន្តនាំចេញតាមកិច្ចសន្យាទិញ-លក់ ដែលខ្លួនបានចុះហត្ថលេខារួចពីនោះដដែល លើកលែងតែការនាំចេញថ្មីៗប៉ុណ្ណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
