ដោយឡែក ប្រទេសស៊ុយអែត ដែលបានសុំចូលណាតូជាមួយហ្វាំងឡង់ដែរ មិនទាន់ត្រូវបានអនុញ្ញាតនៅឡើយទេ។
ហ្វាំងឡង់បានចូលជាសមាជិកក្នុងសន្ធិសញ្ញាសម្ព័ន្ធភាពអាត្លង់ទិចខាងជើង ដែលគេស្គាល់ថាអង្គការណាតូនោះហើយកាលពីថ្ងៃអង្គារ។ ការចូលឈ្លានពានរបស់រុស្ស៊ីនៅអ៊ុយក្រែនកាលពីថ្ងៃទី ២៤ កុម្ភៈ ឆ្នាំមុន បានធ្វើឱ្យហ្វាំងឡង់ព្រួយបារម្ភកាន់តែខ្លាំង អំពីការប្រឈមផ្នែកសន្តិសុខរបស់ខ្លួន។ ស្ថានការណ៍នេះបានជំរុញហ្វាំងឡង់ឱ្យស្វែងរកកិច្ចការពារពីណាតូ ដែលមានសមាជិក ៣០ ប្រទេស ព្រោះទឹកដីហ្វាំងឡង់ជាង ១ ៣៤០ គីឡូម៉ែត្រ ស្ថិតនៅជាប់នឹងប្រទេសរុស្ស៊ី។
នៅក្នុងពេលជាប្រវត្តិសាស្ត្រនេះ លោក ចេន ស្តូលថិនប៊ើក (Jens Stoltenberg) អគ្គលេខាធិការអង្គការណាតូ បានប្រកាសក្នុងពិធីបញ្ចូលសមាជិកភាពហ្វាំងឡង់ថា៖ «ជាង ៧៥ ឆ្នាំកន្លងទៅ សម្ព័ន្ធយោធាដ៏អស្ចារ្យនេះបានជួយធានាការពារប្រជាជាតិរបស់យើង ហើយវានឹងបន្តធ្វើដូច្នោះទៀតក្នុងពេលបច្ចុប្បន្ន។ លោក ស្តូលថិនប៊ើក បានបន្តថា៖ «ប៉ុន្តែ សង្គ្រាមបានវិលមកកើតនៅអឺរ៉ុបវិញ ហើយហ្វាំងឡង់បានសម្រេចចិត្តចូលណាតូ និងបានធ្វើជាចំណែកនៃសម្ព័ន្ធភាពមួយដ៏ជោគជ័យបំផុតក្នុងពិភពលោកនេះ»។
ប្រធានាធិបតីហ្វាំងឡង់ លោក សូល នីនីស្តូ (Saul Niinisto) បានថ្លែងក្នុងសន្និសីទសារព័ត៌មានរួមជាមួយលោក ស្តូលថិនប៊ើក ថា៖ «វាជាថ្ងៃដ៏អស្ចារ្យសម្រាប់ហ្វាំងឡង់ ហើយខ្ញុំចង់និយាយថា វាជាថ្ងៃដ៏សំខាន់សម្រាប់អង្គការណាតូ»។
ប្រមុខរដ្ឋនៅសមុទ្របាល់ទិករូបនេះបាននិយាយថា ការរួមចំណែកគួរឱ្យកត់សម្គាល់បំផុតរបស់ហ្វាំងឡង់ នៅក្នុងការបង្ការនិងការការពាររួមគ្នារបស់អង្គការណាតូ គឺដើម្បីការពារទឹកដីរបស់ខ្លួនផ្ទាល់ ប៉ុន្តែលោកថានៅមានការងារសំខាន់ៗដែលត្រូវធ្វើថែមទៀត ដើម្បីសម្របសម្រួលកិច្ចការនេះជាមួយណាតូ។
ការបញ្ចប់គោលនយោបាយមិនចូលបក្សសម្ព័ន្ធយោធារយៈពេល ៧ ទសវត្សរ៍របស់ប្រទេសនៅអឺរ៉ុបខាងជើងមួយនេះ ត្រូវបានមហាអំណាចយោធារុស្ស៊ីលើកឡើងថា ខ្លួនត្រូវបង្ខំចិត្តចាត់វិធានការប្រឆាំង។ លោក ស៊ែហ្គៃ សូយហ្គូ (Sergei Shoigu) រដ្ឋមន្រ្តីការពារជាតិរុស្ស៊ី បាននិយាយថា សមាជិកភាពរបស់ហ្វាំងឡង់ក្នុងណាតូ បានបង្កើនហានិភ័យកាន់តែខ្លាំងក្នុងជម្លោះនៅប្រទេសអ៊ុយក្រែន។
អត្ថបទគួរអាន
ក្រសួងការបរទេសរុស្ស៊ីបាននិយាយនៅក្នុងសេចក្តីថ្លែងការណ៍របស់ខ្លួនថា ការបែរខ្នងដាក់គោលការណ៍មិនចូលបក្សសម្ព័ន្ធយោធាបែបនេះ គឺហ្វាំងឡង់កំពុងប្រព្រឹត្តកំហុសប្រវត្តិសាស្ត្រដ៏គ្រោះថ្នាក់ ដែលនឹងធ្វើឱ្យខូចទំនាក់ទំនងជាមួយទីក្រុងមូស្គូ។ បើតាមសេចក្ដីថ្លែងការណ៍នោះ ហ្វាំងឡង់បានបោះបង់ឋានៈរបស់ខ្លួន ក្នុងនាមជារដ្ឋដែលកសាងទំនុកទុកចិត្តនៅតំបន់សមុទ្របាល់ទិក ក៏ដូចជានៅទ្វីបអឺរ៉ុបជាទូទៅ។
ក្រសួងការបរទេសរុស្ស៊ីបានបញ្ជាក់ថា៖ «ហ្វាំងឡង់បានក្លាយជាសមាជិកតូចមួយរបស់ណាតូ ដែលមិនមានសិទ្ធិសម្រេចលើរឿងអ្វីទេ ប៉ុន្តែបានបាត់បង់សំឡេងដ៏ពិសេសរបស់ខ្លួនក្នុងកិច្ចការអន្តរជាតិ»។
មុនពិធីប្រកាសសមាជិកភាពរបស់ហ្វាំងឡង់ក្នុងអង្គការណាតូមួយថ្ងៃ រុស្ស៊ីបាននិយាយថា ខ្លួននឹងពង្រឹងសមត្ថភាពយោធានៅភាគខាងលិចនិងភាគពាយ័ព្យប្រទេសខ្លួន ទុកជាការឆ្លើយតបទៅនឹងដំណើរវិវឌ្ឍន៍នៃស្ថានការណ៍។
ចំពោះអ៊ុយក្រែនវិញ ប្រទេសនេះអបអរសាទរសមាជិកភាពរបស់ហ្វាំងឡង់ក្នុងអង្គការណាតូ។ លោកប្រធានាធិបតី វ៉ូឡូឌីមៀរ ហ្ស៊ើឡិនស្គី (Volodymyr Zelenskiy) បាននិយាយនៅក្នុងសុន្ទរកថាមួយថា៖ «ខ្ញុំសូមអបអរសាទរប្រជាជនហ្វាំងឡង់ទាំងអស់។ ការឈ្លានពានរបស់រុស្ស៊ីបង្ហាញយ៉ាងច្បាស់ថា មានតែការធានាជាសមូហភាព មានតែការបង្ការជាសមូហភាពប៉ុណ្ណោះ ដែលអាចទុកចិត្តបាន»។
ការចូលជាសមាជិករបស់ហ្វាំងឡង់នាំមកឱ្យអង្គការណាតូនូវសមត្ថភាពយោធាដ៏ធំធេង។ ហ្វាំងឡង់ជាប្រទេសមួយក្នុងចំណោមបណ្តាប្រទេសអ៊ឺរ៉ុបមួយចំនួន ដែលនៅតម្រូវឱ្យប្រជាពលរដ្ឋបំពេញកាតាព្វកិច្ចយោធាអំឡុងពេលមានសន្តិភាពជាច្រើនទស្សវត្សរ៍។ នេះជាការរក្សាជំហរប្រុងប្រយត្ន័ជានិច្ចចំពោះប្រទេសរុស្ស៊ីដែលនៅក្បែរនោះ។ កងកម្លាំងជើងគោក ជើងទឹក និងជើងអាកាស របស់ប្រទេសហ្វាំងឡង់ សុទ្ធតែត្រូវបានបណ្តុះបណ្តាល និងបំពាក់សម្ភារៈសំខាន់ៗ ក្នុងគោលបំណងចម្បងមួយ គឺដើម្បីរុញច្រានរាល់ការវាយប្រហារណាមួយពីសំណាក់រុស្ស៊ី។
ប្រទេសហ្វាំងឡង់ និងប្រទេសស៊ុយអែត ដែលនៅជាប់គ្នា បានដាក់ពាក្យសុំចូលអង្គការណាតូជាមួយគ្នាកាលពីឆ្នាំមុន ប៉ុន្តែសំណើរបស់ស៊ុយអែតត្រូវបានផ្អិបទុកដោយសមាជិកណាតូចំនួនពីរប្រទេស គឺតូទួរគី និងហុងគ្រី។
តួកគីបាននិយាយថា ទីក្រុង ស្តុកខុំ (Stockholm) ផ្តល់ជម្រកឱ្យសមាជិកនៃបណ្ដាញដែលទីក្រុង អង់ការ៉ា (Ankara) ចាត់ទុកថាជាក្រុមភេរវករ ហើយបានទាមទារឱ្យមានការធ្វើបត្យាប័នពួកគេ ជាថ្នូរនឹងការផ្តល់សច្ចាប័នឱ្យសមាជិកភាពស៊ុយអែត ប៉ុន្តែស៊ុយអែតមិនទាន់យល់ព្រមនៅឡើយ។
រីឯហុងគ្រីវិញ ប្រទេសនេះបានលើកឡើងពីការកើតទុក្ខមិនសុខចិត្តចំពោះការរិះគន់ពីសំណាក់ស៊ុយអែតដែលថា នាយករដ្ឋមន្ត្រី វីកទើ អ័កបាន (Viktor Orban) មិនគោរពលទ្ធិប្រជាធិបតេយ្យនិងនីតិរដ្ឋ៕
