![អាហារដ្ឋានរបស់ក្រុមហ៊ុនល្បីៗ](https://cdn.cambonomist.com/media/images/hrdthnrbskrmhnlb.2e16d0ba.fill-960x540.jpg)
ក្រុមហ៊ុនកាហ្វេ Starbucks កាលពីថ្ងៃពុធ បានប្រកាសពីការធ្លាក់ចុះដ៏គួរឱ្យភ្ញាក់ផ្អើលនូវការលក់នៅតាមហាងរបស់ខ្លួនសម្រាប់ត្រីមាសទី១ឆ្នាំនេះ ដោយបានធ្វើឱ្យភាគហ៊ុនរបស់ខ្លួនធ្លាក់ចុះ១៧%ផងដែរ។
ចំណែកក្រុមហ៊ុន Pizza Hut និងហាងមាន់បំពង KFC ក៏បានរាយការណ៍ថា ការលក់នៅហាងរបស់ពួកគេបានធ្លាក់ចុះផងដែរ។ ជាមួយគ្នានេះសូម្បីតែហាង McDonald ក៏បាននិយាយដែរថា ខ្លួនកំពុងខំប្រឹងតស៊ូនឹងការប្រកួតប្រជែងដោយស្មារតីប្រយុទ្ធជាមួយនឹងគូប្រជែងដែលទើបបង្កើតឡើងថ្មីៗនេះ។
នៅក្នុងរយៈពេលប៉ុន្មានខែមកនេះ ក្រុមសេដ្ឋកិច្ចវិទូ បានព្យាករថា អ្នកប្រើប្រាស់នឹងកាត់បន្ថយការចំណាយរបស់ពួកគេ ដើម្បីឆ្លើយតបនឹងតម្លៃ និងអត្រាការប្រាក់កើនខ្ពស់ ហើយពួកគេបានព្រមានអ្នកវិនិយោគថា អ្នកមានចំណូលទាបនឹងកាត់បន្ថយចំណាយរបស់ពួកគេ ខណៈដែលអ្នកមានចំណូលមធ្យមនឹងថ្លឹងថ្លែងពីតម្លៃទំនិញដែលត្រូវទិញ។
មានកត្តាមួយចំនួនដែលជំរុញឱ្យការលក់របស់ក្រុមហ៊ុនទាំងនេះធ្លាក់ចុះ ប៉ុន្តែពួកគេភាគច្រើនបានបន្ទោសទៅលើកត្តាអាកាសធាតុមិនល្អ។ ជាក់ស្ដែង ក្រុមហ៊ុន Starbuck បាននិយាយថា អាកាសធាតុអាក្រក់បានអូសទាញការលក់តាមហាងរបស់ខ្លួនធ្លាក់ចុះ ហើយក្រុមហ៊ុន Yum Brands ជាបុត្រសម្ពន្ធរបស់ក្រុមហ៊ុនមេ Pizza Hut ក្រុមហ៊ុន KFC និងក្រុមហ៊ុន Taco Bell សុទ្ធតែបានបន្ទោសទៅលើព្យុះព្រិលកាលពីខែមករា ដែលបានជំរុញឱ្យការលក់របស់ពួកគេធ្លាក់ចុះនៅត្រីមាសទីមួយឆ្នាំនេះ។
ចំណែកក្រុមហ៊ុន McDonald បាននិយាយថា ការលក់ផលិតផលរបស់ខ្លួនហាក់ដូចជាតឹងតែងខ្លាំងណាស់ដោយសារមានការប្រកួតប្រជែងពីក្រុមហ៊ុនផ្សេងៗទៀតដែលបានបង្កើតឡើងថ្មីៗនេះ៕
អត្ថបទ៖ សុខ មង្គល