បើយោងតាមច្បាប់ចម្លងនៃពាក្យបណ្តឹងដែលបានផ្សាយដោយទីភ្នាក់ងារ Reuters បានបង្ហាញថា c បាននិយាយថា លោក Rajapaksa បានប្រព្រឹត្តអំពើបំពានច្បាប់យ៉ាងធ្ងន់ធ្ងរលើអនុសញ្ញាទីក្រុងហ្សឺណែវ ក្នុងអំឡុងពេលការបង្គ្រាបការបះបោរនៅក្នុងសង្គ្រាមស៊ីវិលក្នុងឆ្នាំ ២០០៩ នៅពេលនោះ លោកកាន់តំណែងជាប្រមុខការពារជាតិរបស់ប្រទេសស្រីលង្កា។
គួររំលឹកឡើងវិញថា លោក Rajapaksa បានដាក់ពាក្យលាលែងពីតំណែង ក្នុងពេលលោកភៀសខ្លួនមកកាន់ប្រទេសសិង្ហបុរីកាលពីថ្ងៃទី១៣ ខែកក្កដាកន្លងទៅ ដោយនៅពេលនោះ ក្រុមអ្នកតវ៉ាប្រឆាំងរដ្ឋាភិបាលស្រីលង្កាបានសម្រុកចូលការិយាល័យ និងលំនៅដ្ឋានផ្លូវការរបស់ប្រធានាធិបតី និងនាយករដ្ឋមន្ត្រី ដើម្បីទម្លាក់រដ្ឋាភិបាលរបស់លោក។
យ៉ាងណាមិញ លោកស្រីអាឡិចហ្សាដ្រា លីលី ខាថើរ (Alexandra Lily Kather) មេធាវីអន្តរជាតិម្នាក់បានប្រាប់ទីភ្នាក់ងាររ៉យទ័រពីទីក្រុងប៊ែរឡាំងថា៖ «បណ្តឹងព្រហ្មទណ្ឌដែលត្រូវដាក់ដោយផ្អែកលើ ព័ត៌មានដែលអាចមានការផ្ទៀងផ្ទាត់បានលើឧក្រិដ្ឋកម្មដែលបានប្រព្រឹត្ត ហើយដែលមានភស្តុតាងផងដែរនោះ អាចធ្វើទៅបានតាមផ្លូវច្បាប់ ហើយបុគ្គលដែលត្រូវបានចោទនោះ កំពុងស្ថិតនៅក្នុងប្រទេសសិង្ហបុរីផងដែរ»។
ជាការឆ្លើយតបទៅនឹងសំណួររបស់ទីភ្នាក់ងារ Reuters ដដែល អ្នកនាំពាក្យរបស់អង្គជំនុំជម្រះក្តីនៃអគ្គមេធាវីរបស់ប្រទេសសិង្កបុរីបាននិយាយថា ខ្លួនពិតជាបានទទួលលិខិតចោទប្រកាន់មួយពីអង្គការតម្លាភាព និងយុត្តិធម៌អន្តរជាតិ (ITJP) កាលពីថ្ងៃទី២៣ ខែកក្កដាមែន។ ក៏ប៉ុន្តែ អ្នកនាំពាក្យរូបនេះបាននិយាយថា៖ «ខ្លួនមិនអាចធ្វើអត្ថាធិប្បាយបន្ថែមទៀតលើបញ្ហានេះបានទេ»។
អត្ថបទគួរអាន
គួរជម្រាបថា ក្រសួងការបរទេសរបស់ប្រទេសសិង្ហបុរីបានបញ្ជាក់ថា លោក Rajapaksa បានចូលមកក្នុងប្រទេសនេះ ក្នុងដំណើរទស្សនកិច្ចឯកជនមួយប៉ុណ្ណោះ ហើយមិនបានស្វែងរក ឬត្រូវបានផ្តល់សិទ្ធិជ្រកកោនអ្វីនោះឡើយ។
មួយវិញទៀត លោកស៊ូបបាកា ដេម (Shubhankar Dam) សាស្ត្រាចារ្យមួយរូបនៃសាកលវិទ្យាល័យ ផុសម៉ៅ (Portsmouth School of Law) ក្នុងប្រទេសអង់គ្លេស ដែលបានកំពុងបង្រៀននៅប្រទេសសិង្ហបុរី បាននិយាយថា ខណៈពេលដែលតុលាការរបស់សិង្ហបុរីអាចកាត់ទោសឧក្រិដ្ឋកម្មសង្រ្គាម ការប្រល័យពូជសាសន៍ និងការធ្វើទារុណកម្មណាមួយបាន លុះត្រាតែវាជាមធ្យោបាយចុងក្រោយ ក្នុងការអនុវត្តសិទ្ធិអំណាចនេះដោយខ្វះមិនបាន។
លោកបានបន្ថែមថា «ការសម្រេចចិត្តណាមួយក្នុងការកាត់ទោសអតីតប្រមុខរដ្ឋនៃប្រទេសណាមួយត្រូវតែមានតុល្យភាពប្រឆាំងទៅគោលបំណងគោលនយោបាយការបរទេសរបស់ប្រទេសនោះ»។
គួររំលឹកបន្តិចថា ប្រទេសស្រីលង្កាបានបិទបញ្ចប់សង្គ្រាមស៊ីវិលរបស់ខ្លួនរយៈពេល ២៥ ឆ្នាំរវាងក្រុមបះបោរបំបែកខ្លួននៃក្រុមជនជាតិភាគតិចតាមិល និងកងកម្លាំងរដ្ឋាភិបាលស្រីសង្កាក្នុងឆ្នាំ ២០០៩ កន្លងទៅ ហើយក្រុមសិទ្ធិមនុស្សបានចោទប្រកាន់ភាគីទាំងពីរពីបទរំលោភបំពានយ៉ាងធ្ងន់ធ្ងរក្នុងអំឡុងពេលសង្រ្គាមនោះ៕
