រុស្ស៊ីបានគំរាមប្រើសន្លឹកបៀរចុងក្រោយ ដោយប្រើមីស៊ីលបំពាក់ក្បាលគ្រាប់នុយក្លេអ៊ែរដែលខ្លួនបានសាកល្បងជោគជ័យ

ក្រោយពីបានបង្ហាញកម្លាំងរយៈពេល២ខែក្នុងការវាយប្រហារទៅលើប្រទេសអ៊ុយក្រែនរួចមកពេលនេះប្រទេសរុស្ស៊ីបានគំរាមប្រើសន្លឹកបៀរចុងក្រោយរបស់ខ្លួនហើយ តាមរយៈការបាញ់សាកល្បងមីស៊ីលស៊េរីថ្មីបំផុត ដែលអាចបំពាក់ក្បាលគ្រាប់នុយក្លេអ៊ែរផ្លោងឆ្លងទ្វីបបាន ដែលប្រធានាធិបតីរុស្ស៊ីលោក វ្ល៉ាឌីមៀ ពូទីន បានអះអាងថា អាវុធដ៏ខ្លាំងក្លាមួយនេះ គឺជាអាវុធខ្លាំងបំផុតក្នុងលោក ហើយវានឹងធ្វើឱ្យសត្រូវរបស់ក្រុងម៉ូស្គូខ្លបខ្លាចពីឥទ្ធិពលរបស់វាផងដែរ។

មីស៊ីលរុស្ស៊ី

មន្ត្រីយោធារុស្ស៊ីបានប្រាប់លោក ពូទីន តាមកញ្ចក់ទូរទស្សន៍ថា មីស៊ីលប្រភេទថ្មីបំផុតឈ្មោះ Sarmat ដែលគេទន្ទឹងរង់ចាំជាយូរមកហើយនោះ បានបាញ់សាកល្បងជាលើកដំបូងចេញពីតំបន់ផ្លេសិត (Plesetsk) នៅភាគពាយព្យនៃប្រទេសរុស្ស៊ី ហើយបានធ្លាក់ចំគោលដៅនៅឧបទ្វីប កាំឆាតកា (Kamchatka) ដែលមានចម្ងាយជិត ៦ពាន់គីឡូម៉ែត្រនៅចុងភាគខាងកើតប្រទេសនេះ។

យ៉ាងណាក៏ដោយចុះ ការសាកល្បងមីស៊ីល Sarmat ដែលគេបានផលិតអស់ពេលជាច្រើនឆ្នាំមកហើយនោះ មិនបានធ្វើឱ្យលោកខាងលិចភ្ញាក់ផ្អើលនោះទេ ប៉ុន្តែវាគ្រាន់តែបានកើតឡើងក្នុងពេលមានភាពតានតឹងខ្លាំងខាងភូមិសាស្ត្រនយោបាយតែប៉ុណ្ណោះ។ ប្រទេសរុស្ស៊ីមិនទាន់អាចដណ្តើមយកបានទីក្រុងធំៗណាមួយពីអ៊ុយក្រែនបាននៅឡើយទេ តាំងពីប្រទេសនេះបានបញ្ជូនកងទ័ពរាប់ម៉ឺននាក់ចូលក្នុងប្រទេសអ៊ុយក្រែនតាំងពីថ្ងៃទី២៤ ខែកុម្ភៈមក។ យ៉ាងណាក៏ដោយ រុស្ស៊ីបានដាក់ឱសានវាទថា នឹងក្រសោបយកក្រុងម៉ារីយ៉ូប៉ូលឲ្យបានទាំងស្រុងនៅថ្ងៃព្រហស្បតិ៍នេះ ក្រោយអ៊ុយក្រែនសុំពិភាក្សាពីការជម្លៀសទាហាននិងជនស៊ីវិលចេញពីក្រុងមួយនេះ។

ជុំវិញការបាញ់សាកល្បងមីស៊ីលរបស់រុស្ស៊ីនេះ លោក ពូទីន បាននិយាយថា មីស៊ីលថ្មីនេះមានលក្ខណៈយុទ្ធសាស្ត្រ និងបច្ចេកទេសខ្ពស់បំផុត ហើយមានសមត្ថភាពអាចគេចផុតពីប្រព័ន្ធចាប់រ៉ាដាទំនើបៗរបស់ប្រព័ន្ធការពារមីស៊ីលទាំងអស់ ហើយវាមិនទាន់មានមីស៊ីលណាមួយនៅលើលោកនេះ អាចប្រៀបផ្ទឹមបាននោះទេ ហើយវានឹងបង្ហាញខ្លួននៅក្នុងពេលមិនយូរទៀតឡើយ។

លោក ពូទីន បានបន្ថែមទៀតថា អាវុធដ៏ពិសេសនេះនឹងពង្រឹងសក្តានុពលប្រយុទ្ធរបស់កងកម្លាំងប្រដាប់អាវុធរបស់រុស្ស៊ី និងធានាបាននូវសុវត្ថិភាពរបស់រុស្ស៊ីពីការគំរាមកំហែងពីផ្នែកខាងក្រៅផងដែរ។

ដោយបានប្រកាសពីការលុកលុយចូលអ៊ុយក្រែនកាល ពី៨សប្តាហ៍មុននោះ លោក ពូទីន ក៏បានប្រាប់ ឲ្យកងកម្លាំងនុយក្លេអ៊ែររបស់រុស្ស៊ីប្រុងជើងការផងដែរ និងបានព្រមានលោកខាងលិចថា ការប៉ុនប៉ងរារាំងរុស្ស៊ីនឹងនាំឱ្យពួកគេឆ្ពោះទៅរកផលវិបាកដែលពួកគេមិនធ្លាប់ជួបប្រទះនៅក្នុងប្រវត្តិសាស្ត្រ។

ទីភ្នាក់ងារព័ត៌មានរុស្ស៊ី Tass បានដកស្រង់សម្តីលោក Dmitry Rogozin ប្រធានទីភ្នាក់ងារអវកាស របស់រុស្ស៊ី ដែលបាននិយាយក្រោយពីការសាកល្បងមីស៊ីលនេះកាលពីថ្ងៃពុធថា កងកម្លាំងនុយក្លេអ៊ែររបស់រុស្ស៊ីនឹងចាប់ផ្តើមទទួលយកមីស៊ីលថ្មី«នៅក្នុងរដូវស្លឹកឈើជ្រុះនៅក្នុងឆ្នាំនេះ»។

លោក Jack Watling ដែលស្ថិតនៅក្នុងក្រុមអ្នកគិតគូយុទ្ធសាស្ត្រ នៃអង្គការ RUSI នៅទីក្រុងឡុងដ៍បាននិយាយថា ការសាកល្បងមីស៊ីលនេះ បានកើតឡើងនៅមុនពេលមិនដល់៣សប្តាហ៍នៃការប្រារព្ធទិវាជ័យជម្នះប្រចាំឆ្នាំ ដែលធម្មតាប្រទេសរុស្ស៊ីតែងតែអួតបង្ហាញអាវុធថ្មីចុងក្រោយរបស់ខ្លួន។

លោក Watling បាននិយាយថា "ពេលវេលានៃការធ្វើតេស្តនេះឆ្លុះបញ្ចាំងឱ្យឃើញពីប្រជាជនរុស្ស៊ីចង់មានអ្វីមួយបង្ហាញជាសមិទ្ធិផលបច្ចេកវិទ្យានៅក្នុងពេលឆ្ពោះទៅរកថ្ងៃរំលឹកទិវាជ័យជម្នះ ជាពេលមួយដែលពួកគេខានបង្ហាញពីលទ្ធផលបច្ចេកវិទ្យាយូរមកហើយនោះ៕

អត្ថបទ៖ សុខ ជា

None