នៅក្នុងសេចក្ដីថ្លែងការណ៍រួមមួយ របស់មេដឹកនាំនៃគណៈកម្មកាអឺរ៉ុប, បារាំង, អាល្លឺម៉ង់, អ៊ីតាលី, អង់គ្លេស, កាណាដា និងសហរដ្ឋអាមេរិក បានអះអាងថា ពួកគេនឹងចាត់វិធានការសេដ្ឋកិច្ច ដើម្បីឲ្យរុស្ស៊ីទទួលខុសត្រូវ និងធ្វើយ៉ាងណាឲ្យលោកពូទីនបានដឹងថា យុទ្ធសាស្ត្រសង្គ្រាមរបស់លោកពូទីន ដែលបានធ្វើនេះ គឺជាការបរាជ័យ។
លោកស្រី អ៊ួសុឡា វ៉នឌ័រ លីយិន ប្រធានគណៈកម្មការអឺរ៉ុបបាននិយាយថា ការកាត់ធនាគាររបស់រុស្ស៊ីចេញពីប្រព័ន្ធ SWIFT នឹងបញ្ឈប់ពួកគេមិនឲ្យធ្វើប្រតិបត្តិការហិរញ្ញវត្ថុភាគច្រើនរបស់ពួកគេនៅទូទាំងពិភពលោកនោះឡើយ ហើយវាក៏ជាការទប់ស្កាត់ការនាំចេញ និងការនាំចូលរបស់រុស្ស៊ីប្រកបដោយប្រសិទ្ធភាពផងដែរ។ រដ្ឋមន្ត្រីហិរញ្ញវត្ថុបារាំង លោក Bruno Le Maire បានចាត់ទុកការដកធនាគាររុស្ស៊ីចេញពីប្រព័ន្ធនេះថា ជាអាវុធនុយក្លែអ៊ែហិរញ្ញវត្ថុមួយ។
តើអ្វីទៅជាប្រព័ន្ធ ស្វីវ SWIFT?
SWIFT មកពីពាក្យពេញថា Society of Worldwide Interbank Financial Telecommunications មានន័យជាភាសាខ្មែរថា សង្គមនៃទូរគមនាគមន៍ហិរញ្ញវត្ថុអន្តរធនាគារទូទាំងពិភពលោក។ ប្រព័ន្ធ SWIFT ត្រូវបានបង្កើតឡើងក្នុងឆ្នាំ១៩៧៣ ហើយវាជាប្រព័ន្ធសារមួយ ដែលអនុញ្ញាតឲ្យធនាគារផ្ញើប្រាក់ទៅកាន់គ្នាទៅវិញទៅមក។ ប្រព័ន្ធនេះ បច្ចុប្បន្ន មានស្ថាប័នហិរញ្ញវត្ថុជាង១ម៉ឺនស្ថាប័នកំពុងប្រើប្រាស់ នៅជាង២០០ប្រទេស។
តើនឹងមានអ្វីកើតឡើងពេលរុស្ស៊ីត្រូវបានដកចេញពីប្រព័ន្ធ SWIFT?
ធនាគាររុស្ស៊ីនឹងមិនអាចធ្វើការទូទាត់សម្រាប់សកម្មភាពពាណិជ្ជកម្ម និងហិរញ្ញវត្ថុតទៅទៀតបានទេ ហើយវានឹងរារាំងដល់ការនាំចេញទំនិញរបស់រុស្ស៊ី ដូចជាប្រេង ធ្យូងថ្ម និងឧស្ម័នធម្មជាតិជាដើម។ ទន្ទឹមនឹងនេះ វាក៏នឹងរារាំងរុស្ស៊ីពីការនាំចូលផលិតផលបច្ចេកវិទ្យាសំខាន់ៗ ដូចជាបន្ទះឈីប និងគ្រឿងម៉ាស៊ីនសម្រាប់ឧស្សាហកម្មរបស់ខ្លួនផងដែរ។
ស្ថាប័នហិរញ្ញវត្ថុរុស្ស៊ីគ្រប់គ្រងប្រហែល៤៦ពាន់លានដុល្លារនៃប្រតិបត្តិការអត្រាប្ដូរប្រាក់បរទេស ក្នុងមួយថ្ងៃ ហើយមានប្រមាណ ៨០% គឺជាប្រាក់ដុល្លារអាមេរិក។
តើវានឹងប៉ះពាល់ដល់ប្រទេសដទៃទៀតទេ?
ច្បាស់ណាស់ចង់ ឬមិនចង់ វានឹងអាចមានផលប៉ះពាល់ទៅលើប្រទេសដទៃទៀតដូចគ្នាដែរ ព្រោះថាការដករុស្ស៊ីចេញពីប្រព័ន្ធ SWIFT នឹងរំខានដល់លំហូរនាំចេញប្រេង និងឧស្ម័នពីរុស្ស៊ី ទៅកាន់ប្រទេសដទៃទៀត។ សហភាពអឺរ៉ុប ជាឧទាហរណ៍ គឺមានការពឹងផ្អែកប្រេង និងឧស្ម័ននាំចូលពីរុស្ស៊ីប្រហែល ៤០%ឯណោះ។
អត្ថបទគួរអាន
ធនាគារអឺរ៉ុប ក៏ស្ថិតនៅក្នុងចំណោមម្ចាស់បំណុលធំរបស់រុស្ស៊ីផងដែរ នៃទំហំបំណុលសរុប១២១ពាន់លានដុល្លារ ដែលរុស្ស៊ីបានជំពាក់ធនាគារបរទេស។ ដូច្នេះ នៅពេលដែលរុស្ស៊ីត្រូវបានដកចេញពីប្រព័ន្ធ SWIFT សំណួរចោទសួរថា តើទីក្រុងម៉ូស្គូ នឹងអាចសងប្រាក់ចំនួនប៉ុន្មានដើម្បីទូទាត់បំណុលដែលជំពាក់នេះ?
តើទណ្ឌកម្មដករុស្ស៊ីចេញពីប្រព័ន្ធ SWIFT នឹងអាចមានប្រសិទ្ធភាពកម្រិតណា?
វាមិនច្បាស់នោះទេ ថាតើប្រសិទ្ធភាពរបស់ទណ្ឌកម្មនេះ នឹងមានកម្រិតណានោះ។ ប៉ុន្ដែ កន្លងមករុស្ស៊ី ក៏ធ្លាប់ស្ថិតនៅក្រោមទណ្ឌកម្មសេដ្ឋកិច្ចដែរ តាំងពីពេលដែល រុស្ស៊ីដណ្ដើមយកតំបន់គ្រីមៀនៅឆ្នាំ២០១៤ ប៉ុន្ដែ វាមិនបានបញ្ឈប់មហិច្ឆតាប្រធានាធិបតីរុស្ស៊ី លោក ពូទីន ពីការឈ្លានពានអ៊ុយក្រែននោះទេ។
ជាឧទាហរណ៍ជាក់ស្ដែងមួយទៀត ប្រទេសកូរ៉េខាងជើងឯណោះវិញ ក៏បានរងនូវទណ្ឌកម្មសេដ្ឋកិច្ចខ្លាំងក្លាដែរ ពោលគឺ ប្រទេសនេះ ត្រូវបានកាត់ផ្ដាច់ទាំងស្រុងពីប្រព័ន្ធសេដ្ឋកិច្ចអន្តរជាតិ ប៉ុន្ដែ របបលោកគីម ជុងអ៊ុន នៅតែបន្ដរស់រានមានជីវិត និងបន្ដសាកល្បង និងអភិវឌ្ឍអាវុធមីស៊ីលថ្មីៗ បាញ់សាកល្បងអង្រួនពិភពលោកជាបន្ដបន្ទាប់។ រុស្ស៊ី ក៏អាចនឹងងាកទៅរកចិនកាន់តែខ្លាំងសម្រាប់ការធ្វើពាណិជ្ជកម្ម ដោយបោះបង់ប្រតិបត្តិការពាណិជ្ជកម្មដែលមានមូលដ្ឋានលើប្រាក់ដុល្លារអាមេរិកតទៅទៀត៕
None
