ប្រទេសជប៉ុនបញ្ជាក់ថា ខ្លួននឹងបន្តការតាមដានក៏ដោយសារតែ នាវាចម្បាំងរបស់ចិន និងរុស្សីដែលបានធ្វើការល្បាតរួមគ្នា បានធ្វើដំណើរឆ្លងកាត់តាមច្រកសមុទ្រ អូហ្សូមិ និង ច្រកស៊ូរ៉ាហ្គូ ក្បែរទៅនឹងដែនកោះហុកកៃដូ របស់ជប៉ុន។
ទោះបីតំបន់នោះត្រូវបានចាត់ទុកជាដែនទឹកអន្តរជាតិ ដែលអនុញ្ញាតឲ្យនាវាមកពីប្រទេសផ្សេងៗអាចឆ្លងកាត់បានក្តី ប៉ុន្តែជប៉ុនអះអាងថា សកម្មភាពរបស់ប្រទេសទាំងពីរ គឺខុសប្លែកពីរាល់ដង។ ពោលនេះជាលើកទីមួយហើយរវាងចិន និងរុស្សីដែលបានល្បាតឆ្លងកាត់តំបន់នេះរួមគ្នា។
យ៉ាងណាមិញ ក្រសួងការពារជាតិចិន និងរុស្សីបានគូសបញ្ជាក់ហើយថា ប្រតិបត្តិការនេះគឺជាផ្នែកមួយនៃកិច្ចសហប្រតិបត្តិការប្រចាំឆ្នាំរវាងប្រទេសទាំងពីរ ព្រមទាំងដើម្បីពង្រឹងចំណងទាក់ទង ក៏ដូចជាដើម្បីសន្តិសុខក្នុងតំបន់ ដោយមិនផ្តោតលើការប្រឆាំងនឹងភាគីទីបីណាមួយឡើយ។
សូមជម្រាបថា ទីក្រុងមូស្គូ និងទីក្រុងប៉េកាំង ធ្លាប់បានរៀបចំសមយុទ្ធយោធាជើងទឹកនៅក្បែរសមុទ្រប្រទេសជប៉ុនកាលពីដើមខែតុលាម្តងរួចមកហើយ។ មហាអំណាចយោធាទាំងពីរនេះបានបង្កើតទំនាក់ទំនងយោធា និងការទូតកាន់តែជិតស្និទ្ធនៅក្នុងប៉ុន្មានឆ្នាំចុងក្រោយនេះ ស្របពេលដែលទំនាក់ទំនងរបស់ពួកគេជាមួយលោកខាងលិចបាននិងកំពុងបន្តធ្លាក់ចុះខ្លាំងមែនទែនក្នុងរយៈពេលប៉ុន្មានឆ្នាំចុងក្រោយនេះ៕
