ចិនបើកការត្រួតពិនិត្យបន្ទាន់លើចំណអាហារ និងផ្លែឈើនាំចូលពីថៃ និងវៀតណាមក្រោយរកឃើញមានផ្ទុកកូវីដ១៩

ដោយឡែក ពលរដ្ឋចិនដែលបានទិញផ្លែឈើទាំងនេះរួចហើយ ត្រូវបានអាជ្ញាធរចិន បញ្ជាដាក់ឱ្យនៅដាច់ដោយឡែកសិន ដើម្បីសុវត្ថិភាព។

មែនទែនទៅ មានភស្តុតាង និងទិន្នន័យតិចតួចប៉ុណ្ណោះ ដែលមនុស្សអាចឆ្លងកូវីដ១៩ពីចំណីអាហារ។ យ៉ាងណាក៏ដោយ ក្រោមគោលនយោបាយដ៏តឹងរ៉ឹងរបស់រដ្ឋអំណាចក្រុងប៉េកាំង បញ្ហានេះមិនអាចឲ្យប៉េកាំងមើលស្រាលបានឡើយ។ ជាក់ស្តែងពេលនេះ មានយ៉ាងហោចណាស់ទីក្រុងចំនួន៩ នៃខេត្តជឺជាំង (Zhejiang) និងខេត្តជាំងស៊ី (Jiangxi) ដែលអាជ្ញាធរកំពុងបង្កើនការយកចិត្តទុកដាក់លើការត្រួតពិនិត្យ ក្រោយគេបានរកឃើញមេរោគកូវីដ១៩នៅផ្លែស្រកានាគ ដែលនាំចូលពីប្រទេសវៀតណាម និងរកឃើញលើផ្លែគូលេន ដែលនាំចូលពីប្រទេសថៃផង។

បើតាមការឲ្យដឹងពីអាជ្ញាធរខេត្តទាំងពីររបស់ចិន ផ្លែឈើទាំងពីរប្រភេទនេះ បាននាំចូលមកដល់ប្រទេសចិន ចាប់តាំងពីខែធ្នូឆ្នាំមុនម្ល៉េះ។ ប្រការនេះបាននាំឱ្យមានការបិទផ្សារទំនើបជាបណ្តោះអាសន្ន និងការត្រួតពិនិត្យកាន់តែតឹងរ៉ឹងនៅទីផ្សារលក់ផ្លែស្រកានាគ ជាពិសេសស្រកានាគពីប្រទេសវៀតណាម។ 

ប្រទេសចិនកំពុងមានការប្រុងប្រយ័ត្នខ្ពស់ចំពោះការផ្ទុះឡើងនៃមេរោគឆ្លងកូវីដ១៩ ខណៈដែលប្រទេសផ្សេងទៀត កំពុងដោះស្រាយជាមួយនឹងការកើនឡើងនៃកូវីដ១៩បំប្លែងខ្លួនអូមីក្រុង ដែលមានកម្រិតឆ្លងខ្លាំង ហើយដែលអាចគំរាមកំហែងដល់ព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំងនៅខែក្រោយនេះផងដែរ។

យោងតាមរបាយការណ៍របស់អាជ្ញាធរក្នុងតំបន់បានឱ្យដឹងថា មនុស្សជាង ១ពាន់នាក់នៃទីក្រុង សោស៊ីង(Shaoxing) ក្នុងខេត្ត ជឺជាំង (Zhejiang) ដែលមានប៉ះពាល់ជាមួយផ្លែស្រកានាគរបស់វៀតណាមត្រូវបានអាជ្ញាធរបញ្ជាឱ្យនៅដាច់ដោយឡែកពីគេ។ អ្នករស់នៅទីក្រុងផ្សេងទៀត ដែលបានទៅហាងលក់ផ្លែឈើ ដែលសង្ស័យថាលក់ផលិតផលដែលមានមេរោគ ឬបានទិញផ្លែស្រកានាគ ក៏ត្រូវបានគេប្រាប់ឲ្យធ្វើតេស្តរកមេរោគកូវីដ១៩ផងដែរ។

ទោះបីជាយ៉ាងនេះក្តី បើយោងតាមអង្គការសុខភាពពិភពលោក មនុស្សទំនងជាមិនអាចមានភាគរយខ្ពស់ក្នុងការចម្លងកូវីដ១៩ ពីអាហារស្រស់ ឬអាហារវេចខ្ចប់ឡើយ ហើយមកទល់នឹងពេលនេះ ក៏មិនមានភស្តុតាង ឬករណីឆ្លងណាមួយ ដែលចម្លងចេញពីការប៉ះពាល់អាហារដែលមានកូវីដ១៩នោះដែរ។

សូមជម្រាបថា អស់រយៈពេលជាច្រើនឆ្នាំមកនេះ ប្រទេសចិនគឺជាអ្នកនាំចូលផ្លែឈើលំដាប់កំពូលរបស់វៀតណាម។ ក្នុងនោះគ្រាន់តែនៅ៤ខែដំបូងឆ្នាំ២០២១ ជាង៦៥%នៃការនាំចេញផ្លែឈើសរុបរបស់វៀតណាម គឺនាំទៅប្រទេសចិន។ ប្រទេសចិនក៏ជាទីផ្សារលេខ១ សម្រាប់ផ្លែស្រកានាគរបស់វៀតណាមផងដែរ ដែលវាស្មើនឹង៨០%នៃការនាំចេញសរុបរបស់វៀតណាម។ នេះបើយោងតាមទិន្នន័យពីក្រសួងកសិកម្ម និងអភិវឌ្ឍន៍ជនបទរបស់វៀតណាម៕