នៅក្នុងការសន្ទនាតាមទូរស័ព្ទជាមួយសមភាគីបារាំងលោក Emmanuel Macron លោក Putin បានចោទប្រកាន់អ៊ុយក្រែនថា បានបង្កើតព័ត៌មានក្លែងក្លាយ នៅរោងចក្រថាមពលនុយក្លេអ៊ែរ ហ្សាប៉ូរី ហ្សីយ៉ា(Zaporizhzhia) ដោយមានការចូលរួមពីបរទេស ដែលលោកពូទីនហៅថា ជាក្រុមបំផ្លិចបំផ្លាញ។
គួររំឭកថា ភាពចម្រូងចម្រាសស្តីពីបញ្ហារោងចក្រនុយក្លេអ៊ែរនេះ កើតមានឡើងក្រោយ មានការវាយប្រហារគ្នា នៅរោងចក្រ ហ្សាប៉ូរី ហ្សីយ៉ា (Zaporozhskaya )របស់ប្រទេសអ៊ុយក្រែនកាលពីថ្ងៃទី០៤ខែមីនា បានបង្កឱ្យមានការព្រួយបារម្ភទូទាំងពិភពលោក និងការចោទប្រកាន់ថា រុស្ស៊ីកំពុងប្រថុយប្រថាននឹងគ្រោះមហន្តរាយនុយក្លេអ៊ែរ ប្រសិនបើម៉ាស៊ីនរ៉េអាក់ទ័រនុយក្លេអ៊ែរត្រូវបំផ្លាញ។ ទន្ទឹមនឹងនេះ ទីក្រុងគៀវ និងទីក្រុងមូស្គូ បានចោទប្រកាន់ដាក់គ្នាទៅវិញទៅមកថែមទៀត ថា បានបង្កស្ថានការណ៍ឲ្យកាន់តែអាក្រក់ឡើងៗ។
វិមានក្រឹមឡាំងបានសង្កត់ធ្ងន់នៅក្នុងសេចក្តីថ្លែងការណ៍មួយថា ការប៉ុនប៉ងបន្ទោសយោធារុស្ស៊ីចំពោះឧប្បត្តិហេតុនេះ គឺជាផ្នែកមួយនៃយុទ្ធនាការឃោសនាបំផ្លើស ព្រោះសុវត្ថិភាពរបស់រោងចក្រនុយក្លេអ៊ែរត្រូវបានការពារយ៉ាងល្អបំផុតមកទល់ពេលនេះ។ លោក Putin បាននិយាយថា រោងចក្រថាមពលនុយក្លេអ៊ែរ ហ្សាប៉ូរី ហ្សីយ៉ា Zaporizhzhia និងទីក្រុង Chernobyl ឥឡូវនេះស្ថិតនៅក្រោមការការពារប្រកបដោយប្រសិទ្ធភាពដោយកងទ័ពរុស្ស៊ី។
អត្ថបទគួរអាន
ទោះបីបែបនេះក្តី ភាគីរុស្ស៊ីនៅតែស្វាគមន៍សម្រាប់កិច្ចប្រជុំស្តីពីបញ្ហានេះ តបតាមការចង់បានរបស់បស្ចឹមលោក ប៉ុន្តែលោកពូទីនបានបដិសេធរៀបចំកិច្ចប្រជុំនេះនៅក្នុងតំបន់ Chernobyl ដោយស្នើឲ្យរៀបចំឡើងនៅប្រទេសទីបី ឬតាមប្រព័ន្ធអនឡាញជំនួសវិញ។
សូមរំឭកថា កាលពីថ្ងៃសុក្រទី៤មីនាសប្តាហ៍មុន កងកម្លាំងរុស្ស៊ីបានបាញ់ផ្លោងទៅរោងចក្រនុយក្លេអ៊ែរដ៏ធំបំផុតមួយឈ្មោះហ្សាប៉ូរី ហ្សីយ៉ា Zaporizhzhia ដោយបានបង្កឱ្យមានភ្លើងឆាបឆេះជាខ្លាំង រហូតបានកាន់កាប់ទាំងស្រុងលើរោងចក្រមួយនេ។
ការវាយលុកនេះបានធ្វើឱ្យមានការភ័យខ្លាចជាថ្មីថា ការលុកលុយអាចបំផ្លាញម៉ាស៊ីនរ៉េអាក់ទ័រនុយក្លេអ៊ែរដ៏ធំមួយ ក្នុងចំណោមម៉ាស៊ីនរ៉េអាក់ទ័រទាំង១៥របស់អ៊ុយក្រែន ហើយអាចឈានទៅជួបឧបទ្ទេវហេតុដូចករណី នៅរោងចក្រ Chernobyl កាលពីឆ្នាំ១៩៨៦ ដែលជាគ្រោះមហន្តរាយនុយក្លេអ៊ែរដ៏អាក្រក់បំផុតរបស់ពិភពលោក ដែលបានភាយជាតិវិទ្យុសកម្មប្រហែល ១១០ គីឡូម៉ែត្រនៅភាគខាងជើងនៃរដ្ឋធានីកៀវ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
