សម្ដេចធិបតី ហ៊ុន ម៉ាណែត ជំរុញឱ្យក្រសួងការពារជាតិធ្វើទំនើបកម្មយោធា ដើម្បីត្រៀមប្រឆាំងនឹងអំពើភេរវកម្ម និងឧក្រិដ្ឋកម្មបច្ចេកវិទ្យា

នាពិធីអបអរសាទរខួបអនុស្សាវរីយ៍លើកទី២៨ ថ្ងៃបង្កើតបញ្ជាការដ្ឋានទ័ពពិសេស នាថ្ងៃទី១០ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា កងយោធពលខេមរភូមិន្ទរបស់កម្ពុជា គឺមានប្រវត្តិយូរហើយ ប៉ុន្តែគ្រប់សម័យកាលហានិភ័យ និងការប្រឈម គឺខុសគ្នា ជាក់ស្ដែងការប្រឈម និងការគំរាមកំហែងពីសង្រ្គាមបែបប្រពៃណី ពោលគឺសង្រ្គាមបែបប្រើប្រាស់កម្លាំងទល់កម្លាំងនៅកម្ពុជា គឺមានហានិភ័យតិចណាស់ពេលបច្ចុប្បន្ន ប៉ុន្តែអ្វីដែលត្រូវយកចិត្តទុកដាក់ គឺការប្រឈមនឹងហានិភ័យសន្តិសុខបែបមិនប្រពៃណី ដែលសំដៅដល់ការប្រយុទ្ធប្រឆាំងនឹងអំពើភេរវកម្ម ឧក្រិដ្ឋកម្មផ្សេងៗ ការប្រឈមនឹងគ្រោះមហន្ដរាយគ្រប់ប្រភេទ និងហានិភ័យពីសន្តិសុខផ្នែកប្រព័ន្ធបច្ចេកវិទ្យា។

ចំពោះអំពើភេរវកម្ម សម្តេច ហ៊ុន ម៉ាណែត អះអាងថា គ្មាននរណាអាចប៉ាន់ស្មានថា មិនមានករណីភេរវកម្មអាចកើតមាននៅកម្ពុជានោះទេ ប៉ុន្តែទាមទារឱ្យកងទ័ពកម្ពុជាពង្រឹងសមត្ថភាពប្រឆាំងភេរវកម្ម ដើម្បីឆ្លើយតបនឹងករណីណាមួយ ដែលអាចកើតឡើងជាយថាហេតុ។ ដោយឡែកសម្រាប់ ការប្រយុទ្ធប្រឆាំងគ្រោះមហន្តរាយ ក៏ទាមទារឱ្យមានការបំពាក់សម្ភារបន្ថែម ដើម្បីពង្រីកសមត្ថភាពជួយសង្គ្រោះផងដែរ។

ជាមួយគ្នានេះ សម្ដេចធិបតី ក៏បានជំរុញឱ្យក្រសួងការពារជាតិ អគ្គមេបញ្ជាការ មេបញ្ជាការកងទ័ពទាំងអស់ពិនិត្យ និងយកចិត្តទុកដាក់ខ្ពស់លើការគំរាមកំហែងបច្ចុប្បន្ន និងទៅអនាគត ពោលគឺការគំរាមកំហែងពីសន្តិសុខបច្ចេកវិទ្យា ដោយធ្វើយ៉ាងណាត្រូវពង្រឹងស្ថាប័នរបស់ខ្លួនទាំងនីតិវិធី និងយន្តការសម្រាប់គ្រប់គ្រងនូវសុវត្ថិភាពប្រព័ន្ធទិន្នន័យ សុវត្ថិភាពប្រព័ន្ធទំនាក់ទំនង ពិសេស គឺកងទ័ព ដែលចាំបាច់ត្រូវមានការសម្ងាត់ខ្ពស់ផងដែរ។

សូមជម្រាបថា ដើម្បីប្រយុទ្ធប្រឆាំងនឹងបញ្ហាទាំងនេះ ប្រមុខរាជរដ្ឋាភិបាលកម្ពុជា ណែនាំឱ្យមានការធ្វើទំនើបកម្មទ័ពពិសេស ដោយផ្ដោតលើការធ្វើទំនើបកម្មចំនួន៣ គឺការធ្វើទំនើបកម្មរចនាសម្ព័ន្ធ ការធ្វើទំនើបកម្មហ្វឹកហ្វឺន និងការធ្វើទំនើបកម្មសម្ភារ ឬគ្រឿងបំពាក់សម្រាប់យោធា៕