លោកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកនៃសម្ព័ន្ធក្រុមហ៊ុន WorldBridge បានលើកឡើងថា បច្ចុប្បន្ន ក្រុមហ៊ុនរបស់លោក កំពុងរៀបចំ និងបង្កើតគោលការណ៍នានា សម្រាប់ការបង្កើត តំបន់ចង្កោម SME ឬហៅថា SME Cluster នេះឡើង ខណៈដែលការរៀបចំ ជិតសម្រេចរួចរាល់ហើយ ដែលអាចនឹងបើកដាក់ឲ្យដំណើរការ នៅខែតុលា ឆ្នាំ២០១៨នេះ។
លោកឧកញ៉ា បន្ថែមទៀតថា តំបន់ចង្កោម SMEនេះ គឺមានលក្ខណៈខុសពី តំបន់សេដ្ឋកិច្ចពិសេស ដោយសារតែ វាមានទំហំផ្ទៃដីតូចជាង ពោលគឺមានផ្ទៃដី ប្រមាណពី៣ ទៅ ៥ហិកតាប៉ុណ្ណោះ ហើយនៅជំហានដំបូងនេះ តំបន់ចង្កោម SME ដំបូងគេនៅកម្ពុជា នឹងត្រូវបង្កើតឡើងនៅទីក្រុងតាខ្មៅ ខណៈដំណាក់កាលបន្ទាប់ អាចនឹងបង្កើតឡើងនៅខេត្តព្រះសីហនុ។
អត្ថបទទាក់ទង!
បើតាមការគូសបញ្ជាក់ពីលោកឧកញ៉ា សៀ ឫទ្ធី លោកឧកញ៉ក៏មានគោលដៅ បង្កើតតំបន់ចង្កោម SME នេះ ឲ្យបានកាន់ច្រើនថែមទៀត រួមទាំងនៅតាមបណ្ដាខេត្តក្រុងនានា ដែលមានធនធានវត្ថុធាតុសម្រាប់ការផលិត និងកែច្នៃ ពោលគឺ តំបន់ចង្កោម SME នឹងរត់នៅតាមតំបន់ណា ដែលមានសក្ដានុពលខ្លាំងសម្រាប់ការផលិត និងកែច្នៃ ពិសេសការផលិតកែច្នៃកសិផលតែម្ដង។
លោកឧកញ៉ា សៀ ឫទ្ធី បញ្ជាក់បន្ថែមទៀតថា តំបន់ចង្កោម SME នេះនឹងជួយដល់វិស័យផលិត កែច្នៃរបស់កម្ពុជាយ៉ាងខ្លាំង ដោយសារតែវាមានប្រព័ន្ធហេដ្ឋារចនាសម្ព័ន្ធងាយស្រួល សម្រាប់ដំណើរការផលិត និងជួយកាត់បន្ថយ ការចំណាយនានា របស់ម្ចាស់សហគ្រាសផងដែរ។ ជាក់ស្ដែង សគ្រាសដែលចូលមកក្នុងជាចង្កោមនេះ នឹងទទួលបានការផ្ដល់ជូនជាច្រើន ទាំងការរើសបុគ្គលិក កម្មករ ការវេចខ្ចប់ និងការស្វែងរកទីផ្សារជូនជាដើម ព្រមជាមួយនឹងឱកាសទទួលបានទុនហិរញ្ញវត្ថុផងដែរ។
សូមជម្រាបថា កាលពីពេលថ្មីៗនេះដែរ ក្រុមហ៊ុនរបស់លោកឧកញ៉ា សៀ ឫទ្ធី ក៏ទើបតែបង្កើតមូលនិធិអាជីវកម្ម OOCTANE មានលក្ខណៈជាការវិនិយោគរួម (Venture Capital) ដែលមានទឹកប្រាក់សរុប ៥លានដុល្លារ សម្រាប់ផ្ដល់ជាមូលនិធិទុនហិរញ្ញវត្ថុទៅកាន់អ្នកចាប់ផ្ដើមអាជីវកម្មថ្មោងថ្មី ក៏ដូចជាសហគ្រាសធុនតូច និងមធ្យមផងដែរ។
បើតាមការបង្ហើបឲ្យដឹងពីឧកញ៉ារូបនេះ សហគ្រាស ដែលបានចូលរួមក្នុងតំបន់ចង្កោម SME គឺនឹងងាយក្នុងការទទួលបានទុនពីមូលនិធិ OOCTANE នេះ ដើម្បីចាប់ផ្ដើម និងពង្រីកអាជីវកម្មរបស់ពួកគេ៕
None
