របាយការណ៍មួយអះអាងថា សិង្ហបុរីមានមហាសេដ្ឋីប្រាក់ខ្ទង់លានដុល្លារជាង៣៣ម៉ឺននាក់

របាយការណ៍ស្ដីពីមហាសេដ្ឋីពិភពលោករបស់ធនាគារស្វីស UBS បានបង្ហាញថា ចំនួនមហាសេដ្ឋីនៅប្រទេសសិង្ហបុរី បានកើនឡើង០,៤% ដោយឡើងដល់ជាង៣៣ម៉ឺន៣ពាន់នាក់ កាលពីឆ្នាំមុន។ តួលេខនេះ បានធ្វើឱ្យប្រទេសអាស៊ីអាគ្នេយ៍មួយនេះ ជាប់ចំណាត់ថ្នាក់ទី២២ ក្នុងចំណោមប្រទេសចំនួន៥៦ ដែលធនាគារនេះបានសិក្សា ហើយចំនួនមហាសេដ្ឋីរបស់ប្រទេសនេះត្រូវបានគេរំពឹងថា នឹងកើនឡើង១៣% នៅក្នុងឆ្នាំ២០២៨ ដោយឡើងដល់ជាង៣៧ម៉ឺន៣ ពាន់នាក់។

មហាសេដ្ឋីសិង្ហបុរី មានទ្រព្យសម្បត្តិសរុបចំនួនជាង១,២ទ្រីលានដុល្លារ ហើយចំនួនមហាសេដ្ឋីទាំងនេះស្មើនឹងអត្រា៦,៦% នៃចំនួនប្រជាជនសិង្ហបុរីសរុប។ សហរដ្ឋអាម៉េរិក ដែលជាមហាអំណាចសេដ្ឋកិច្ច និងយោធាលេខ១ លើពិភពលោកមានមហាសេដ្ឋីច្រើនជាងគេរហូតដល់ជិត ២២លាននាក់ តាមពីក្រោយដោយចិនដីគោក ចក្រភពអង់គ្លេស និងប្រទេសបារាំង។ ចំណែកនៅតំបន់អាស៊ីវិញ ប្រទេសជប៉ុន មានមហាសេដ្ឋីប្រាក់ខ្ទង់លានដុល្លារជិត២លាននាក់ ឥណ្ឌាមជិត៨៧ម៉ឺននាក់ និងហុងកុងជិត៦៣ម៉ឺននាក់៕

អត្ថបទ៖ សុខ មង្គល