ប្រធានាធិបតីកូរ៉េ យ៉ុន ស៊ុកយុល រួចផុតពីការចោទប្រកាន់ទោស ខណៈអតីតរដ្ឋមន្ត្រីការពារជាតិត្រូវបានចាប់ខ្លួនពាក់ព័ន្ធនឹងច្បាប់អាជ្ញាសឹកថ្មីៗនេះ

ប្រធានាធិបតីកូរ៉េខាងត្បូង លោក យ៉ុន ស៊ុកយុល បានរួចផុតពីការបោះឆ្នោតចោទប្រកាន់ទោសនៅក្នុងសភាកាលពីថ្ងៃសៅរ៍ កន្លងមកនេះ ពាក់ព័ន្ធនឹងការប្រកាសច្បាប់អាជ្ញាសឹក ដើម្បីដាក់ប្រទេសក្នុងគ្រាអាសន្ន ដែលបានបង្កភាពចលាចលនៅទូទាំងប្រទេសកូរ៉េខាងត្បូង កាលពីសប្ដាហ៍មុន។

ប៉ុន្តែមេដឹកនាំគណបក្សកាន់អំណាច គឺលោក ហាន ដុងហុន (Han Dong-hoon) បាននិយាយថា ទោះជារួចផុតពីការចោទប្រកាន់ទោសក៏ដោយ ក៏លោក យ៉ុន ស៊ុកយុល នឹងត្រូវដកហូតតួនាទីរបស់លោកមួយចំនួនដោយចៀសមិនរួចឡើយ នៅមុនពេលលោកចុះចេញពីតំណែង ហើយលោក ហាន ដុងហុន គ្រោង ជួបជាមួយនាយករដ្ឋមន្ត្រីកូរ៉េខាងត្បូង លោក ហាន ដាច់ស៊ូ (Han Duck-soo) កាលពីព្រឹកថ្ងៃអាទិត្យ ដើម្បីពិភាក្សាអំពីបញ្ហានេះ។

កាលពីថ្ងៃសៅរ៍ លោក យ៉ុន ស៊ុកយុល បានថ្លែងសុន្ទរកថា តាមទូរទស្សន៍ ដោយធ្វើការសុំទោសដល់ជនរួមជាតិ ចំពោះការប្រកាសច្បាប់អាជ្ញាសឹក ហើយនិយាយថា លោកនឹងមិនគេចពីការទទួលខុសត្រូវផ្នែកច្បាប់ និងនយោបាយសម្រាប់សកម្មភាពរបស់លោកនេះឡើយ ប៉ុន្តែលោកមិនបានបញ្ជាក់ពីការលាលែងពីតំណែងនោះទេ។

ពាក់ព័ន្ធនឹងច្បាប់អាជ្ញាសឹកនេះដែរ លោក គីម យ៉ុងយុន រដ្ឋមន្ត្រីការពារជាតិ កូរ៉េខាងត្បូង បានលាលែងពីតំណែងកាលពីថ្ងៃពុធសប្ដាហ៍មុន ហើយត្រូវបានចាប់ខ្លួនកាលពីថ្ងៃអាទិត្យ កន្លងទៅ ក្រោយពីគេបានចោទប្រកាន់ថា លោក គីម យ៉ុងយុន បានប្រើតួនាទីរបស់ខ្លួនដើម្បីជំរុញឱ្យលោក យ៉ុន ស៊ុកយុល ប្រកាសច្បាប់អាជ្ញាសឹកបានមួយប្រាវកាលពីថ្ងៃអង្គារ ហើយក្រុមស៊ើបអង្កេតពិសេសរបស់ក្រុមរដ្ឋអាជ្ញាកំពុងសួរចម្លើយ ដូច្នេះហើយភ្លាមៗនេះគេនៅមិនទាន់ដឹងពីមូលហេតុនៅឡើយទេ។

ការចាប់ខ្លួននេះបានធ្វើឡើងក្រោយពីគណបក្សជំទាស់សំឡេងភាគតិចចំនួន៣ បានដាក់ពាក្យបណ្តឹងទៅសាលាអយ្យការប្រឆាំងនឹងលោក យ៉ុន ស៊ុកយុល លោក គីម យ៉ុងយុន និងមេបញ្ជាការច្បាប់អាជ្ញាសឹកលោក ប៉ាក អានស៊ូ (Park An-su) ដោយចោទអ្នកទាំងបីនេះពីបទធ្វើអំពើបះបោរ។ ដូច្នេះហើយប្រសិនបើពួកគាត់ពិតជាមានទោសមែននោះ ពួកគាត់នឹងត្រូវប្រឈមនឹងទោសប្រហារជីវិត ឬក៏ទោសជាប់ពន្ធនាគារអស់មួយជីវិតជាមិនខានឡើយ៕

អត្ថបទ៖ សុខ មង្គល