អាស៊ីអាគ្នេយ៍កំពុងក្លាយជាទីផ្សារសក្តានុពល និងជាមជ្ឈមណ្ឌលផលិតរថយន្តអគ្គិសនី

នៅពេលនេះប្រសិនបើគេនិយាយអំពីផលិតកម្មយានយន្ដអគ្គិសនី គឺគេមិនអាចមើលរំលងតំបន់អាស៊ីអគ្នេយ៍បានឡើយ ដោយសារតែតំបន់ទាំងមូលក្រៅពីជាកន្លែងប្រើប្រាស់ហើយនោះក៏ជា កន្លែងផលិតកម្មមួយដ៏សម្បើមផងដែរ ។
របាយការណ៍បង្ហាញដោយធនាគារអភិវឌ្ឍន៍អាស៊ីឲ្យដឹងថា កាលពីឆ្នាំ២០២១ ទីផ្សារយានយន្តអគ្គិសនីនៅក្នុងតំបន់អាស៊ានជារួមមានតម្លៃប្រមាណជាត្រឹមតែ ៥០០ លានដុល្លារប៉ុណ្ណោះ ប៉ុន្តែគេព្យារកណ៍ថា នឹងអាចកើនឡើងជិតដល់តម្លៃ៣ ពាន់លានដុល្លារនៅក្នុងឆ្នាំ២០២៧ខាងមុខ ។
តាមគោលដៅដែលបានកំណត់ ឥណ្ឌូនេស៊ីដែលជាប្រទេសមានប្រជាជនច្រើនលើសលុបនៅអាស៊ាន គ្រោងនឹងឲ្យទីផ្សារនៅក្នុងប្រទេសលក់តែរថយន្ត និងម៉ូតូអគ្គិសនីប៉ុណ្ណោះនៅត្រឹមឆ្នាំ២០៥០ ខណៈដែល ថៃ វៀតណាម និង ម៉ាឡេស៊ី គឺនឹងប្រឹងប្រែងធ្វើតាមដែរ។
នៅពេលនេះទោះបីជា នៅវៀតណាម និង បណ្តាប្រទេសខ្លះនៅមានបញ្ហានឹងការប្រើប្រាស់រថយន្តអគ្គិសនីក៏ពិតមែន ប៉ុន្តែនៅថៃ កំណើនកំពុងតែកើតឡើង។
កាសែតបាងកកប៉ុស្តិ៍បានអះអាងថា ថៃជាប្រជាជាតិដែលកំពុងតែប្រើប្រាស់រថយន្តអគ្គិសនី ច្រើនជាងគេ ពោលគឺមានទំហំរហូតដល់ ៧៩ ភាគរយ នៃទីផ្សាររថយន្តអគ្គីសនីនៅក្នុងអាស៊ាន ។

ប្រភពដដែលបានបន្តថា តាមនិន្នាការនេះនៅក្នុងឆ្នាំ២០៣០ ថៃមានបំណងបង្កើនការប្រើប្រាស់រថយន្តអគ្គីសនីឲ្យបានទំហំ៣០% នៃផលិតកម្មរថយន្ត ២លាន៥សែនគ្រឿងរបស់ខ្លួន ។
តាមសេចក្តីរាយការណ៍របស់ទីភ្នាក់ងារព័ត៌មានស៊ីនហួរ បានឲ្យដឹងថា ក្រុមហ៊ុនផលិតអាគុយលីចូមសកលដែលមានមូលដ្ឋាននៅប្រទេសចិន កាលពីថ្ងៃទី៦ខែសីហា ក៏បានបើកការដ្ឋានកសាង រោងចក្រផលិតថ្មីរបស់ខ្លួននៅទីក្រុង កេដាហ្វ ប្រទេសម៉ាឡេស៊ី ជាមួយនឹងការវិនិយោគដំបូងតម្លៃ ៤២២លានដុល្លារ ដើម្បីផលិត ឧបករណ៍បម្រើដល់ផលិតកម្មរថយន្តអគ្គីសនីនៅ ទូទាំងតំបន់អាស៊ីអាគ្នេយ៍។
លោក ចូ ចេន (Joe Chen) នាយកក្រុមហ៊ុន EVE Energy Malaysia បាននិយាយថា ដោយផ្អែកលើគុណសម្បត្តិក្នុងស្រុក និងបទពិសោធន៍ប្រតិបត្តិការរបស់ខ្លួន ក្រុមហ៊ុននឹងសាងសង់មូលដ្ឋាន ផលិតឧបករណ៍គាំទ្រយានយន្តអគ្គិសនី នៅក្នុងប្រទេសម៉ាឡេស៊ីផងដែរ៕

ដោយៈ សរ សុជាតិ