ការប្រកាសលាលែងពីតំណែងរបស់រដ្ឋមន្ត្រីទាំងនេះ ធ្វើឡើងនៅក្រោយពេលតែមួយថ្ងៃប៉ុណ្ណោះ បន្ទាប់ពីប្រធានាធិបតីស្រីលង្កាលោក ហ្កូតាបាយ៉ា រ៉ាចាប៉ាក់សា (Gotabaya Rajapaksa) បានប្រកាសដាក់ប្រទេសក្នុងគ្រាអាសន្ន ស្របពេលវិបត្តិសេដ្ឋកិច្ចកាន់តែដុនដាប ដែលបង្កឲ្យមានការធ្វើបាតុកម្មប្រឆាំងរូបលោក និងក្រុមគ្រួសារលោកឲ្យចុះចេញពីតំណែង។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
ក្នុងចំណោមរដ្ឋមន្ត្រីដែលបានសុំលាលែងពីតំណែងនោះ រួមមាន រដ្ឋមន្ត្រីក្រសួងអប់រំ និងក៏មានដែរកូនប្រុសមួយរូបរបស់នាយករដ្ឋមន្ត្រីស្រីលង្កា ដែលកាន់តំណែងជារដ្ឋមន្ត្រីក្រសួងយុវជន និងកីឡា គឺលោក ណាម៉ាល់ រ៉ាចាប៉ាក់សា (Namal Rajapaksa)បានលាលែងពីតំណែងនេះ។
យ៉ាងណាមិញ បងប្អូនបង្កើតទាំងពីរនាក់ដែលកាន់អំណាចជានាយករដ្ឋមន្ត្រី គឺលោកម៉ាហ៊ីនដា រ៉ាចាប៉ាក់សា(Mahinda Rajapaksa) និងប្រធានាធិបតី ហ្កូតាបាយ៉ា រ៉ាចាប៉ាក់សា (Gotabaya Rajapaksa) មិនបានចុះចេញពីតំណែងនោះទេ និងទោះបីជាពលរដ្ឋរាប់ពាន់នាក់បានធ្វើបាតុកម្មទាមទារឲ្យលាលែងពីតំណែងក្តី។
កូនប្រុសនាយករដ្ឋមន្ត្រី ដែលបានសុំលាលែង ពន្យល់ថា លោកសុំចាកចេញពីតួនាទី ដោយសង្ឃឹមថា អាចជួយក៏ដូចជាជំរុញដល់ការសម្រេចចិត្តនានារបស់ពូ និង ឳពុករបស់លោក ក្នុងការស្តារស្ថិរភាពនៅស្រីលង្កាឡើងវិញ។
នៅចំពោះមុខការសុំលាលែងជាបន្តបន្ទាប់របស់ក្រុមរដ្ឋមន្ត្រី ខុទ្ទកាល័យប្រធានាធិបតីស្រីលង្កាបានចេញសេចក្តីថ្លែងការណ៍មួយ ដោយអញ្ជើញគណបក្សនយោបាយទាំងអស់ដែលមានកៅអីនៅក្នុងសភា ឲ្យមករួមសាមគ្គីគ្នា ដើម្បីជួយស្វែងរកច្រកចេញពីវិបត្តិសេដ្ឋកិច្ចដ៏អាក្រក់បំផុតរបស់ប្រទេសមួយនេះ។
អត្ថបទគួរអាន
ការស្នើឲ្យគណៈបក្សក្នុងសភា មករួបរួមគ្នានេះផងដែរ ធ្វើឡើងស្របពេលដែលអ្នកមានតួនាទីសំខាន់ៗរបស់ប្រទេសស្រីលង្ការផ្តើមសុំលាលែងជាបន្តបន្ទាប់ ដែលនៅថ្ងៃចន្ទដើមសប្តាហ៍នេះ សូម្បីតែ ទេសាភិបាលធនាគារកណ្តាលស្រីលង្កាលោក អាជីត នីវ៉ាត ខាបរ៉ាអាល់ (Ajith Nivard Cabraal) ក៏បានស្នើលាលែងពីតំណែងដែរ។ ប្រការនេះបានធ្វើឲ្យការជួញដូរភាគហ៊ុនក្នុងប្រទេសស្រីលង្កាត្រូវផ្អាកដល់ទៅ២ដងនៅថ្ងៃចន្ទដើមសប្តាហ៍នេះ ដោយសារតែតម្លៃភាគហ៊ុនធ្លាក់ចុះខ្លាំង។
ស្រីលង្កាដែលមានជាប់ជំពាក់បំណុលរាប់ពាន់លានដុល្លារ កំពុងជួបការលំបាកដោយមិនមានប្រាក់គ្រប់គ្រាន់ ដើម្បីចំណាយលើការនាំចូលប្រេងឥន្ធនៈ ខ្វះខាតថ្នាំពេទ្យ ខ្វះខាតស្បៀងអាហារយ៉ាងធ្ងន់ធ្ងរ និងអតិផរណាកើនឡើងខ្លាំង។ អគ្គិសនីត្រូវបានគេកាត់ផ្តាច់អស់ជាច្រើនម៉ោងនៅរៀងរាល់ថ្ងៃដោយសារខ្វះខាតថាមពល ខណៈបាតុកម្មកំពុងរីករាលដាល បើទោះបីជារដ្ឋអំណាចបានដាក់បម្រាមគោចរកាលពីចុងសប្តាហ៍មុននេះក៏ដោយ។
ទន្ទឹមគ្នានេះ កងទ័ពក៏ត្រូវបានគេដាក់ពង្រាយបន្ថែមនៅតាមទីក្រុងធំៗផងដែរ ដើម្បីទប់នឹងកំណើនបាតុកម្មរបស់ប្រជាជន។ តែរដ្ឋាភិបាលបានលើកឡើងថា បាតុកម្មពេលនេះបានដឹកនាំដោយក្រុមអ្នកជ្រុលនិយម ដែលបានអំពាវនាវឲ្យមានបដិវត្តន៍អារ៉ាប់ក្នុងគោលដៅផ្ដួលរំលំរដ្ឋាភិបាលសព្វថ្ងៃតែប៉ុណ្ណោះ។
សូមជម្រាបថា គិតត្រឹមឆ្នាំ២០២២នេះ ស្រីលង្កាមានជាប់បំណុលសរុប៥១ពាន់លានដុល្លារដែល មួយភាគធំខ្ចីពីចិន ហើយក្នុងមួយឆ្នាំៗស្រីលង្កាត្រូវចំណាយប្រាក់ប្រមាណ៧ពាន់លានដុល្លារដើម្បីសងបំណុល៕
None
