ភ្លើងសង្គ្រាមនេះ ក៏បានជះកំដៅដល់កោះតៃវ៉ាន់ឲ្យព្រួយបារម្ភថា ចិនអាចឆ្លៀតឱកាសវាយប្រហារខ្លួនដូចគ្នា។ ជាក់ស្តែង នៅក្នុងថ្ងៃតែមួយ ដែលរុស្សីវាយអ៊ុយក្រែន ទីក្រុងប៉េកាំងបានបន្តដាក់សម្ពាធលើកោះតៃវ៉ាន់ ដោយបានបញ្ចូនយន្តហោះចម្បាំង ៩គ្រឿងហោះចូលដែនអាកាសតៃវ៉ាន់។ នេះបើតាមសេចក្តីរាយការណ៍ពីអាជ្ញាធរកោះតៃវ៉ាន់។
កោះតៃវ៉ាន់បានឲ្យដឹងនៅថ្ងៃព្រហស្បតិ៍ទី២៤កុម្ភៈថា កងកម្លាំងទ័ពអាកាសរបស់ខ្លួន បានព្រមានតាមវិទ្យុទាក់ទងទៅកាន់យន្តហោះចិនចំនួន៩គ្រឿងឲ្យចាកចេញជាបន្ទាន់ ក្រោយពីបានហោះចូលក្នុងតំបន់ការពារដែនអាកាសរបស់តៃវ៉ាន់ នៅចំថ្ងៃតែមួយដែលរុស្ស៊ីបានឈ្លានពានអ៊ុយក្រែន។
បើតាមព័ត៌មានដដែលពីភាគីតៃវ៉ាន់ សកម្មភាពចុងក្រោយនេះ ត្រូវបានចិនប្រើប្រាស់យន្តហោះចម្បាំងប្រភេទ J-16 ប្រាំបីគ្រឿង និងយន្តហោះឈ្លបយកការណ៍ប្រភេទ Y-8 មួយគ្រឿង ហោះពីលើតំបន់មួយភាគឦសាននៃប្រជុំកោះ Pratas ដែលគ្រប់គ្រងដោយតៃវ៉ាន់។
ជាការឆ្លើយតប តៃវ៉ាន់បានបញ្ចូនយន្តហោះចម្បាំងហោះឡើងទៅព្រមានយន្តហោះចិនឲ្យចាកចេញពីដែនអាកាសខ្លួន ខណៈមីស៊ីលការពារដែនអាកាសត្រូវបានគេដាក់ពង្រាយផងដែរ។
អត្ថបទគួរអាន
គួរជម្រាបថា នេះមិនមែនជាលើកទីមួយនោះទេ ដែលកោះតៃវ៉ាន់ក្នុងពេលជិតពីរឆ្នាំមកនេះ តែងរាយការណ៍ពីសកម្មភាពរបស់យន្តហោះចម្បាំងចិន រំលោភមកលើដែនអាកាសរបស់ខ្លួន ដែលភាគច្រើនកើតឡើងជាញឹកញាប់នៅភាគនិរតីនៃដែនកោះ។
យ៉ាងណាមិញ ការហោះរំលោភជាថ្មីនេះ ធ្វើឡើងស្របពេលដែលវិបត្តិនៅអ៊ុយក្រែនកំពុងតែធ្លាក់ដុនដាបទៅៗ ពោលគឺកំពុងស្ថិតក្នុងភ្លើងសង្រ្គាមតែម្តង។ ប្រមុខដឹកនាំកោះតៃវ៉ាន់ លោកស្រីសៃ អ៊ីងវិន ចាត់ទុកវិបត្តិនៅអ៊ុយក្រែនជាបញ្ហាសំខាន់មួយ ដែលតៃវ៉ាន់កំពុងតានដានយ៉ាងយកចិត្តទុកដាក់។ តានដានខ្លាំងក៏ដោយសារតែតៃវ៉ាន់បារម្ភថា អាចត្រីងៀតឆ្លៀតពង ពោលគឺចិនអាចឆ្លៀតវាយតៃវ៉ាន់ ពេលលោកខាងលិចជាប់ដៃក្នុងបញ្ហានៅអឺរ៉ុបខាងកើត។ ប៉ុន្តែទីក្រុងប៉េកាំងបានចេញមុខមកបដិសេធការយកតៃវ៉ាន់ទៅប្រដូចនឹងស្ថានភាពអ៊ុយក្រែន ហើយនៅតែបញ្ជាក់ដដែលជាដដែលថា តៃវ៉ាន់តែងតែជាផ្នែកមួយរបស់ខ្លួន ស្របតាមច្បាប់ និងប្រវត្តិសាស្ត្រ។
នៅចំពោះមុខដំណើរវិវត្តនៃស្ថានការណ៍នៅអ៊ុយក្រែន កោះតៃវ៉ាន់នៅថ្ងៃសុក្រនេះប្រកាសថា នឹងចូលរួមជាមួយបណ្តាប្រទេសប្រជាធិបតេយ្យ ដើម្បីដាក់ទណ្ឌកម្មរុស្ស៉ីផងដែរ។ នេះបើតាមការចុះផ្សាយពីរ៉យទ័រ។ ថ្នាក់ដឹកនាំជាន់ខ្ពស់របស់កោះតៃវ៉ាន់ លោក ស៊ូ ត្សេងចាង (Su Tseng-chang) បានថ្លែងនៅថ្ងៃសុក្រនេះថា កោះនេះនឹងចូលរួមជាមួយ បណ្តាប្រទេសប្រជាធិបតេយ្យផ្សេងៗទៀត ដើម្បីដាក់ទណ្ឌកម្មលើប្រទេសរុស្ស៊ី ឆ្លើយតបនឹងការឈ្លានពានប្រទេសអ៊ុយក្រែន។ យ៉ាងណាក៏ដោយ គេមិនទាន់បានបញ្ជាក់អំពីប្រភេទទណ្ឌកម្ម ដែលតៃវ៉ាន់អាចដាក់លើរុស្ស៊ី និងសម្ព័ន្ធមិត្តណាខ្លះដែលដែនកោះមួយនេះ នឹងចូលរួមជាមួយលើបញ្ហានេះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
